Cia siab tias huab cua yuav zoo me ntsis thoob plaws rau xeev New South Wales rau hnub Friday, tab sis yeej tseem siv ntau cov kev ceeb toom dej nyab li qub.
Kuj tseem muaj dej nyab feem ntau rau Wollombi Brook ntawm Bulga, sab qab teb hnub poob ntawm Singleton, thiab tus dej Barwon River ntawm lub zos Mungindi, uas ze ciam teb xeev Queensland.
Tus dej Hunter River yeej tau ua rau muaj dej nyab me ntsis rau ntawm Maitland uas dej twb ze rau theem dej nce siab tshaj plaws lawm.
Tus dej Hawkesbury yeej tau nqeg qe dua cov theem uas yuav muaj dej nyab loj lawm, tab sis yeej tseem muaj dej nyab hauj sim txuas ntxiv ntawm North Richmond, Windsor thiab Sackville txuas ntxiv.
Kuj muaj dej nyab me ntsis ntawm tus dej Colo River ntawm txoj kev Putty Road.
Txawm tias lub chaw ntsuam thiab kwv yees huab cua (Bureau of Meteorology) tau kwv yees tias yuav tsis los nag ib ntus txuas ntxiv, los vim tias tej av noos ntub dej thiab tej dej los phwj lawm ces ntshe tej zaum yuav rov qab ua rau muaj dej nyab dua rau limtiam tom ntej no ntxiv.
Tsis tas li no kuj muaj cov kev ceeb toom tias yog mus caij phiaj ua si saum nplaim dej yuav raug kev phom sij rau ntau cov chaw li Macquarie, Hunter, Sydney, Illawarra, Batemans thiab Eden coasts, uas yuav ua rau muaj teeb meem rau tej kev mus txhom ntses los yog nuv ntses ntawm tej chaw muaj pob zeb, mus caij nkoj los yog mus ua luam dej ntawd.
Koj muaj peev xwm mus txheeb tau daim map (luaj chib lig) qhia txog tej zos ntawm Sydney tias yuav tau tsiv tawm mus rau lawm qhov chaw
Lub koom haum State Emergency Service (SES) yeej tau qhia kom tej neeg tsiv tawm ntawm ib cov chaw uas tej zaum yuav raug cais lawm thiab.
Tej neeg uas tsis tawm thiab daig ces yuav tsis tau hluav taws xob siv thiab tsis tau txais lwm cov kev pab cuam tseem ceeb, thiab tej zaum yuav yog ib cov kev phom sij heev uas yuav mus pab cawm lawm.
Yog li thiaj tau muaj cov kev taw qhia kom nyob twj ywm ntawm tej chaw tsis raug dej nyab nrog yus tsev neeg, tej phooj ywg los yog ntawm ib qho chaw so twg. Thiab yog tsis muaj peev xwm ua tau li hais ntawd ces kom mus so rau ntawm tej chaw uas muaj siv ntawd.
Source: NSW Multicultural Health Communication Service
Yog tias koj yuav tau tawm ntawm koj tsev mus ces nod yog SES cov kev taw qhia rau koj:
- Coj koj tej tsiaj nrog koj, nqa tej khoom tseem ceeb, npaj ris tsho sov, tshuaj, ntaub ntawv insurance thiab tej khoom muaj nqes nrog koj.
- Rov qab npaj thiab tum tej khoom ntiag tug uas yog koj li rau tej chaw nyab xeeb thiab tej chaw siab zog.
- Tawm ntawm koj tsev kom ntxov npaum li ntxiv tau kom thiaj tsis txhob khuam rau tej tsheb daib tom kev.
- Npaj dej haus thiab zaub mov kom txaus vim tej zaum yuav yog ib cov kev ntoj ncig ntev.
- Qhia tej xov xwm no rau koj tsev neeg, tej phooj ywg, tej neeg nyob ze koj thiab lwm tus yog muaj peev xwm ua tau.
Txheeb xyuas seb ho muaj xwm txheej dab tsi tshwm sim tshiab tau ntawm .
Yog tias koj poob rau tej xwm txheej yuav muaj kev phom sij tau rau koj txoj sia ces hu rau tus xov Triple Zero (000). Los yog hu rau NSW SES tus xov tooj 132 500 yog koj raug kev puas tsuaj los ntawm nag xob nag cua, cuab hlob, lawg, ntoo vau los yog cov ceg ntoo uas ua rau muaj teeb meem rau koj lub tsev los yog yuav ua rau tsis tau txais kev nyab xeeb rau ib tug neeg twg.
