ཨོ་སི་ཊོ་ལི་ཡའི་མི་སེར་ལོ་ན་ ༡༨ ཡན་ཚོས་གནད་དོན་དེ་འོས་ཤོག་གི་ལམ་ནས་ཐག་གཅོད་བྱ་རྒྱུའི་ཐོབ་ཐང་ཡོད་པས། ཐེངས་འདིར་ SBS བོད་སྐད་སྡེ་ཚན་གྱི་དམིགས་བསལ་གྱི་ལེ་ཚན་འདིའི་ནང་། ཨོ་སི་ཊོ་ལི་ཡའི་ནང་མི་མང་དང་ལྷག་པར་དུ་བོད་མིའི་སྤྱི་ཚོགས་ཁྲོད་གནད་དོན་དེའི་སྐོར་གོ་རྟོགས་ག་ཚོད་ཅིག་བྱུང་ཡོད་མེད་དང་། གནད་དོན་དེར་རྒྱབ་སྐྱོར་ཡོད་མེད་སོགས་ཀྱི་ཐད་བཅར་འདྲི་དང་བསམ་ཚུལ་བསྡུ་ལེན་བྱས་ཡོད།
ཐེངས་འདིའི་འོས་བསྡུ་དེའི་ཐོག་ནས་མི་མང་ཚོས་དགོས་འདུན་འབོད་སྒྲ་དེ་རྩ་ཁྲིམས་ནང་འཁོད་རྒྱུ་རྒྱབ་སྐྱོར་ཡོད་ Yes དང་། མེད་ No གང་རུང་ལ་འོས་ཤོག་འཕེན་དགོས་ཀྱི་ཡོད་པ་དང་། མ་ཚད་གདོད་མའི་མི་རིགས་རྣམས་ཀྱི་དགོས་འདུན་གནད་དོན་དེ་རྩ་ཁྲིམས་ནང་བཀོད་ཀྱང་དེས་མ་འོངས་པར་དངོས་སུ་ཕན་ཐོགས་དང་འགྱུར་བ་ག་ཚོད་ཅིག་ཡོང་གི་ཡོད་དང་མེད་ཐད་སྤྱི་ཚོགས་ནང་གླེང་སློང་དང་དྲི་བ་མང་པོ་ཞིག་ཡོང་གི་ཡོད་པ་རེད།
ཨོ་སི་ཊོ་ལི་ཡའི་གདོད་མའི་མི་རིགས་ཨ་བྷོ་རི་ཇི་ནལ་དང་ཐོ་རི་སི་ཊི་གླིང་ཕྲན་གྱི་མི་རྣམས་ཀྱི་རིག་གཞུང་དང་ཡུལ་སྲོལ་གོམས་གཤིས་སྲུང་སྐྱོབ་དང་། ཤེས་ཡོན། འཕྲོད་བསྟེན་འཚོ་བ་ཡར་རྒྱས་ཆེད་འཆར་གཞི་དང་ལག་བསྟར་བྱེད་པར་གཙོ་བོར་ཁོང་ཚོ་རང་ཉིད་ཀྱི་མི་སྣ་ལས་གྲུབ་པའི་ཚོགས་ཆུང་ཞིག་གཞུང་དང་གྲོས་ཚོགས་ནང་ཆེད་འཛུགས་བྱེད་པར། ཁོང་ཚོའི་དགོས་འདུན་འབོད་སྒྲ་དེ་རྩ་ཁྲིམས་ནང་བཅུག་དགོས་མིན་ཐད་ཐེངས་འདིར་མི་མང་འོས་བསྡུ་བྱ་རྒྱུ་ཡིན་པ་རེད།
གདོད་མའི་མི་རིགས་ཀྱི་དགོས་འདུན་འབོད་སྒྲ་དེ་འདྲ་ཞིག་རྩ་ཁྲིམས་ནང་བཀོད་ཐུབ་ཚེ། དེས་གདོད་མའི་མི་རིགས་རྣམས་ཀྱི་མ་འོངས་མདུན་ལམ་དང་འཚོ་བ་ལ་ཕན་ཐོགས་ངེས་ཅན་ཡོང་རྒྱུ་མ་ཚད། དེ་ནི་ཨོ་སི་ཊོ་ལ་ཡ་ལུང་པ་འདིའི་མི་རིགས་དང་པོ་རྣམས་ལ་ཆེ་མཐོང་དང་ཐོབ་ཐང་དམིགས་བསལ་ཞིག་ཀྱང་ཡིན་དགོས་པའི་བསམ་ཚུལ་བཤད་མཁན་རིགས་ཅིག་དང་། ཡང་ཁག་ཅིག་གིས་རྩ་ཁྲིམས་ནང་དེ་འདྲ་ཞིག་བཀོད་ཐུབ་ཀྱང་དོན་དངོས་སུ་གདོད་མའི་མི་རིགས་རྣམས་ཀྱི་འཚོ་བ་དང་མ་འོངས་མདུན་ལམ་ལམ་འགྱུར་བ་དང་དམིགས་བསལ་ཕན་ཐོགས་གང་ཡང་ཡོང་གི་མེད་པས་མ་ཚད། དེས་ཨོ་སི་ཊོ་ལི་ཡའི་མི་མང་སྤྱི་ཡོངས་ཀྱི་མ་འོངས་མདུན་ལམ་ལ་གནོད་སྐྱོན་ཐེབས་རྒྱུ་མ་ཚད། ད་ཐེངས་ཀྱི་འོས་བསྡུ་འདི་ནི་ཨོ་སི་ཊོ་ལི་ཡའི་གཞུང་འཛིན་ཚོགས་པས་མ་འོངས་བསྡུ་ཆེད་ཆབ་སྲིད་དང་དམིགས་ཡུལ་བཟུང་ཡོད་སྐོར་སོགས་ཕན་ཐོགས་དང་རྒྱབ་སྐྱོར་ཡོད་མེད་སོགས་ཀྱི་བསམ་ཚུལ་སྣ་ཚོགས་ཤིག་ཡོང་གི་ཡོད་པ་རེད།
