Ntsiab lus tseem ceeb:
- Methanol ces yeej raug tov rau tej cawv yam tsis raug cai ntawm ib co teb chaws uas muaj tej cai tswj dej cawv tsis tshua nruj pes tsawg.
- Methanol poisoning kuj yuav ua rau raug kev phom sij tsis tau txais kev noj qab nyob zoo loj heev tau.
- Tam sim no los kuj tseem muaj Australia ob tug ntxhais hluas yuav tau ntxeem kom dhau nrog tej xwm txheej dej cawv muaj tej kuab no ntawm teb chaws Nplog uas tseem raug kho ntawm Thaib tej tsev kho mob.
10 xyoo dhau los ces yeej muaj kev txhawj xeeb ntau tuaj ntxiv txog cov kev siv methanol hauv tej dej cawv haus ntawm ib co teb chaws ntawm cheeb tsam Southeast Asia.
Ethanol ces yog ib co siv los ua cawv, tab sis methanol yeej muaj cov ntxhiav txawv, thiab yeej ib txwm raug siv yam tsis raug cai vim pheej yig dua.
Thiaj tej cawv uas muaj tej methanol xyaw no thiaj tau ua rau muaj ob tug ntxhais hluas neeg Australia yuav tau ntxeem tiag tiag kom cia sia ntawm Thaib tej tsev kho mob tom qab tau haus tej cawv uas muaj cov kuab no xyaw ntawm teb chaws Nplog.
Yog li ntawd ne, methanol yog dab tsi thiab dab tsi ua rau cov kuab methanol no ras los ua ib co taug phom sij heev?
Methanol poisoning yog dab tsi?
Methanol ces yog ib co kuab tsis muaj xim thiab yog ib co kua uas muaj peev xwm kub hnyiab tau yooj yim uas yeej ib txwm siv los tsim roj, tsim tshuaj tua kab tua ntsaum, siv los ntxuav tej xim, tov xyaws ib yam dab tsi kom tsis txhob khov, tov xyaw roj hmab (plastics), roj tsheb thiab yog ib co kuab tsau koj ib yam khoom dab tsi yaj ua kua.
Thiab tsis tsim nyog noj los yog haus tej kuab no thiab yeej yog ib co taug phom sij rau tib neeg.
Professor Leigh Schmidtke tau hais yeej tsis muaj peev xwm paub tias ib co dej cawv haus twg puas muaj cov kuab methanol tov xyaw li thaum yus saj los yog hnia tus ntxhiab tsw. Source: Getty / Kaisersosa67
Nws tau tshab txhais tias hom kuab methanol no rau hloov ua ib co taug hu ua — formaldehyde thiab txuas ntxiv ntawd ces mam li hloov ua formic acid — uas yuav tsum tau kev puas tsuaj loj. Txawm tias tau cov taug no tsawg tsawg xwb los yeej yog ib co taug tsim teeb meem tau, thiab ua rau sab sab nkees nkees thiab tej zaum kuj yuav muaj kev phom sij rau txoj sia tau.
Nws tau qhia rau SBS News tias "30 millilitres ntawm cov kuab no xwb yeej muaj peev xwm tsim kev puas tsuaj loj rau ib co neeg twg thiab.''
Muaj dab tsi tau tshwm sim rau ob tug poj niam neeg Australia ntawm teb chaws Nplog?
Ob tug ntxhais hluas ntawm Ballarat thiab yog lwm tus neeg tej phooj ywg zoo li Holly Bowles thiab Bianca Jones ces yuav tau siv twj pab cawm siab ntawm ob lub tsev kho mob ntawm teb chaws Thaib tom qab uas xav tias tau raug cov teeb meem methanol posoning.
Ob tug ntxhais hluas no muaj hnoob nyoog 19 xyoos tib yam thiab nyuam qhuav kawm tiav high school tsis ntev los no, Bowles thiab Jones ces yeej tau ris hnab mus holiday ntawm teb chaws Nplog, thiab tau mus so ntawm lub tsev tos qhua Nana Hostel ntawm Vang Vieng, thaum nkawv tau pib muaj ib co yam ntxwv mob sab heev tom qab tau haus caws thaum tsaus ntuj ntawm ib lub bar ze lub tsev tos qhua nkawv pw ntawd.
Tsis tas li ntawd los yeej paub tias tau muaj yam tsawg li ob tug poj niam neeg Denmark tau tas sim neej thiab hnub tim 21.11.2024 no los Australia lub chaw nthuav xov xwm ABC kuj tau qhia ntxiv tias nom tswv Meskas tau qhia meej tias tau muaj ib tug neeg Meskas tas sim neej ntxiv thiab kuj tseem muaj tej neeg yam tsawg li 10 tus ntxiv tau muaj tej yam ntxwv mob thiab.
Ho muaj tej xwm txheej methanol poisoning zoo li cas?
Yuav tsum yog txhob txwm tov cov kuab methanol no rau tej dej cawv haus mas thiaj li muaj tej kuab no xyaw nrog tej dej cawv xwb.
Schmidtke tau hais tias "Methanol poisoning ces yeej pom muaj tas mus li ntawm ntau thaj chaw ntawm cheeb tsam teb chaws Southeast Asia uas lawv muag tej cawv pheej yig zog. Thiab kuj tsis tshua muaj tej cai nruj siv piv rau tej cai uas siv ntawm Australia no,''
"Nyob rau ntau thaj chaw ntwm cheeb tsam Southeast Asia no, ces lawv kuj muab tej txiv xyoob txiv ntoo los tsau ua cawv vim muaj cov pectin (cov hlab) ntau heev. Ces mam li coj tej kuas txiv tsau ua cawv no coj los cub ua cawv.''
