ཨོ་སི་ཊོ་ལི་ཡའི་ནང་གཞིས་སྤོ་བ་རྣམས་ལ་མཚོན་ན། ནང་མིའི་རྒྱབ་སྐྱོར་བྱེད་མཁན་མེད་པས་རྐྱེན་གྱིས་ཁོང་ཚོ་ལས་ཀ་འགྲོ་སྐབས་སུ་ནང་ལ་ཕྲུ་གྲུ་ལྟ་སྐྱོང་བྱེད་མཁན་མེད་པའི་དཀའ་ངལ་ཆེན་པོ་ཡོད། ཡིན་ན་ཡང་ཨོ་སི་ཊོ་ལི་ཡའི་ནང་བྱིས་པ་སྔོན་འགྲོ་ཤེས་ཡོན་སློབ་གསོའི་ལམ་ལུགས་དེའི་འོག ཕ་མ་རྣམས་ཀྱང་ཕྱིར་ལས་ཀ་དང་སློབ་སྦྱོང་ལ་འགྲོ་ཐུབ་ཀྱི་ཡོད་པ་རེད།
ཕྲུ་གུ་ཆུང་ཆུང་ཉིན་མོར་ལྟ་སྐྱོང་བྱེད་མཁན་གྱི་བུ་བཅོལ་ཁང་ནང་འཇོག་རྒྱུ་ནི་དར་ཁྱབ་ཆེ་ཤོས་ཀྱི་བདམ་ག་ཞིག་རེད། དེས་ཕྲུ་གུ་ཆུང་ཆུང་དང་ཕྲུ་གུ་དམར་འབྱར་དེ་ཚོའི་རིམས་འགོག་གི་ནུས་པ་ཡང་ཇེ་ཆེར་འགྲོ་བ་ལ་ཕན་ཐོགས་ཡོང་གི་ཡོད།
མ་ཚད་བྱིས་པ་སྔོན་འགྲོ་ཤེས་ཡོན་དེས་ཕྲུ་གུ་རྣམས་སློབ་གྲྭར་འགྲོ་བར་གོམས་གཤིས་དང་སྤྱི་ཚོགས་ཀྱི་འགྲོ་སྟངས་ཐད་ནས་ཀྱང་གྲ་སྒྲིག་ཀྱང་ཆགས་ཀྱི་ཡོད།
བྱིས་པ་ཆུང་ཆུང་དང་ཕྲུ་གུ་དམར་འབྱར་རྣམས་བྱིས་པའི་ལྟེ་གནས་སུ་སློབ་གསོའི་འགྲུལ་བཞུད་བྱེད་འགོ་བརྩམས་པ་དང་བསྟུན་ནས་ཁོ་ཚོའི་རིམས་འགོག་མ་ལག་ཀྱང་འགོས་ནད་འགོས་པའི་སྐྱེ་དངོས་ཕྲ་རབ་ལ་འཕྲད་པ་དང་བསྟུན་ནས་རིམ་བཞིན་འཕེལ་རྒྱས་འགྲོ་བཞིན་ཡོད།
ཇོ་ཊེས་སན་དྷུ་ Jyoti Sandhu ལགས་ནི་མེལ་བྷོན་ནང་བུ་བཅོལ་ཁང་ཞིག་གི་དགེ་རྒན་རེད།
ཁོ་མོས་ཕྲུ་གུ་རྣམས་ལ་མཚོན་ན་འཕྲོད་བསྟེན་གྱི་བདེ་འཇགས་ཆེ་ཤོས་ནི་ནང་ལ་རེད། ནང་ལ་མི་རྒན་པ་ཁ་ཤས་ལས་ཡོད་མ་རེད། ཡིན་ན་ཡང་བུ་བཅོལ་ཁང་དང་བྱིས་པ་ལྟེ་གནས་ཁང་དེ་ཚོའི་ནང་ཕྲུ་གུ་གཞན་དག་མང་པོ་ཞིག་ཡོད་པས་ན་ཚ་ཁག་ཅིག་ན་བ་ནི་རྒྱུན་ལྡན་ལྟར་བུ་ཞིག་རེད་ཅེས་གསུངས་འདུག
ཡང་ཁོ་མོས་བྱིས་པ་ལྟ་སྐྱོང་ལྟེ་གནས་དེ་འདྲར་ནད་རིགས་མང་ཆེ་བར་སེམས་ཁྲལ་ཆེན་པོ་བྱེད་མི་དགོས་ཀྱང་། འོན་ཀྱང་མཚམས་རེར་འགོས་ནད་ཚབས་ཆེན་དེ་འདྲ་འབྱུང་སྲིད་སྐོར་བརྗོད་འདུག
