ཨོ་སི་ཊོ་ལི་ཡ་ངོ་སྤྲོད་ཀྱི་ལེ་ཚན་འདིའི་ནང་། ཆེད་མཁས་མི་སྣ་ཚོས་ཨོ་སི་ཊོ་ལི་ཡའི་མི་སེར་ཆེད་རྒྱུགས་སྤྲོད་ལ་གྲ་སྒྲིག་གང་འདྲ་བྱེད་དགོས་མིན་སྐོར་ལམ་སྟོན་ཁག་འགྲེལ་བརྗོད་ཞུ་རྒྱུ་ཡིན།
ཨོ་སི་ཊོ་ལི་ཡ་ནི་མེས་པོའི་རིག་གནས་ ༢༧༠ ཙམ་གྱི་ངོ་བོ་མཚོན་ཐུབ་པའི་རིག་གནས་སྣེ་མང་དང་རིག་གནས་སྣ་ཚོགས་འཛོམས་ཡོད་པའི་རྒྱལ་ཁབ་ཅིག་ཡིན།
ཨོ་སི་ཊོ་ལི་ཡ་ནི་འཛམ་གླིང་ནང་རིག་གཞུང་ཆེས་རྙིང་ཤོས་མུ་མཐུད་རྒྱུན་གནས་བྱས་ཡོད་པའི་རྒྱལ་ཁབ་ཅིག་དང་། ཕྱི་ལོ་ ༡༩༤༥ ནས་བཟུང་འཛམ་གླིང་གང་ས་ནས་ཁྱོན་གཞིས་སྤོ་བ་མི་གྲངས་ས་ཡ་ ༧ ཙམ་བསུས་ནས་སྣེ་ལེན་བྱས་ཡོད།
ཨོ་སི་ཊོ་ལི་ཡའི་མི་སེར་གྱི་ཐོབ་ཐང་ཞུ་བར་ལམ་ཁ་འགའ་ཤས་ཤིག་ཡོད་པ་དང་། སྙན་ཞུ་མ་འབུལ་གོང་ལ་ངེས་པར་དུ་བྱེ་བྲག་གི་གནས་ཚུལ་ཁག་ཅིག་བརྒྱུད་དགོས་ཤིང་། དེ་ཡང་ “རང་ངོས་དང་བླངས་ཀྱི་ཐོག་ནས་མི་སེར་ཞུ་བ་” conferral དང་། “ཁྲག་རྒྱུད་ཀྱི་ལམ་ནས་མི་སེར་ཞུ་བ་” Descent གཉིས་ནི་རྒྱུན་ལྡན་གྱི་མི་སེར་གྱི་ཐོབ་ཐང་ཞུ་སྟངས་ཤིག་ཡིན།
གཞིས་སྤོ་བའི་ཁྲིམས་རྩོད་པ་ཨེ་ཝ་ཨ་བྷེ་དྷལ་མེས་སཱ་ Eva Abdel-Messiah ལགས་ཀྱིས་རོགས་རམ་འོག གཞིས་སྤོ་བ་མི་གྲངས་བརྒྱ་ཕྲག་འགའ་ཤས་ལ་ཨོ་སི་ཊོ་ལི་ཡའི་མི་སེར་གྱི་ཐོབ་ཐང་རག་ཐུབ་པ་བྱུང་ཡོད་འདུག
ཁོ་མོས་མི་སེར་ཞུ་བར་གལ་ཆེ་ཤོས་ཤིག་ནི་ཁྱེད་རང་ཨོ་སི་ཊོ་ལི་ཡའི་ནང་གནས་སྡོད་བྱེད་མཁན་ཞིག་ཡིན་དགོས་སྐོར་གསུངས་འདུག
