کھانا بنانے سے لے کر ’کے ٹو‘ چوٹی سر کرنے تک کا سفر

یہ کہانی ہے ایک ایسے ماونٹین کلائمبر کی جو تین دن تک برفانی طوفان سے لڑتا رہا، شدید سرد موسم سے فراسٹ بائٹ ہوا اور پاؤں کا انگوٹھا تک کٹ گیا لیکن حوصلے جوان رہے اور منزل تک پہنچ گئے، گللگت کے علاقے نگر سے تعلق رکھنے والے کلائمبر واجد اللہ نے ایک نہیں بلکہ پاکستان کی 8000 میٹر سے بلند تین چوٹیاں بھی سر کرلیں۔

واجد اللہ کا کلائمبنگ کا سفر انتہائی دلچسپ اور مشکلات سے بھر پور رہا، واجد اللہ پاکستان میں براڈ پیک، نانگا پربت اور کے ٹو کی چوٹیاں سر کرنے کیلیے آنے والے انٹرنیشنل کلائمبرز کیلیے کھانا بنانے کا کام کرتے تھے، بین الاقوامی کوہ پیماؤں کو دیکھتے دیکھتے واجد اللہ کے اندر بھی یہ خواہش پیدا ہوئی کہ وہ بھی ان پہاڑوں کو سر کرسکتے ہیں، اسی خواہش کو مقصد بنا کر انھوں نے یہ سفر شروع کیا جو آج تک جاری ہے۔

واجد اللہ نے ایس بی ایس اردو سے خصوصی گفتگو کرتے ہوئے اپنی خوشگوار یادیں تازہ کیں، کوہ پیما واجد اللہ کہتے ہیں بچپن سے پہاڑوں پر جانے کا شوق تھا، روزگار نہیں تھا، خاندان کو سپورٹ کرنے اور اخراجات پورے کرنے کیلیے انٹرنیشنل کلائمبرز کیلیے کھانا بناتا اور ان کی معاونت کرتا تھا، پہلی بار ادھار شوز اور کٹ مانگ کر چوٹی سر کی، ابتدا میں بہت زیادہ مشکلات پیش آئیں لیکن وقت گرزنے کے ساتھ ساتھ کامیابیاں بھی سمیٹنا شروع کردیں۔

واجد اللہ نے بتایا کہ کس طرح وہ اپنے دو غیر ملکی ساتھیوں کے ساتھ راکا پوشی کی چوٹی سر کرنے کےبعد واپسی کا سفر کر رہے تھے تو اچانک انھیں برفانی طوفان نے گھیر لیا، تین سے چار دن طوفان میں پھنسے رہنے کہ وجہ سے واجد اللہ اور ان کے دو ساتھیوں کو فراسٹ بائٹ اور ہائی ایلٹیٹیوٹ سیریبل انیڈما کا شکار بھی بنے اس کے باوجود ہم نے ہمت نہیں ہاری اور کامیابی کے ساتھ واپس اپنی منزل پر پہنچ گئے۔

پہاڑوں سے دوستی کرنے والے کوہ پیما واجد اللہ کہتے ہیں کلائمبنگ ایک مہنگا شوق ہے جس کے اخراجات برداشت کرنا ہر کوہ پیما کی بس کی بات نہیں، اسپانسر شپ نہ ہونے کے باعث پاکستان میں کلائمبنگ کا مستقبل خطرے میں دکھائی دے رہا ہے، واجد اللہ کے مطابق پاکستان میں کلائمبنگ کے پروفیشنل انسٹیٹیوٹ نہ ہونے کے برابر ہیں، پاکستان میں زیادہ تر کوہ پیما شوق نہیں بلکہ روزگار کیلیے یہ کام کر رہے ہیں، ان کوہ پیماؤں کو اگر اسپانسر شپس مل جائیں تو دنیا بھر میں پاکستان کا نام روشن کر سکتے ہیں۔

کوہ پیما واجد اللہ کے مطابق جب سے پاکستان میں ان پہاڑوں پر کلائمبنگ شروع ہوئی ہے پہاڑوں کی صفائی ستھرائی کیلیے کوئی اقدامات نہیں کیے گئے، کہیں پہاڑوں پر ڈیڈ باڈیز پڑی ہیں تو کہیں رسیاں، آکسیجن سلینڈرز اور ٹینٹ موجود ہیں، کلائمبنگ کیلیے جانے والے کلائمبرز بھی کوڑا کرکٹ ان پہاڑوں پر چھوڑ کرآجاتے ہیں، قوانین بنا کر کلائمبرز کو پہاڑوں کی صفائی کا خیال رکھنے کا پابند کیا جانا چاہیے۔

واجد اللہ کہتے ہیں 8000 میٹر سے بلند دنیا کی 14 چوٹیاں سر کرنے کی خواہش ہے، پاکستان کی 8 ہزار میٹر سے بلند مزید دو پہاڑیاں سر کرنے کے بعد بین الاقوامی سطح پر ان پہاڑوں کو سر کرنے کی منصوبہ بندی کر رکھی ہے۔