ཌོ་ཊར་ཨེ་མེར་སཱ་དྷུ་ལཱ་ Dr Amir Saeedullah གྲོང་ཁྱེར་མེལ་བྷོན་ནང་སྨན་པའི་ཕྱག་ལས་གནང་མཁན་ཞིག་ཡིན་པ་རེད། ཁོང་གིས་བུ་བཅོལ་ཁང་ནང་ཟླ་བ་དྲུག་ནས་ལོ་ལྔ་བར་གྱི་བྱིས་པ་རྣམས་ལ་སྨན་བཅོས་བྱེད་བཞིན་ཡོད།
ཁོང་གིས་ན་ཚ་ཁག་ཅིག་ནི་ལོ་གཅིག་གི་དུས་ཚིགས་ལ་གཞིགས་ནས་ཡོང་གི་ཡོད་པ་དང་། དེ་ཡང་དགུན་ཁར་མཚོན་ན་ཆམ་རིམ་གྱི་ནད་ཡམས་དང་། དབྱར་ཁར་མཚོན་ན་ཕོ་བའི་ན་ཚ་མང་པོ་ཐོན་གྱི་ཡོད་སྐོར་བརྗོད་འདུག
ཌོ་ཊར་ཨེ་མེར་སཱ་དྷུ་ལཱ་ Dr Amir Saeedullah ལགས་ཀྱིས་འགྲེལ་བརྗོད་ལྟར་ན། ཕྲུ་གུ་ ༡༠༠ ཡི་ནང་ཕྲུ་གུ་ ༢༠ ནས་ ༣༠ ཙམ་བར་ལ་རྟགས་པར་ན་ཚ་དེ་ཚོ་ན་བཞིན་ཡོད་སྐོར་བརྗོད་འདུག
སྨན་པས་རྒྱུན་དུ་འགོས་ནད་འདི་དག་ནི་རང་གིས་རང་ལ་ཚོད་འཛིན་བྱེད་པ་ཞིག་རེད་ཅེས་དང་། དེའི་གོ་དོན་ནི་དམིགས་བསལ་གྱི་སྨན་བཅོས་དེ་འདྲ་དགོས་ཀྱི་མེད་སྐོར་བརྗོད་འདུག
ཁོང་གིས་ཕྲུ་གུ་བརྒྱ་ཆ་ ༩༠ ཡས་མས་ཤིག་ལ་དུག་འགོག་སྨན་རྫས་ antibiotics སྤྲད་མི་དགོས་ཟེར། ཡིན་ན་ཡང་ཕ་མ་རྣམས་ལ་ཕྲུ་གུ་ལྟ་སྐྱོང་བྱེད་སྟངས་སློབ་གསོ་དགོས་མཁོ་ཆེ་བས་མ་ཚད། ནད་འབུ་སྔོན་འགོག་གཞན་ཁག་ཅིག་དཔེར་ན་ paracetamol དང་ ibuprofen རྣམས་སྤྱོད་རྒྱུ་གལ་ཆེན་ཡིན་སྐོར་བརྗོད་འདུག
ནེ་ཀེ་ཏ་ Nikita ལགས་ནི་ཕྲུ་གུ་ཐེངས་དང་པོའི་ཨ་མ་ཞིག་རེད། ཁོང་ལ་ཟླ་བ་ ༡༨ ཅན་གྱི་བུ་ཞིག་ཡོད་པས། ཟླ་བ་ཁ་ཤས་གོང་ཉིན་མོར་ལྟ་སྐྱོང་བྱེད་མཁན་གྱི་་བུ་བཅོལ་ཁང་ལ་བཞག་གི་ཡོད་འདུག
