Australia ram chung kong theih le hngalh chap a duhmi hna nih Australia an rak tlawn tikah zapi nih thuk hlei khun in an kherhlai mi le an lungthin ah a cam khun mi cu Ram ngeitu miphun he pehtlaihnak a ngei mi, an nunphung, an sining le nunkhua an sakning va hmuh ve le an sin va thutder kha khualtlawngmi nih an duh ngaingai mi a si.
Nicole Mitchel cu Discover Aboriginal Experiences (DAE) ah hruaitu pakhat dirhmun in rian a tuan cuahmah lio mi, Australia ram ngeitu miphun hna konglam mi tampi nih an theih khawh nak hnga thawngpang zamhtu dingah rian an pek mi a si. Khualtlawngmi nih Ram ngeitu miphun le an ram kong hi theihchap le cawn an duh ngaingai tiin Nicole Mitchell nih a chim.
“2023 kum rel chungah khan Australia ram ngeitu miphun hna konglam theih chap duh ruah le an konglam cawn duh ah Australia a rak tlawngmi 969,000 tluk an si,” tiin Michell nih a chim chap.
A peh rih mi cu “kam khat lei in kan I lawmh ngai mi pakhat cu 2019 in 2023 kar ah ram chung mipi chungin ram ngeitu miphun kong hlathlai duh a rak kan fuhpanh mi hi zatuak 22% tluk in an karh. Chim duh mi cu nih ram ngeitu miphun hna an konglam theih chap duh ah ram chung mipi 1.185 million nih a rak kan funhpanh tinak a si hnga.”
DAE cawlcanghnak tangah, khual zohkhentu dingin rian a tuan mi hi Aboriginal silole Torres Strait Islander mi an si.
Jarramali Rock Art Tour Credit: The Edit Suite/Tourism Australia
Tuanbia ngeitu cu anmah an si caah, a chim zong anmah rian a si
Juan Walker cu Kuku Yalanji miphun a si i Queensland chaklei ah nunphung cawnnak (Walkabout Culture Advantures) a tuah.
“Keimah pumpak ruahnak chim ko ninglaw Aboriginal miphun i an nunphung le an tuanbia cawn na duh ahcun, Aborignal mi kha va tong hna anmah nih an konglam cu tha tein an in chimh khawh lai, an ram kong theih na duh zongah anmah nak in a theih deuh hlei ding an um ti lo.”
Hi ram le vawlei ah kum thong tampi in khua a sa cangmi miphun an si tikah anmah sin dah ti lo, aho sin hlei in an ram le vawlei kong cawn ding a um ti lo.Juan Walker, Walkabout Culture Adventures
Walker nih khualtlawngmi hna cu an ram kong cawnpiak pah in Port Douglas pawngah a um mi Daintree tuupi chungah a luhpi hna. Daintree tuupi hi kum nuai 135 tluk a si cang.
Thingkung ram hna umtuning, tuanbia, nunphung le minung caah san a tlai mi kokek thil pawl hna kha a cawn piak hna, cun ram tangah a thangmi ei khawh mi rawl hna kha khual pawl a teh, a ei ter hna.
Ei din ti rawl hi khual donnak caah a tha bik mi a si.
Khualtlawng mi nih Aboriginal sin an tlawnlennak kong an chim tikah ei din rawl kong hi chim loin an um kho lo. A hlei in ramlak ah thangmi ei din thingthei pawl kha a thawtnam an caah a phun dang ngaingai I an thinlung ah a cam khun.
Tourism Australia recognises the growing interest in First Nations tourism as travellers seek out authentic and culturally immersive experiences.
Kan ramkulh tuanbia hunnak
Australia hmunhma dawhdawh pawl zoh khawhnak lam tampi a um. Tilawng in khua cawn ding, vanlawng in khua cuanhnak, le mawtaw in khua dawh cuanh khawhnak hmunhma a tampi. Cupin ah, riahbuk ser khawhnak hmun rem zong a um i, khual tlunnak hmun rem tampi zong an um fawn.
Ram chung National Park cheukhat ah a hlun bik mi lung zuk suai mi an um hna. A cheukhat cu kum 20,000 tluk a hlun mi an si cang. Ram ngeitu miphun nih thil umtuning, tuanbia le nunphung konglam fiang tein an chim phuan khawh.
Thlanglei ramkulh chung I Kakadu National Park cu nunphung le tuanbia in a khat, Vawlei cung khuaruahhar ro thil cazin ah a tel mi a si. Lungpang ah zuk a suai mi tampi an um.
Western Australia cu lung zuk suaimi si hna seh, ti sur, rili kam le ram sa an tlawnlennak hmunhma a si.
Hlanlio ti dil ro, Lake Mungo cu vawlei cung ah a biapi bikmi thil hlun hlathlainak hmun pakhat a si. Thil hlun, tuanbia kherhlai a huam mi na si ahcun, a phu zongin nan kal kho, a hmun ah riah buk I ser khawh zong a si.
Nunphung he a pehtlaimi Hmuhtonnak
Khualtlawngmi hna cu kut in tuaimi, I telnak hmuhtonnak ah an I hnim tawn tiah Mitchell nih a ti.