ཁོ་མོས་ཨོ་སི་ཊོ་ལི་ཡའི་མི་སེར་ཞུ་བར་ཆ་རྐྱེན་དམིགས་བསལ་ཞིག་ནི་ཨོ་སི་ཊོ་ལི་ཡའི་ནང་གནས་སྡོད་བྱེད་མཁན་ཞིག་ཡིན་དགོས་ཤིང་། དེ་ཡང་ཁྱེད་རང་ཨོ་སི་ཊོ་ལི་ཡའི་ནང་ཁྲིམས་དང་མཐུན་པའི་ཐོངས་ཆེན་གྱི་རིགས་གང་འདྲ་ཞིག་གི་འོག་སླེབས་ཀྱང་རུང་། ཨོ་སི་ཊོ་ལི་ཡའི་ནང་གནས་སྡོད་བྱེད་ནས་ལོ་ ༤ ཧྲིལ་པོ་ལོན་དགོས་ཀྱི་ཡོད་པས་མ་ཚད། དེ་ཡང་འདས་པའི་ལོ་ ༤ ནང་དུས་ཡུན་ཟླ་བ་ ༡༢ ལས་མང་བ་ཨོ་སི་ཊོ་ལི་ཡ་ནས་ལུང་པ་གཞན་ལ་ཕྱིན་ནས་བསྡད་པ་ཞིག་མ་ཡིན་པ། ལོ་མཐའ་མ་དེ་ཁྱེད་རང་ཨོ་སི་ཊོ་ལི་ཡའི་ནང་གཏན་སྡོད་ཆོག་པའི་ཐོབ་ཐང་ཡོད་མཁན་ཞིག་ཡིན་དགོས་པ་ལས་གནས་སྐབས་ཀྱི་གནས་སྡོད་བྱེད་མཁན་མ་ཡིན་པ། ཉེ་བའི་ལོ་དེའི་ནང་དུས་ཡུན་ཉིན་གྲངས་ ༩༠ ལས་མང་བ་ཨོ་སི་ཊོ་ལི་ཡ་ནས་ལུང་པ་གཞན་ལ་ཕྱིན་མེད་པ་བཅས་ཡིན་འདུག
གཏན་སྡོད་བྱེད་མཁན་གྱི་ཆ་རྐྱེན་དེ་ཙམ་མ་ཚད། ཨོ་སི་ཊོ་ལི་ཡའི་མི་སེར་ཞུ་བར་ལོ་ན་ ༡༨ ལས་བརྒལ་དགོས་ཤིང་། མི་སེར་ཞུ་མཁན་དེ་རྒྱུན་དུ་བྱ་བ་ཀུན་སྤྱོད་ཀྱང་གང་ལེགས་ཡོད་དགོས་པ་ཡིན།
དེའི་ཐོག་ལ། ཁྱེད་རང་ཨོ་སི་ཊོ་ལི་ཡའི་ནང་གནས་སྡོད་བྱ་རྒྱུའི་འཆར་གཞི་དང་ཡང་ན་ལུང་པ་གཞན་ལ་ཡོད་ཀྱང་ཨོ་སི་ཊོ་ལི་ཡར་གནས་སྡོད་ཀྱི་འབྲེལ་བ་ཡོད་པ་ཞིག་བྱ་རྒྱུ།
དེ་བཞིན་དབྱིན་ཡིག་དབྱིན་སྐད་ཀྱི་གཞི་རྩའི་རྨང་གཞི་ཡོད་པ་དང་། ཨོ་སི་ཊོ་ལི་ཡའི་སྐོར་གོ་རྟོགས་གང་འཚམ་ཡོད་པ། ད་དུང་ཨོ་སི་ཊོ་ལི་ཡའི་མི་སེར་ཞིག་ཡིན་པའི་གོ་དོན་ག་རེ་ཡིན་མིན་ཤེས་དགོས་པས་མ་ཚད། གཞི་རྩའི་ཆ་རྐྱེན་དེ་དག་ཚང་ནས་སྙན་ཞུ་འབུལ་རྗེས་མི་སེར་གྱི་རྒྱུགས་སྤྲོད་ནང་ཞུགས་བཅུག་གི་ཡོད་པ་རེད།
