གལ་སྲིད་ཁྱེད་རང་ཨོ་སི་ཊོ་ལི་ཡའི་ནང་འགྲུལ་བཞུད་དང་འཚོལ་ཞིབ་ཏུ་བསྐྱོད་ཚེ། ང་ཚོའི་ཐུན་མོང་མ་ཡིན་པའི་བདག་ཏུ་མ་བཟུང་བའི་རི་སྐྱེས་སྲོག་ཆགས་སྣ་ཚོགས་ཤིག་འཕྲད་སྲིད།
མཚམས་རེར་སྟབས་མི་ལེགས་པ་ཞིག་ལ་རི་སྐྱེས་སྲོག་ཆགས་དེ་འདྲ་རླངས་འཁོར་གྱིས་བརྡུང་བ་དང་། རང་བྱུང་གི་གནོད་འཚེ་དཔེར་ན་མེ་སྐྱོན་དང་། ཆུ་ལོགས་སོགས་ཀྱིས་རྐྱེན་པས་རི་སྐྱེས་སྲོག་ཆགས་ནད་པ་དེ་འདྲ་ཡང་འཕྲད་སྲིད། གལ་སྲིད་ཁྱེད་རང་རི་སྐྱེས་སྲོག་ཆགས་ནད་པ་དེ་འདྲ་ཞིག་དང་འཕྲད་སྐབས་ཁྱེད་རང་གིས་ག་རེ་བྱེད་དགོས་པ་གལ་ཆེན་པོ་ཡིན།
ཁྱེད་རང་ཨོ་སི་ཊོ་ལི་ཡའི་ནང་སྡོད་ས་ས་གནས་དང་། ལྷག་པར་དུ་ཡུལ་ལྗོངས་དང་། གནམ་གཤིས། འཚོ་གནས་བཅས་ལ་གཞིགས་པའི་རི་སྐྱེས་སེམས་ཅན་མང་པོ་ཞིག་མཐོང་ཐུབ་ཀྱི་ཡོད། རི་སྐྱེས་སྲོག་ཆགས་དང་སེམས་ཅན་དེ་དག་ནང་འདབ་ཆགས་རིགས་དང་། འོ་གསོས་སྲོག་ཆགས། འཕུར་འགྲོ་གཉིས་ལྡན་སྲོག་ཆགས་དང་གོག་འགྲོའི་རིགས་སྣ་ཚོགས་ཡོད་པ་དང་ད་དུང་དེའི་ནང་ཨོ་སི་ཊོ་ལི་ཡའི་ནང་ཡོད་པའི་དུག་ལྡན་དང་དུག་མེད་པའི་སྦྲུལ་རིགས་ཀྱང་སྣ་ཚོགས་ཤིག་ཡོད་པ་རེད།
གལ་སྲིད་ཁྱེད་རང་ཨོ་སི་ཊོ་ལི་ཡའི་བྱང་ཕྱོགས་ས་ཁུལ་ཏུ་ཕྱིན་ཚེ་ཁྱེད་ཀྱིས་སྡོང་པོ་བྱི་རིལ་ Tree kangaroos དང་ཆུ་སྲིན། བྱ་ཁ་སུར་ cassowaries སོགས་མཐོང་ཐུབ། ཡང་སྐམ་ཤས་ཆེ་བའི་ནུབ་ཕྱོགས་ས་ཁུལ་ཏུ་སོང་ན་ཨོ་སི་ཊོ་ལི་ཡའི་སེམས་ཅན་ཨེ་མུ་ Emus དང་། བྱི་རིལ་དམར་པོ་ red kangaroos མཛེས་སྡུག་ལྡན་པའི་བྱེ་ཐང་གི་འདབ་ཆགས་རིགས་ཡོད། དེ་བཞིན་ལྷོ་ཕྱོགས་ས་ཁུལ་ཏུ་ཁྱེད་རང་གིས་ possum ཙི་ཙི་སྒམ་པོ་དང་། wombat དོམ་ཆུང་བྲང་ཁུག་ཅན། wallabies ཀང་གྷ་རུ་ཆུང་ཆུང་གི་རིགས་དང་། ཙི་ཙི་འཕུར་འགྲོ་ glider species སྲམ། བྱ་པི་གྷུན་སོགས་མཐོང་ཐུབ་ལ་སེམས་ཅན་དེ་དག་ཏཱ་སི་མ་ནིང་ཨ་མངའ་སྡེ་དང་། ལྷག་པར་ཏུ་ཏཱ་སི་མ་ནིང་ཨ་མངའ་སྡེའི་ལྷོ་ཕྱོགས་སུ་མང་པོ་མཐོང་རྒྱུ་ཡོད་པ་རེད།