Zuksuai cawnnak hmun zongah na tel kho, asilole Sydney chaklei Warami ah a um mi thetse tlang cung saikal cit hmun ah nunphung kong na cawng kho.Nicole Mitchell, Discover Aboriginal Experiences
Nan hmuhtonmi thil kip kha ramngeitu miphun nih an sunlawiter, sullam an ngeihter caah na thinlung chungah zungzal in a cam.
Great Golf Courses of Australia aboriginal experience
Khuachung mibu nih Khuatlawng sin in an hmuhmi hlawknak
Ramchungmi hruaimi khualtlawnnak nih khuachung mibu caah tangka a chuahpi lawng si loin nunphung a hmunmi zong a bawmh.
Maruku Arts nih Central Australia ram i a hlatnak khuate in zukcawl thiam 900 a fonh hna. Khuami hna cu an zukcawl an zuar lio ah, riantuannak le nunphung khualtlawnnak an tuah lio ah, le ramcar hlanlio phunglam an i hrawm lio ah ramchung ah an um kho, tiah Nicole Mitchell nih a fianter.
“An umnak hmun Pitjantjara holh in an tuah, cucaah cu holh cu kilven awk zongah a bawmh,” tiah Ms Mitchell nih a lar ngaimi dot-painting riantuannak kong a chim.
Juan Walker nih a nunphung khualtlawnnak nih khual pawl kha Aboriginal tuanbia le amah chungkhar tuanbia kong a cawnpiak hna, cu vialte cu ramchung ah a um lio ah a si tiah a ti.
“Cucaah riantuannak caah hmun dang i ṭhial a hau nakin, ka chungkhar he naih tein um khawhnak, ka mi hna he naih tein um khawhnak le ram he pehtlaihnak ngeih khawhnak a ka pek. Ka rothil kong mipi hrawmh le cawnpiak in le mipi nih an tlawnnak vawlei, rili le ti lam hna upatnak ngan deuh pek in nunnak hmuhnak lam tha taktak a si.”
As a First Nations Storyteller, Bundjalung man Kyle Ivey guides visitors on a climb of the Sydney Harbour Bridge as part of the Burrawa Aboriginal Climb Experience. Credit: davidf/Getty Images
Khuapi chungah khua an sakning
Ramchung miphun nunphung cu hmun hlapi lawng ah a um tiah ruahnak a um tawn, asinain kan khuapi laifang zongah tuanbia rumro na tong ve lai.
First Nations Storyteller pakhat a si bantukin, Bundjalung pa Kyle Ivey nih Burrawa Aboriginal Climb Experience ah aa telmi Sydney Harbour Bridge kai lio ah khual pawl a hruai hna.
Reconciliation tlang kai bantuk in a tlang kai khualtlawnnak cu kalpi aa zuam tiah a ti.
“Tlanglawng lam cung in ka kal lio ah ka dir lai i tuanbia chim a fawiter deuhmi thil pawl kha ka langhter lai.”
Tlang kai lio ah Mr Ivey nih cuka hmun i a ummi First Nations mi hna caah a biapi mi hmunhma pawl a langhter. A pupa hna nih ram ah zeitindah an rak um ti le European khuasa mi an rak phanh tikah aa thlengmi an rak zoh ning kong a chim.
A hmuhmi cu amah ca lawng si loin Australia ram i nunphung aa dangmi phu 500 leng caah porhlawtnak lungput a si.
“Ka philh khawh lonak ding caah ka caah lam tha zong a si. Hmailei ah hnuh le tam deuh hngalh ka duhter, mibu tam deuh telh chih le min ka hrawk lo ti hngalhter. Lungtlinnak a pemi hmuhtonnak a si.”
Melbourne khuapi laifang ah Yarra tiva kam ah lamhruainak Birrarung Wilam kalnak ah Aboriginal zuk suaimi thilri pawl zoh awkah naa tel kho.
Caan a hung rauh deuh tikah vawlei cu zeitindah aa thleng timi le khuachung Kulin miphun hna i pumhnak hmun a sinak a sullam kha na theih lai.
Yalinguth, cu Melbourne ah pekmi Aboriginal khualtlawnnak hmuhtonnak dang pakhat a si. Lam pakhat cu Yarra pawng ah a si i Fitzroy zongah kalnak a um
Cun Tasmania ah nipaluna/Hobart ah Aboriginal nih an hruaimi khualtlawnnak kha na hmuh khawh. Minute 90 chung kalnak le lemcawnnak nih khuachung palawa mi hna kong a muimi le a tthawngmi tuanbia a chim.
Petermann, Northern Territoty / Australia - December 8, 2019: A tour guide walked through the safety precautions of hiking into Kata Tjuta near a tent Credit: alanlim97/Getty Images
First Nations tourism driving reconciliation
Nicole Mitchell nih a chimmi cu, hi bantuk ramchungmi nih an hruaimi hmuhtonnak hna thawngin, ramchungmi le ramchungmi a si lomi hna nih nunphung hngalhnak an i hrawm.
“Remdaihnak caah a fekmi mawngtu zong a si,” tiah a ti.
“Australia ram i nunphung phunphun kong kha mi nih an cawn. An tuanbia chim khawhnak ding caah zatlangbu sinah [cun] na onh hna. Lamhruaitu pakhat nih a ka chimh taktakmi cu, ‘nunphung kilven awkah nunphung kan i hrawm a hau’.”
Subscribe or follow the Australia Explained podcast for more valuable information and tips about settling into your new life in Australia.
