ཁྱེད་རང་གི་རླངས་འཁོར་ཕྱིར་འཚོང་བྱ་འཆར་ཡོད་ཚེ། རླངས་འཁོར་གྱི་བདག་པོའི་མིང་སྒྱུར་སོགས་ཁྲིམས་མཐུན་དག་གཙང་ཡོང་བར་བརྒྱུད་རིམ་ཁག་ཅིག་ཤེས་དགོས་པ་གལ་ཆེན་པོ་ཆགས་ཡོད།
སྤྱིར་ཨོ་སི་ཊོ་ལི་ཡའི་རྒྱལ་ཡོངས་སུ་རླངས་འཁོར་རྙིང་པ་བཙོང་རྒྱུའི་གྲངས་འབོར་ག་ཚོད་ཡོད་མེད་ཀྱི་ཡིག་ཆ་བསྡུ་རུབ་བྱེད་པའི་ཆོག་མཆན་མེད་ཀྱང་། རོབ་རྩིས་བྱས་པ་ཡིན་ན་ཁྲོམ་རའི་ནང་རླངས་འཁོར་རྙིང་པ་བཙོང་རྒྱུའི་གྲངས་ཚད་ནི་རླངས་འཁོར་གསར་པ་ལས་ལྡབ་གསུམ་ཙམ་མང་བ་ཆགས་ཀྱི་ཡོད་པ་རེད།
རླངས་འཁོར་འཚོང་མཁན་ཞིག་ཡིན་པའི་ཆ་ནས། རླངས་འཁོར་ཉོ་མཁན་ཚོར་དམིགས་འབེན་བཟུང་དགོས་པ་རེད། ཡིན་ན་ཡང་ཁྱེད་རང་གིས་རླངས་འཁོར་བྲིན་འཚོང་བྱེད་པའི་གོ་རིམ་ཇི་ལྟར་བརྒྱུད་དགོས་མིན་ཤེས་དགོས།
ཁེ་ཐི་ཊོ་སན་ཌི་ Kathy Townsend ལགས་ནི་ནིའུ་སའོ་ཐི་ཝལ་མངའ་སྡེའི་ནང་རླངས་འཁོར་ཚོང་གཉེར་ཁང་ཞིག་གི་འགན་འཛིན་རེད།
ཁོ་མོས་མི་ཚོས་རླངས་འཁོར་བཙོང་འདོད་ཡོད་ཚེ་ཐོག་མའི་ཐག་གཅོད་དེ་ཁོང་ཚོས་རླངས་འཁོར་དེ་གང་འདྲ་བྱེད་ནས་བཙོང་རྒྱུ་ཡིན་མིན་ཐག་གཅོད་དགོས་པ་རེད། དེ་ལ་འདེམ་ག་ཁ་ཤས་ཤིག་ཡོད་པ་རེད། རླངས་འཁོར་དེ་ཕྱིར་འཚོང་ཚོང་ཁང་དང་། ཡང་ན་གོང་གང་མཐོར་འཚོང་མཁན་ Auciion House བརྒྱུད་པའམ། ཡང་ན་མི་ཞིག་ལ་ཁ་ཐུག་བཙོངས་བ། ད་དུང་དྲ་ལམ་ནས་རླངས་འཁོར་ཕྱིར་འཚོང་བྱེད་སའི་སྡིང་ཆ་མང་པོ་ཞིག་ཡོད་པ་རེད་ཅེས་གསུངས་འདུག
རླངས་འཁོར་ཕྱིར་འཚོང་ལྟེ་གནས་བརྒྱུད་ནས་བཙོང་བ་ནི་རྒྱུན་ལྡན་གྱི་འགྲོ་སྟངས་ཤིག་རེད། ཁོང་ཚོས་རླངས་འཁོར་ཕྱིར་འཚོང་གི་བརྒྱུད་རིམ་ཆ་ཚང་འགན་འཁུར་བླངས་བཞིན་ཡོད། ཡིན་ན་ཡང་ཁྱེད་རང་གི་རླངས་འཁོར་དེ་རིན་གོང་མཐོ་ཤོས་དེ་རྒྱག་ཆོག་གི་མེད་པ་རེད།