གལ་སྲིད་ཁྱེད་རང་ལོ་ན་ ༡༨ ནས་ ༥༩ བར་གྱི་མི་དར་མ་ཞིག་ཡིན་ཚེ། ཨོ་སི་ཊོ་ལི་ཡ་གཞུང་གིས་ཁྱེད་རང་གི་དབྱིན་ཡིག་གི་གཞི་རྩའི་རྨང་གཞི་ག་ཚོད་ཡོད་མེད་བལྟ་བ་དང་། དེ་ནས་བཅར་འདྲི་བྱེད་ཀྱི་ཡོད་པས་མ་ཚད། ད་དུང་མི་སེར་རྒྱུགས་སྤྲོད་ནང་ཞུགས་དགོས་ཀྱི་ཡོད་པ་རེད་ཅེས་གསུངས་འདུག
གལ་སྲིད་ཁྱེད་རང་ཨོ་སི་ཊོ་ལི་ཡའི་མི་སེར་ནང་ཞུགས་པར་ཐོབ་ཐང་དང་ཆ་རྐྱེན་ཚང་གི་ཡོད་ཚེ། ཡིག་ཚད་གཏོང་བར་དུས་རྒྱུན་ནང་ལ་སྡོད་སྐབས་ཡིག་ཚད་ཆེད་གྲ་སྒྲིག་དང་རྒྱུས་ལོན་སློབ་སྦྱོང་བྱེད་དགོས་ཀྱི་ཡོད་པ་རེད།
ལྕམ་ཨེ་ཝ་ Ms Eva ལགས་ཀྱིས་ཨོ་སི་ཊོ་ལི་ཡའི་མི་སེར་རྒྱུགས་སྤྲོད་དེ་ནི། གཙོ་བོར་ཁྱེད་རང་གིས་ཨོ་སི་ཊོ་ལི་ཡའི་མི་སེར་གྱི་གོ་དོན་ག་རེ་ཡིན་མིན་དང་། ད་དུང་ཁྱེད་རང་གིས་ཨོ་སི་ཊོ་ལི་ཡ་དང་དེའི་མི་མང་། ཨོ་སི་ཊོ་ལི་ཡའི་མཚོན་རྟགས། མང་གཙོར་ཡིད་ཆེས། ཐོབ་ཐང་། ཨོ་སི་ཊོ་ལི་ཡའི་གཞུང་གི་སྒྲོམ་གཞི། ཨོ་སི་ཊོ་ལི་ཡའི་ནང་ཁྲིམས་ལུགས་བཟོ་སྟངས། ཨོ་སི་ཊོ་ལ་ཡའི་རིན་ཐང་ལྟ་ཚུལ་སོགས་ལ་གོ་རྟོགས་ག་ཚོད་ཡོད་མེད་དང་། དེ་ཡང་གཙོ་བོར་རང་དབང་དང་། གུས་ཞབས། འདྲ་མཉམ་བཅས་ལ་གཞིར་བཞག་ཡོད་པས། དེ་ཚོའི་སྐོར་ཤེས་རྟོགས་ག་ཚོད་ཡོད་མེད་བལྟ་བཞིན་ཡོད་ཅེས་གསུངས་འདུག
མི་སེར་གྱི་རྒྱུགས་སྤྲོད་སྐབས་ཁྱོན་དྲི་བ་ ༢༠ ཡོང་གི་ཡོད། དྲི་བ་དེ་དག་ནང་ཨོ་སི་ཊོ་ལི་ཡའི་ལོ་རྒྱུས་ཀྱི་དུས་ཚིགས་དང་། གཞུང་གི་སྒྲིག་གཞི། མི་སེར་གྱི་ཐོབ་ཐང་། མི་སེར་གྱི་ལས་འགན་བཅས་བརྗོད་གཞི་འདྲ་མིན་ཐོག་ནས་ཡོང་གི་ཡོད།