ཁོ་མོས་བདུན་ཕྲག་ཁ་ཤས་གོང་ལ་ངའི་བུ་བུ་བཅོལ་ཁང་ལ་ཕྱིན་པ་རེད། ཁོང་ལ་ཆམས་རིམ་ flu ཡི་ན་ཚ་ལྗིད་མོ་ཐེངས་གཉིས་ཕོག་པ་རེད། ཁོང་ནང་ལ་སླེབས་སྐབས་ཁོང་གི་ལག་པ་དང་རྐང་པ། ཁ། གཟུགས་པོ་ཡོངས་རྫོགས་ལ་ཆུ་འབུར་ཐོན་འདུག paracetamol དང་ ibuprofen ཡི་ཕན་ཐོགས་མི་འདུག་པས་སྨན་པས་ དུག་འགོག་སྨན་རྫས་ antibiotics ངོས་སྦྱོར་གནང་བྱུང་ཞེས་གསུངས་འདུག
ནེ་ཀེ་ཏ་ Nikita ལགས་ཀྱིས་གནས་སྟངས་དེའི་ཐོག་ནས་གདོང་ལེན་བྱེད་དགོས་པ་སྣ་ཚོགས་ཤིག་འབྱུང་སྲིད་སྐོར་བརྗོད་འདུག
ཁོ་མོས་གདོང་ལེན་བྱེད་དགོས་པའི་གནས་ཚུལ་ཁག་ཤོས་ཤིག་ནི། ཕྲུ་གུ་སྣ་ཆུ་ཙམ་འཛག་རུང་བུ་བཅོལ་ཁང་གིས་ཁ་པར་ཡང་དང་བསྐྱར་དུ་འབྱོར་ནས་ཕྲུ་གུ་ལེན་པར་ཤོག་ཟེར་བ་དེ་རེད། སྣ་ཆུ་འཛག་བ་ལྟར་བུ་ནི་གནམ་གཤིས་གྲང་མོ་སྐབས་སུ་རྒྱུན་ལྡན་གྱི་གནས་ཚུལ་ཞིག་རེད། ཕ་མ་ཞིག་གི་ངོས་ནས་བཤད་ན་ཕྲུ་གུར་བུ་བཅོལ་ཁང་ལ་བཞག་ཚར་བ་དང་ཡང་ཚུར་ལེན་པར་འགྲོ་དགོས་ཀྱིི་ཡོད་པ་རེད། དེ་ནས་སྨན་པས་ན་ཚ་མི་འདུག་ཅེས་སྨན་ཤོག་མ་སྤྲད་བར་དུ་ཡང་བསྐྱར་བུ་བཅོལ་ཁང་ལ་ཕར་བཞག་མི་ཆོག་པ་དེ་རེད་ཅེས་གསུངས་འདུག
ཕ་མ་ལས་ཀ་བྱེད་སར་ཡོད་སྐབས་སུ་བུ་བཅོལ་ཁང་ནས་ཕྲུ་གུ་ལེན་པར་ཤོག་ཅེས་སྐད་གཏོང་བ་ནི་ཕ་མར་དཀའ་ལས་ཁག་པོ་བཟོ་བཞིན་ཡོད།
མ་ཚད་ཕྲུ་གུ་ཡང་ཡང་ན་མཁན་ཞིག་ཡིན་ཚེ། སྦྱིན་བདག་དང་ཚོང་ལས་ཁང་ནང་ནས་ཕ་མ་རྣམས་ལས་ཀ་ཤོར་བ་སོགས་སེམས་ཁྲལ་ཆེན་པོ་བཟོ་བཞིན་ཡོད།
ནེ་ཀེ་ཏ་ Nikita ཡིས་གལ་སྲིད་ཕྲུ་གུ་ན་ནས་བུ་བཅོལ་ཁང་ལ་བཏང་མ་ཐུབ་ཀྱང་བུ་བཅོལ་ཁང་ལ་གླ་ཆ་སྒོར་མོ་མུ་མཐུད་སྤྲད་དགོས་ཀྱི་ཡོད་པ་རེད་ཅེས་གསུངས་འདུག
ཁོ་མོས་གསར་དུ་གཞིས་སྤོ་ལ་ཡོང་མཁན་ང་ཚོ་ལྟར་བུ་ལ་ཆ་མཚོན་ན་ཕྲུ་གུ་བུ་བཅོལ་ཁང་ལ་རིན་མེད་བཞག་པར་ཐོབ་ཐང་དེ་འདྲ་མེད་པས་གླ་ཆ་ཚང་མ་འབག་ཁུག་ནས་བཏོན་དགོས་ཀྱི་ཡོད་པ་རེད། ང་ཚོར་མཚོན་ན་ཉིན་རེར་ཨོ་སྒོར་ ༡༢༥ ཙམ་རེད། གལ་སྲིད་ཁྱེད་རང་གི་ཕྲུ་གུ་ན་ནས་བུ་བཅོལ་ཁང་ལ་མ་བཏང་རུང་གླ་ཆ་ཆ་ཚང་སྤྲད་དགོས་ཀྱི་ཡོད་པ་རེད། དེ་ནི་དཀའ་ངལ་ཐོལ་པ་ཞིག་ཆགས་ཀྱི་འདུག་ཅེས་གསུངས་འདུག
