Lim tiam dhau los ces tau muaj zej zog pej kum haiv tej chaw nthuav xov xwm tau tshaj tawm tias tau muaj ib txhia neeg txawv teb chaws uas tau tas sim neej thiab raug mob sab heev tej zaum kuj yuav muaj kev cuam tshuam nrog tej dej cawv lawv haus uas paug tsuas methanol ntawm Vang Vieng uas yog qhov chaw uas neeg txawv teb chaws nyiam mus ncig heev.
Nom tswv Meskas tau qhia tias muaj nws ib tug neeg tas sim neej, Denmark qhia tias muaj nws 2 tug neeg tas sim neej thiab muaj Australia ob tug ntxhais raug mob sab heev, ib tug tas sim neej lawm hos ib tug tseem raug kho ntawm Thaib ib lub tsev kho mob. Askiv los yeej tau qhia meej tseeb lawm tias muaj nws ib tug neeg tas sim neej lawm thiab. Ces tam sim no thiaj ua rau muaj 5 tug neeg txawv teb chaws cuam tshuam nrog tej xwm txheej neeg haus cawv ntawm Vang Viang.
Australia tus thawj pwm tsav Anthony Albanese thiaj tau hais rau lub cej tseem teb lus nug hauv tsev tsoom fwv tias Bianca Jones uas yog ib tug ntxhais hluas neeg Australia cov kev tas sim neej ''yog ib co kev puas tsuaj loj, thiab yog ib tug dab ntub phem thiab cov kev txhawj xeeb tshaj plaws rau txhua tus niam txiv uas tsis tsim nyog ntsib.''
Tau muaj ib tug kis ntawm Nplog lub embassy ntawm tuam cheeb Canberra teb chaws Australia qhia rau SBS Hmong tias ''Yog tham txog tej xwm txheej no, ces peb lub embassy yeej tau koom tes nrog tej tuam chav muaj feem cuam tshuam hauv Nplog teb. Thiab tseem tab tom txheeb tej xov xwm no. Yog tias peb tau tej xov xwm meej tseeb thiab ntxaws lawm, ces peb mam li tshaj tawm rau sawv daws paub.''
Ua ke no los ntiaj teb lub koom haum noj qab haus huv (World Health Organistion -WHO) hauv Nplog teb kuj tau qhia txog nws tus kis cov ncauj lug rau SBS Hmong tias ''Peb yeej paub txog ntau cov kev cej luam tias muaj ib cov neeg tej zaum yuav raug kuab taug (Methanol) ntawm Vang Vieng, thiab tej xov xwm phom sij uas tau ua rau tej neeg no tas sim neej. Peb lub koom haum WHO no yeej tab tom pab Nplog lub tuam chav tswj dej num noj qab haus huv thiab nom tswv tej tuam chav los tshuaj ntsuam xyuas tej xwm txheej no.''
Ces ntau lub teb chaws suav teb chaws Australia lub tuam chav tswj dej num txawv teb chaws thiab lagluam (Department of Foreign Affairs and Trades - DFAT) thiaj tau muaj ib co kev ceeb toom kom tej neeg Australia uas mus ncig hauv Nplog teb yuav tsum tau xyuam xim ceev faj rau cov kev haus dej haus cawv tsam tsis tau txais kev nyab xeeb rau lawv txoj kev noj qab haus huv.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