Schmidtke tau qhia tias yeej tsis muaj peev xwm yuav qhia tau tias seb ib co dej cawv twg puas muaj tej kuab methanol li thaum yus saj los yog hnia.
Nws hais tias "Yog tias yus hliv ib khob kuab methanol thiab ib khob kuab ethanol tso rau saum ib lub rooj twg ces yeej zoo tib yam xwb, tus ntxhiav tsw tib zyam thiab yog saj los yeej qab tib yam xwb,''
"Raws li ib txwm pom ces yog thaum tov methanol xyaw rau tej dej cawv lawm ces yeej tseem muaj cov kuab ethanol, thiab yus yeej tsis paub tias tau muaj tej kuab taug no lom yus kiag tam sim ntawd lawm,''
"Yus tsuas paub tom qab ob peb teev uas tau haus lawm xwb thiab tom qab tau muaj tej yam ntxwv mob rau yus lawm xwb.''
Yus muaj peev xwm lug kom tsis txhob tau tej kuab taug no li cas?
Schmidtke tau hais tias tib txoj xub ke uas muaj peev xwm lug/zam kom tsis txhob tau tej kuab taug methanol no ces yog yuav tsum tau ua tib zoo xyuas kom yuav tau tej dej cawv haus los ntawm tej chaw muag uas nto npe thiab tso siab tau rau xwb.
Nws hais tias ''Qhov teeb meem nyuaj mas vim tej cawv no yeej muag pheej yig heev. Thiab yeej tsis muaj cai los tswj cov kev tsim tej cawv no, qhov no tseem yog ib co teeb meem.''
Bridget McKenzie uas yog ib tug nom kis xeev siab (Senator) ntawm pab nom Nationals uas tau koom nrog Amanda Rishworth uas yog tus nom lis dej num pab zej tsoom rau cov program Today Show hnub zwj Quag (Tuesday), los kuj tau tham txog qhov tseem ceeb ntawm tej cai thiab.
McKenzie tau hais tias "[Qhov no] qhia tias thaum peb nyob rau ntawm lub teb chaws vam meej li peb tej teb chaws uas muaj tej cai zoo heev los tswj thiab pov puag tej ib puag ncig nruj los yog muaj tej cai zoo coj los siv ua tib zoo xyuas kom tsis txhob muaj tej xwm txheej no tshwm sim thiab tsis tsim nyog pub kom tshwm sim ... tab sis thaum yus mua ntoj ncig rau lwm cov teb chaws uas tsis muaj tej cai los tswj tej no ces thiaj xav kom yuav tsum tau xyuam xim ceev faj tiag tiag.''
Muaj tej yam ntxwv mob li cas thiab muaj tej xub ke kho li cas?
Raws li Dr David Ranson uas yog tus coj lub tuam chav Forensic Medicine ntawm tsev kawm qib siab Monash University hais ces thaum ib tug twg raug cov kuab taug methanol lawm ces yeej ib txwm muaj tej yam ntxwv mob tom qab tau haus cov taug ntawd txog li 12 teev.
Tej neeg uas tau haus tej kuab taug (Methanol) no ces yuav muaj ntau cov yam ntxwv li yuav ua rau tus neeg tau hais tej kuab taug ntawd ntuav, nriaj ib ce, dias taub hau, ua voj ua vias, thiab qhov muaj plooj los yog tsis tshua pom kev zoo.
Nws tau qhia rau SBS News tias cov kev kub siab maj ceev nrooj kiag tam sim ntawd yog tej yam tseem ceeb heev uas tsim nyog ua yog yus xav tias tej zaum tau muaj tej teeb meem kuab taug methanol no rau yus lawm.
Nws hais tias "Yog tias yus tsis nrhiav kev kho mob raws li qhov tsim nyog kho pab kho yus, ces cov kev raug kuab taug lom no yuav ua rau yus dig muag, ua rau muaj teeb meem rau yus tej raum thiab tej khoom nruab nrog cev tsis ua hauj lwm, thiab yuav ua rau muaj tej kuab taug ntau heev hauv yus lub cev.''
Ranson tau tshab txhais tias cov kev kho ces cuam tshuam txog cov kev block cov alcohol dehydrogenase — uas yog ib co enzyme uas lim cov kuab taug methanol.
Nws tau hais tias ''Yeej muaj ib co tshuaj noj tiv thaiv kom cov kuab taug methanol no tsis txhob tawg hloov ua lwm yam taug. Los yog ua kom cov enzyme no ua lwm yam,''
"Ethanol ces kuj yog ib yam coj los kho cov xwm txheej raug kuab taug methanol vim cov alcohol dehydrogenase no yeej siv tau hauj lwm zoo dua rau cov kuab ethanol dua cov methanol. Txawm tias tej enzyme ua hauj lwm zoo nrog ethanol, los tej kuab methanol ni kuj maj mam tawm ntawm tib neeg lub cev raws cov kev ua pa, kev tso zis los yog raws lwm txoj xub ke lawm thiab.''
Ranson tau hais tias cov kev tshem cov kuab taug methanol tawm ntawm (tib neeg) lub cev ua ntej yuav hloov ua lwm yam yog ib qho tseem ceeb tshaj plaws.
Nws hais tias "Yeej muaj tej xub ke ntau yam sib txawv los kho uas kuj yuav kho tau sib txawv thiab, tab sis yog yus hau tej kuab taug methanol tsawg npaum li cas thiab yus mus kho kom ntxov npaum li ntawd ces yuav yog tej yam yuav pab tau zoo dua thiab.''
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab mloog tau los yog caum