ཌོ་ཊར་ཨེ་མེར་སཱ་དྷུ་ལཱ་ Dr Amir Saeedullah ལགས་ཀྱིས་ནད་རྟགས་ཁག་ཅིག་ཐོན་ཚེ་ཕྲུ་གུ་ནང་ལ་བསྐྱལ་དགོས་ཀྱིི་ཡོད་པ་རེད་ཅེས་གསུངས་འདུག
ཁོང་གིས་ཕྲུ་གུ་སྣ་ཆུ་འཛགས་པ་ཙམ་གྱི་ངའི་བསམས་པར་ཕྲུ་གུ་ནང་ལ་བཏང་བ་ནི་རྒྱུ་མཚན་ལྡན་པ་ཞིག་རེད་བསམས་ཀྱི་མི་འདུག གལ་སྲིད་དཔེར་ན་ཚ་བ་འཕར་བ་དང་། གློ་རྒྱག་པ། ཕྲུ་གུ་ཆེ་བ་དེ་ཚོས་མིད་པ་ཚ་གི་འདུག་ཟེར་བ་དང་། ཕྲུ་གུ་མངོན་གསལ་དོད་པོས་ན་གི་ཡོད་པ་མཐོང་ཚེ་ཕྲུ་གུར་ནང་ལ་སྐྱེལ་དགོས་ཀྱི་ཡོད་པ་རེད་ཅེས་གསུངས་འདུག
ཁོང་གིས་ཉེན་ཁ་ཅན་གྱི་ནད་རྟགས་དཔེར་ན། ཚ་བ་ཨང་གྲངས་ ༣༩ ནས་ ༤༠ ཙམ་ལ་འཕར་བ་དང་། ད་དུང་སྣ་ཆུ་ཚད་མེད་བཞུར་བ་དང་། གྲོད་ཁོག་བཤལ་བ། སྐྱུག་པ། པགས་འབྲུམ་གསར་པ་ཐོན་པ་སོགས་བྱུང་ཚེ་སྨན་པས་ངེས་པར་དུ་བརྟག་དཔྱད་བྱེད་དགོས་ཀྱི་ཡོད་སྐོར་བརྗོད་འདུག
ལྕམ་སན་དྷུ་ལགས་ཀྱིས་ཕྲུ་གུ་བདེ་པོ་མེད་སྐབས་ངེས་པར་དུ་ནང་ལ་སྡོད་དགོས་ཀྱི་རྒྱུ་མཚན་འགྲེལ་བརྗོད་གནང་འདུག
གལ་སྲིད་ཕྲུ་གུ་ན་གི་ཡོད་ཚེ་ཕ་མ་ཚོས་ལམ་སང་ཕྲུ་གུ་སྨན་པར་བསྟེན་གཏུགས་དང་། སྨན་ཁང་ལ་འཁྱེར་དགོས་པ་ལས། ན་ནས་གང་འཚམ་སོང་ནས་དུས་འགྱང་ཕྱིན་ཚེ་རྗེས་སུ་ཕྲུ་གུ་སྨན་ཁང་ནང་སྡོད་དགོས་འཁེལ་སྲིད་ལ་ན་ཚ་དྲག་པར་དུས་ཡུན་རིང་པོ་འགོར་སྲིད་ཅེས་གསུངས་འདུག
ཁོ་མོས་བུ་བཅོལ་ཁང་ནང་ཕྲུ་གུ་ན་བ་ནི་གཙོ་བོར་བུ་བཅོལ་ཁང་དེའི་ནང་གི་མཐུན་རྐྱེན་དང་། ཕྲུ་གུ་ལྟ་སྐྱོང་བྱེད་སྟངས་ལའང་རག་ལུས་ཡོད་སྐོར་བརྗོད་འདུག