གལ་ཆེ་ཤོས་ཤིག་ནི་གལ་སྲིད་ཁྱེད་རང་སེམས་ཅན་ནད་པ་དང་རྨས་སྐྱོན་ཕོག་པ་དེ་འདྲ་ཞིག་དང་འཕྲད་ཚེ་ག་རེ་བྱེད་དགོས་མིན་ཤེས་རྒྱུ་ནིི་གལ་ཆེན་པོ་ཡིན། དེ་བཞིན་སེམས་ཅན་དེའི་བདེ་འཇགས་སྲུང་སྐྱོབ་ལ་རོགས་རམ་ཡག་ཤོས་གང་འདྲ་བྱེད་དགོས་མིན་ཤེས་དགོས་པ་དང་། སེམས་ཅན་དེ་དྲག་སྐྱེད་ཡོང་བར་སྨན་བཅོས་མཐུན་རྐྱེན་གྱི་གོ་སྐབས་རག་ཐབས་བྱེད་དགོས་ཀྱི་ཡོད།
ཏཱ་ནེ་ཨ་བྷེ་ཤོབ་ Tania Bishop ལགས་ནི་རི་སྐྱེས་སྲོག་ཆགས་ཀྱི་སྨན་པ་ཞིག་རེད། ཁོ་མོས་འདས་པའི་ལོ་ངོ་ ༢༤ ཙམ་གྱི་རི་སྐྱེས་སྲོག་ཆགས་སྐོར་ཞིབ་འཇུག་དང་རི་སྐྱེས་སྲོག་ཆགས་སྨན་བཅོས་ལས་དོན་བྱེད་བཞིན་ཡོད་པས་མ་ཚད། རི་སྐྱེས་སྲོག་ཆགས་སྨན་ཁང་ནས་རྨས་སྐྱོན་ཕོག་པའི་རི་སྐྱེས་སྲོག་ཆགས་ཛ་དྲག་མྱུར་སྐྱོབ་ཐད་ལས་དོན་སྒྲུབ་བཞིན་ཡོད།
ཁོ་མོ་ད་ལྟའི་ཆར་ཨོ་སི་ཊོ་ལི་ཡའི་ནང་རི་སྐྱེས་སྲོག་ཆགས་ཉེན་སྐྱོབ་དང་། རི་སྐྱེས་སྲོག་ཆགས་སྐོར་སློབ་གསོ། ད་དུང་རི་སྐྱེས་སྲོག་ཆགས་སྐོར་ཞིབ་འཇུག་བྱེད་མཁན་གྱི་ཚོགས་པ་ཆེ་ཤོས་ WIRES ཞེས་པ་དེའི་ནང་ཕྱག་ལས་གནང་གི་ཡོད་པ་རེད།
ཁོ་མོས་ཨོ་སི་ཊོ་ལི་ཡའི་ནང་མོ་ཊ་གཏོང་ནས་འགྲོ་སྐབས། རྒྱུན་དུ་མཐོང་མྱོངས་མེད་པའི་སེམས་ཅན་དེ་འདྲ་མོ་ཊ་ནས་མཐོང་གི་ཡོད། གཙོ་བོར་ས་ཆ་ཁུག་དཀྱོག་དེ་འདྲའི་ནང་ཐོ་རངས་སྔ་མོ་དང་དགུང་མོ་ས་རུབ་མཚམས་དེ་འདྲར་སེམས་ཅན་འདྲ་མིན་འགྲོ་བསྐྱོད་བྱེད་བཞིན་པ་མཐོང་ཐུབ། གལ་སྲིད་ཁྱེད་རང་ཕྱི་རོལ་ཏུ་སྒར་བརྒྱབ་ནས་བསྡད་པ་དང་ཡང་ན་སེམས་ཅན་གླིང་ག་དེ་འདྲར་འགྲོ་བ་ཡིན་ན་རི་སྐྱེས་སྲོག་ཆགས་མང་པོ་ཞིག་མཐོང་བའི་གོ་སྐབས་ཡག་པོ་ཡོད་པ་རེད་ཅེས་གསུངས་འདུག
ཌོ་ཊར་བྷེ་ཤོབ་ Bishop ལགས་ཀྱིས་གལ་སྲིད་ཁྱེད་རང་གིས་རི་སྐྱེས་སྲོག་ཆགས་ནད་པ་དང་རྨས་སྐྱོན་ཕོག་ཡོད་པ་དེ་འདྲ་མཐོང་ཚེ། ཆེད་ལས་ཅན་གྱི་རོགས་རམ་དེ་འདྲ་གང་མགྱོག་འཚོལ་ཐབས་བྱེད་དགོས་སྐོར་བརྗོད་འདུག