དཔེར་ན་ཁྱེད་རང་གིས་རླངས་འཁོར་དེ་བཙོང་མཁན་ཕྱིར་འཚོང་ཚོང་པ་ Dealership བརྒྱུད་ཚེ་ཁོང་ཚོས་རླངས་འཁོར་འཚོང་སྐབས་དུས་རྒྱུན་ཁེ་འབབ་ཀྱི་དམིགས་ཚད་ཅིག་བཟུང་ཡོད། ཡང་གལ་སྲིད་ཁྱེད་རང་གི་རླངས་འཁོར་འཚོང་མཁན་དཔེར་ན་རིན་གོང་གང་མཐོར་བྱེད་ནས་འཚོང་མཁན་ Auction House ལྟར་བུ་ཞིག་བདམས་ཚེ་ཁོང་ཚོས་རླངས་འཁོར་བཙོངས་རྗེས་མ་རྩ་རིན་འབབ་ལས་བརྒྱ་ཆ་ ༡༠ ནས་ ༡༥ བར་འཁྱེར་འགྲོ་བཞིན་ཡོད་པ་རེད་ཅེས་ལྕམ་ཊོན་སན་ཌི་ Ms. Townsend ལགས་ཀྱིས་འགྲེལ་བརྗོད་གནང་འདུག
ཁྱེད་རང་གིས་མི་སྒེར་ཞིག་ལ་ཁ་ཐུག་བཙོང་ཚེ་ཁྱེད་ཀྱིས་རླངས་འཁོར་གྱི་ཐོ་འགོད་ཡིག་ཆ་སོགས་གྲ་སྒྲིག་བྱེད་དགོས་ཀྱི་ཡོད་པ་རེད།
ཁོ་མོས་རླངས་འཁོར་ཉོ་མཁན་གྱིས་རླངས་འཁོར་ཐོ་འགོད་ཡིག་ཆ་སྟེང་ནས་ཁྱེད་རང་རླངས་འཁོར་དེའི་བདག་པོ་ངོ་མ་ཡིན་མིན་ཁྱེད་རང་གི་རླངས་འཁོར་ཁ་ལོའི་ལག་འཁྱེར་ལ་ལྟ་བ་དང་། རླངས་འཁོར་གྱི་ཡིག་ཆ་ཞིབ་ཕྲ་ལྟ་བར་ཁོང་ཚོས་ VIN དང་ཡང་ན་འཕྲུལ་སྒམ་གྱི་ཨང་གྲངས་ལ་ཞིབ་འཇུག་བྱེད་སྲིད། ཨང་གྲངས་དེ་དག་རླངས་འཁོར་ཐོ་འགོད་ཀྱི་ཡིག་ཆའི་ཐོག་ལ་ཡོད་པ་རེད། མ་ཚད་ད་དུང་ཁོང་ཚོས་རླངས་འཁོར་དེའི་ཐོག་ནས་བུན་ལོན་ཆད་ཡོད་མེད་ཀྱང་བལྟ་སྲིད་པ་རེད་ཅེས་གསུངས་འདུག
ཁྱེད་རང་ཉིད་ཀྱིས་རང་གི་རླངས་འཁོར་ཚོང་སྒྱུར་བྱ་རྒྱུ་ཡིན་མིན་བརྡ་ཁྱབ་སྤེལ་ཚེ། རླངས་འཁོར་གྱི་རྒྱུ་སྤུས་དང་གནས་བབས་གང་འདྲ་བསྡད་ཡོད་མེད་དྲང་པོ་གསལ་བཤད་དགོས་རྒྱུ་གལ་ཆེན་པོ་ཆགས་ཡོད།
ཀཱ་རཱ་ཧྥེ་ལཱ་ Kara Faella ལགས་ནི་དྲ་ཐོག་རླངས་འཁོར་ཚོང་གཉེར་ཁང་ཞིག་གི་དོ་དམ་པ་ཞིག་རེད།