ལྕམ་ཨེ་ཝེ་ལགས་ཀྱིས་དྲི་བ་སྣ་ཚོགས་ ༢༠ ཡི་ནང་དྲི་བ་ལྔ་ནི་ཨོ་སི་ཊོ་ལི་ཡའི་རིན་ཐང་སྐོར་ཡིན་པས། དྲི་བ་དེ་ལྔའི་ནང་གཅིག་ཀྱང་ནོར་ཆོག་གི་མེད། ཡིག་ཚད་སྐབས་བརྒྱ་ཆ་ ༧༥ ཡན་ལོངས་ན་ཡིག་ཚད་འཕྲོད་ཀྱི་ཡོད་པས་དེས་དྲི་བ་གཞན་ཁག་གི་ནང་འགའ་ཤས་ནོར་རུང་སྐྱོན་མེད། ཡིན་ན་ཡང་ཨོ་སི་ཊོ་ལི་ཡའི་རིན་ཐང་སྐོར་གྱི་དྲི་བ་དེ་ལྔ་པོ་གཅིག་ཀྱང་ནོར་མི་རུང་། དྲི་བ་དྲིས་ལན་གཞན་ཆ་ཚང་འགྲིག་རུང་། རིན་ཐང་སྐོར་གྱི་དྲི་བར་དྲིས་ལན་གཅིག་ནོར་ཚེ་ཁྱེད་རང་ཡིག་ཚད་འཕྲོད་ཀྱི་མེད་ཅེས་གསུངས་འདུག
ཨོ་སི་ཊོ་ལི་ཡའི་ནང་སྲིད་ལྷན་ཁང་གི་དྲ་ཚིགས་ homeaffairs.gov.au ཐོག་མི་སེར་རྒྱུགས་སྤྲོད་ཆེད་<<ཨོ་སི་ཊོ་ལི་ཡའི་མི་སེར་ཐོབ་ཐང་། ང་ཚོའི་ཐུན་མོངས་ཀྱི་རྩ་འཛིན།>> Australian Citizenship: Our Common Bond" ཞེས་པའི་ལག་དེབ་དེ་འདྲ་ཕབ་ལེན་བྱ་རྒྱུ་ཡོད་པས། ལག་དེབ་དེ་སྐད་ཡིག་ ༤༠ ནང་ཡིག་སྒྱུར་བྱས་ཡོད། མ་ཚད་ཁྱེད་རང་གིས་དྲ་ཚིགས་ཐོག་སྒྲ་སྒམ་ནས་ཀྱང་འགྲེལ་བརྗོད་ཉན་ཐུབ་ཀྱི་ཡོད། ཡིག་ཚད་ཆེད་དགོས་མཁོ་འགྲེལ་བརྗོད་ཚང་མ་ལག་དེབ་དེའི་ནང་ཡོད་པས། ཁྱེད་རང་གིས་ངེས་པར་དུ་ལག་དེབ་དེ་གོ་ཚུད་པ་དང་སེམས་ནང་འཇོག་དགོས་པ་ཡིན།
དྲ་ཚིགས་མང་པོ་ཞིག་གི་ཐོག་དྲ་ཐོག་ནས་ཀྱང་མི་སེར་གྱི་ཡིག་ཚད་ཆེད་སྦྱོང་བརྡར་བྱེད་ས་ཡོད་པ་རེད།
ལྕམ་ཨེ་ཝ་ལགས་ཀྱིས་དྲ་ཐོག་ལས་ཀྱང་ད་དུང་ཁ་པར་ནང་གཉེན་ཆས་སྟབས་བདེ་དེ་འདྲ་ཡོད་སྐོར་བརྗོད་འདུག ཁོ་མོས་ཁ་པར་ནང་གི་གཉེན་ཆས་དེ་ཚོ་ཧ་ཅང་ཕན་ཐོགས་ཆེན་པོ་འདུག ངས་མི་རྣམས་ལ་ཁ་པར་ནང་གཉེན་ཆས་དེ་ཚོ་ཕབ་ལེན་བྱེད་ནས་ཉིན་ལྟར་དགོང་མོ་ཆུ་ཚོད་གཅིག་དང་ཆུ་ཚོད་ཕྱེད་ཀ་དེ་འདྲར་སྦྱོང་བརྡར་བྱེད་དགོས་པའི་སྐུལ་མ་གཏོང་གི་ཡོད། ད་དུང་དེ་དང་འདྲ་བ་བརྙན་དེ་འདྲ་ཡུ་ཊུབ་ youtube ཐོག་ལ་ཡོད་པ་རེད་ཅེས་གསུངས་འདུག