ཆམས་རིམ་སོགས་རིམ་ནད་དེ་འདྲ་ཕྲུ་གུ་ཕན་ཚུན་མི་འགོས་ཆེད། ཕྲུ་གུ་རྣམས་ཀྱི་ལག་པ་ཡང་ཡང་བཀྲུ་དགོས་པས་མ་ཚད། ཕྲུ་གུ་ཕན་ཚུན་བར་ཐག་རིང་ཙམ་འཇོག་དགོས་སྐོར་བརྗོད་འདུག
ཌོ་ཊར་སཱ་དྷུ་ལཱ་ Dr Saeedullah ལགས་ཀྱིས་ཕྲུ་གུར་འཚོ་བཅུད་ཡག་པོ་དགོས་ཀྱི་ཡོད་སྐོར་གསུངས་འདུག
ཁོང་གིས་དུས་རྒྱུན་ཕྲུ་གུ་མང་པོ་ཞིག་ཟ་མ་བདམ་གསེས་བྱེད་མཁན་ཡིན་པས་རྐྱེན་གྱིས་ཁོང་ཚོ་ལྕགས་དང་། འཚོ་བཅུད་མི་འདང་བའི་དཀའ་ངལ་འཕྲད་ཀྱི་ཡོད། ཁོང་ཚོར་འཚོ་བཅུད་ཀྱི་སྨན་དེ་འདྲ་སྤྲད་པ་ཡིན་ན་ཁོང་ཚོའི་རིམས་འགོག་ནུས་པ་ཇེ་ཆེར་འགྲོ་བ་དང་། འགོས་ནད་རིགས་ཕོག་པའི་ཉེན་ཁ་ཆུང་དུ་འགྲོ་ངེས་རེད་ཅེས་གསུངས་འདུག
ཁོང་གིས་ཕྲུ་གུ་དང་ཕྲུ་གུའི་ཉེ་འཁོར་དུ་ཡོད་པའི་མི་རྣམས་ལ་ཡང་སྔོན་འགོག་སྨན་ཁབ་རྒྱག་རྒྱུ་ནི་ཧ་ཅང་གལ་ཆེན་ཡིན་སྐོར་ནན་བརྗོད་གནང་འདུག
ལྕམ་སན་དྷུ་ Ms Sandhu ལགས་ཀྱིས་ཨོ་སི་ཊོ་ལི་ཡའི་ནང་བུ་བཅོལ་ཁང་མང་ཆེ་བར་སྔོན་འགོག་སྨན་ཁབ་རྒྱག་རྒྱུ་ཨོ་སི་ཊོ་ལི་ཡ་གཞུང་གིས་མཐུན་འགྱུར་རོགས་རམ་གནང་གི་ཡོད་སྐོར་བརྗོད་འདུག
ཕ་མ་ཚོས་ཕྲུ་གུ་ཁག་ཅིག་ལ་སྨན་ཁབ་རྒྱག་གི་མེད། ང་ཚོར་སྒྲིག་གཞི་དང་འགྲོ་ལུགས་མ་འདྲ་བ་མ་འདྲ་བ་ཡོད་པ་རེད། དཔེར་ན། གལ་སྲིད་བུ་བཅོལ་ཁང་དེ་འདྲ་ན་ཚ་འགོས་ཁྱབ་བྱུང་ཚེ། ང་ཚོ་ཕ་མ་རྣམས་ལ་འགོག་ཁབ་བརྒྱབ་མེད་པའི་ཕྲུ་གུ་ནང་ལ་ཉར་རོགས་ཟེར་གྱི་ཡོད། གང་ཡིན་ཟེར་ན་ཕྲུ་གུ་དེར་རིམས་འགོག་ནུས་པ་དེ་ཡོད་མ་རེད་ཅེས་གསུངས་འདུག
མཇུག་ཏུ་ལྕམ་སན་དྷུ་ལགས་ཀྱིས་ཕ་མ་ཚོས་ཕྲུ་གུ་རྣམས་ཁང་པ་ནང་ལ་རྩེད་མོ་རྩེ་བཅུག་ནས་བཞག་པ་ལས། ཕྱིར་ལོགས་རང་བྱུང་གི་ཁོར་ཡུག་དཔེར་ན། སྤྱི་གླིང་དང་། རྩེད་ར་དེ་འདྲ་མང་ཙམ་འཁྲིད་དགོས་པ་རེད། དེས་ཕྲུ་གུའི་རིམས་འགོག་ནུས་པ་ཇེ་ཆེར་འགྲོ་བར་ཕན་ཐོགས་ཡོད་པ་རེད་ཅེས་གསུངས་འདུག