ཁོ་མོས་རླངས་འཁོར་བཙོང་འཆར་ཡོད་ཚེ། བརྡ་ཁྱབ་ནང་རླངས་འཁོར་དེའི་གནས་བབས་དང་ལོ་རྒྱུས་འགྲེལ་བརྗོད་ནང་སྦས་གསང་མེད་པར་ཕྱི་གསལ་ནང་གསལ་བཀོད་དགོས་པ་རེད། དེས་རླངས་འཁོར་ཉོ་མཁན་ཞིག་སླེབས་ནས་ཁོང་གིས་བརྟག་དཔྱད་བྱེད་སྐབས་དཀའ་རྙོག་མི་ཡོང་བར་ཕན་ཐོགས་ཡོད་ཅེས་གསུངས་འདུག
རླངས་འཁོར་ཉོ་མཁན་ཚོས་རླངས་འཁོར་དང་གོང་ཚད་སྐོར་སྐད་ཆ་འདྲི་སྐབས་ཁྱེད་ཀྱིས་ལན་དུས་ཐོག་ཏུ་རྒྱག་ཐུབ་ཚེ། དེས་ཁྱེད་རང་གི་རླངས་འཁོར་མགྱོག་པོ་འཚོང་བར་ཕན་ཐོགས་ཡོད།
ལྕམ་ཧྥེ་ལཱ་ Ms Faella ལགས་ཀྱིས་རླངས་འཁོར་གྱི་གོང་ཚད་མ་བཟོས་གོང་ཞིབ་འཇུག་བྱ་རྒྱུ་གལ་ཆེན་ཡིན། གོང་ཚད་རན་འཚམ་བྱུང་ཚེ་དེས་རླངས་འཁོར་ཉོ་མཁན་གྱི་དོ་སྣང་སྤྲད་པར་ཕན་ཐོགས་ཡོད་ཅེས་གསུངས་འདུག
ཁོ་མོས་ང་ཚོས་ཤེས་གསལ་ལྟར་རླངས་འཁོར་ཉོ་མཁན་ཚོས་ཀྱང་རླངས་འཁོར་མ་ཉོ་གོང་ལ་ཞིབ་འཇུག་བྱེད་ཀྱི་ཡོད། ཁྱེད་རང་གི་རླངས་འཁོར་དེ་བཙོང་རྒྱུ་གཏན་འཁེལ་ཡིན་ཚེ་གོང་ཚད་ཀྱང་ཁྲོམ་རའི་རིན་གོང་ལྟར་ཚད་ལྡན་འཇོག་དགོས་ཀྱི་ཡོད་པ་རེད། གོང་ཚད་ཏོག་ཙམ་གཅོག་འཕྲི་བྱེད་ཐུབ་ཚེ་དེའི་རྗེས་ལ་ཚོང་ཤག་དང་གྲོས་མོལ་ཡང་བྱེད་ཆོག་གི་རེད་ཅེས་གསུངས་འདུག
ཨཱ་ལེ་སི་ Alex Forrest ལགས་ནི་ཨོ་སི་ཊོ་ལི་ཡའི་ནུབ་ཕྱོགས་ས་ཁུལ་ནང་ RAC ཞེས་པའི་རླངས་འཁོར་ཚོང་ལས་ཁང་ཞིག་གི་འགན་འཛིན་རེད། ཁོང་གིས་རླངས་འཁོར་མ་བཙོང་གོང་ལ་ཉམས་གསོ་བཟོ་བཅོས་བརྒྱབ་ཚེ་དེས་རིན་གོང་མཐོ་བ་ཁུག་པར་ཕན་ཐོགས་ཡོད་སྐོར་གསུངས་འདུག
ཁོང་གིས་དུས་རྒྱུན་ཁྱེད་རང་གི་ཚོང་ལས་ཁྱབ་བསྒྲགས་དེ་ཚོའི་ནང་མཐོང་གསལ་ལྟར་རེད། ཁྱེད་རང་གི་རླངས་འཁོར་མ་འཚོང་གོང་ལ་རླངས་འཁོར་ཉམས་གསོ་དང་། འཁོར་ལོ་དང་གློག་རྫས་སོགས་གསར་པར་བརྗེས་ཚེ། དེས་ཉོ་མཁན་གྱི་སེམས་ཁམས་ལ་ཁྱད་པ་ཆེན་པོ་བཟོ་བཞིན་ཡོད་པས། རླངས་འཁོར་གྱི་རིན་གོང་ཀྱང་ཡག་བ་ཁུག་ཐུབ་ཀྱི་རེད། མ་ཚད་ཉོ་མཁན་ཁག་ཅིག་གིས་ཁྱེད་ཀྱི་རླངས་འཁོར་ལ་སྐྱོན་དང་བཟོ་བཅོས་རྒྱག་དགོས་པ་འདི་དང་འདི་འདུག་པས་དེ་ཚོ་བཟོ་མ་ཚར་གོང་ལ་ཉོ་ཚོང་སྐད་ཆ་བྱ་རྒྱུ་མིན་ཡང་ཟེར་སྲིད་ཅེས་གསུངས་འདུག