ས་གནས་ཀྱི་སེམས་ཅན་སྨན་ཁང་དང་། ས་གནས་གྲོང་སྡེ་ལྷན་ཁང་སོགས་ཀྱི་རི་སྐྱེས་སྲོག་ཆགས་ལྟ་སྐྱོང་བྱེད་མཁན་གྱི་འབྲེལ་མཐུད་པ་ཡོད་པས་མ་ཚད། རི་སྐྱེས་སྲོག་ཆགས་ལྟ་སྐྱོང་དང་འབྲེལ་བའི་ཁ་པར་ནང་གི་གཉེན་ཆས་ Apps དེ་འདྲ་ཡང་ཡོད་པས་འབྲེལ་མཐུད་དེ་ཚོའི་བརྒྱུད་རི་སྐྱེས་སྲོག་ཆགས་ཉེན་སྐྱོབ་བྱེད་མཁན་གྱི་ཚོགས་པ་དེ་འདྲར་འབྲེལ་བ་བྱེད་ནས་རི་སྐྱེས་སྲོག་ཆགས་དེ་ཉེན་སྐྱོབ་དང་ལྟ་སྐྱོང་ག་རེ་དགོས་མིན་འབྲེལ་བརྗོད་བྱེད་དགོས་པ་རེད། རི་སྐྱེས་སྲོག་ཆགས་ཉེན་སྐྱོབ་དང་ལྟ་སྐྱོང་བྱེད་མཁན་གྱི་ཚོགས་པ་ཨོ་སི་ཊོ་ལི་ཡའི་མངའ་སྡེ་དང་ས་ཁུལ་ཚང་མའི་ནང་ཡོད་པ་རེད། དྲ་ཐོག་ནས་ཁྱེད་རང་གནས་སྡོད་བྱེད་སའི་ས་གནས་དེའི་ནང་རི་སྐྱེས་སྲོག་ཆགས་ལྟ་སྐྱོང་བྱེད་མཁན་གྱི་འབྲེལ་བ་བྱེད་ས་འཚོལ་དགོས་པ་རེད་ཅེས་གསུངས་འདུག
ད་དུང་ཁྱེད་རང་དང་མི་གཞན་གྱི་བདེ་འཇགས་ནི་གལ་ཆེ་ཤོས་ཡིན་པ་དང་། གལ་སྲིད་ཐུབ་ཀྱི་ཡོད་ཚེ་སེམས་ཅན་དེ་ཨ་ཅོག་དང་མཉམ་དུ་སྲུང་སྐྱོབ་བྱེད་ཐབས་བྱེད་དགོས་ཀྱི་ཡོད་པ་རེད།
ལྷག་པར་དུ་ཁྱེད་རང་གིས་རི་སྐྱེས་སེམས་ཅན་ནད་པ་དེ་འདྲ་ལམ་གྱི་འགྲམ་དུ་མཐོང་ཚེ། རྒྱུན་དུ་གལ་ཆེ་ཤོས་ཤིག་ནི་ཁྱེད་རང་གི་མོ་ཊ་དེ་བདེ་འཇགས་ཡོད་ས་ཞིག་ལ་བཞག་ཡོད་པས་མ་ཚད། ཁྱེད་རང་ཡང་བདེ་འཇགས་ཡོད་པ་ཞིག་མཐོང་ཐུབ་དགོས་ཀྱི་ཡོད། དྲན་སོས་དགོས་པ་ཞིག་ལ་རྨས་སྐྱོན་ཕོག་པའི་རི་སྐྱེས་སེམས་ཅན་དེ་ཚོ་དངངས་སྐྲག་སྐྱེས་པ་དང་། རྨས་སྐྱོན་ཕོགས་རྗེས་ཁོང་ཚོས་རང་སྲུང་ཆེད་ཅི་ཡང་བྱེད་སྲིད་པ་རེད། གལ་ཆེ་ཤོས་ཤིག་ནི་སེམས་ཅན་དེ་དངངས་སྐྲག་མེད་པ་ཞི་ལྷོད་ཡོང་ཐབས་བྱེད་དགོས་པ་རེད་ཅེས་གསུངས་འདུག
སེམས་ཅན་ཁག་ཅིག་གི་གྲོད་ཁུག་ནང་ཕྲུ་གུ་དེ་འདྲ་ཡོད་སྲིད་པས་སྟབས་བདེ་དང་བདེ་འཇགས་བྱུང་ཚེ་རྨས་སྐྱོན་ཕོག་པའི་སེམས་ཅན་དེའི་གྲོད་ཁུག་ནང་ཕྲུ་གུ་ཡོད་མེད་བལྟ་དགོས་པ་ཡིན། རྨས་སྐྱོན་ཕོག་པའི་རི་སྐྱེས་སྲོག་ཆགས་དེ་གང་མགྱོག་ངེས་པར་དུ་སེམས་ཅན་སྨན་པས་སྨན་བཅོས་རག་ཐབས་བྱེད་དགོས་ཀྱི་ཡོད།
ཨོ་སི་ཊོ་ལི་ཡའི་ཁྲིམས་ལུགས་ལྟར་ན་རི་སྐྱེས་སྲོག་ཆགས་དེ་ཚོ་སྨན་བཅོས་དང་ལྟ་སྐྱོང་བྱེད་པར་སྦྱོང་བརྡར་དང་ལག་འཁྱེར་ཡོད་མཁན་ཁོ་ན་མ་གཏོགས་མི་ཚང་མས་གང་བྱུང་སྨན་བཅོས་བྱེད་ཆོག་གི་མེད་པ་རེད།