མངའ་སྡེ་དང་ས་ཁུལ་མ་འདྲ་བར་གཞིག་པའི་རླངས་འཁོར་གཞན་ལ་བཙོངས་ནས་རྩིས་སྤྲོད་མ་བྱས་གོང་ལ་རླངས་འཁོར་བཟོ་མཁན་དེ་ཚོ་ལས་རླངས་འཁོར་དེ་སྐྱོན་ཆག་མེད་པའི་ཡིག་ཆ་དེ་འདྲ་ཡང་དགོས་ཀྱི་ཡོད།
ཁྱེད་རང་གི་རླངས་འཁོར་བཙོངས་ཚར་རྗེས། ལས་དོན་གལ་ཆེན་ཁག་ཅིག་ནི་ཁྱེད་རང་གི་རླངས་འཁོར་རྡབ་སྐྱོན་གུན་གསབ་འགན་ལེན་བཟོས་ཡོད་ཚེ་ཚོང་ལས་ཁང་དེ་ལ་འབྲེལ་བ་བྱེད་ནས་འགན་ལེན་གྱི་དུས་ཚོད་ལྷག་འདུག་ན་ཁྱེད་རང་གི་རླངས་འཁོར་རྗེས་མ་དེའི་ཐོག་ལ་བརྗེ་སྒྱུར་བྱེད་ཆོག གཞན་ཡང་ཁྱེད་རང་གི་མངའ་སྡེ་དང་ས་ཁུལ་དེའི་ནང་གཞུང་གི་རླངས་འཁོར་ཐོ་འགོད་ཁང་ལའང་འབྲེལ་བ་དང་རླངས་འཁོར་གཞན་ལ་བཙོངས་ཚར་བའི་སྙན་སེང་ཞུས་ནས་མིང་སྒྱུར་བྱེད་དགོས།
རླངས་འཁོར་བདག་པོའི་མིང་སྒྱུར་དང་། རླངས་འཁོར་གཞན་ལ་བརྒྱུད་སྤྲད་ཀྱི་བརྒྱུད་རིམ་ཡིག་ཆ་དུས་ཐོག་ཏུ་བཟོ་རྒྱུ་གལ་ཆེན་ཡིན།
ལྕམ་ཊོན་སེན་ཌི་ Ms Townsend ལགས་ཀྱིས་ནིའུ་སའོ་ཐི་ཝལ་མངའ་སྡེའི་ནང་ཆ་མཚོན་ན་མངའ་སྡེའི་ཞབས་ཞུ་ New South Wales Service བརྒྱུད་ཁྱེད་རང་གི་རླངས་འཁོར་གཞན་ལ་ཚོང་སྒྱུར་བྱས་ཚར་བ་བརྡ་ལན་དང་ཡིག་ཆ་འགྲོ་ལུགས་གཉེར་རྒྱུ་གལ་ཆེན་ཡིན། གལ་སྲིད་རྗེས་སུ་རླངས་འཁོར་དེ་ལ་ཆད་པ་དེ་འདྲ་ཕོག་སྐབས་ཁྱེད་རང་དང་འབྲེལ་བ་མེད་པ་ཆགས་ཀྱི་ཡོད། རླངས་འཁོར་ཚོང་སྒྱུར་སྐབས་ས་གནས་ཀྱི་ཁྲིམས་མཐུན་འགྲོ་སྟངས་ག་རེ་གཉེར་དགོས་མིན་ཞིབ་འཇུག་བྱ་རྒྱུ་དེ་གལ་ཆེན་པོ་ཆགས་ཀྱི་ཡོད་པ་རེད་ཅེས་ལམ་སྟོན་གནང་འདུག
