ཁུན་སི་ལན་ཌི་ནས་ཡིན་པའི་ཇོན་ཡིས་ SBS གསར་ཁང་ལ་ཁོང་ལ་སྒོར་མོ་དང་དཔའ་འབྱོར་གྱི་དཀའ་ངལ་འཕྲད་རྗེས་ས་གནས་གཞན་ནས་གནས་སྤོ་བྱེད་མཁན་དང་། ལུང་པ་གཞན་ནས་ཡོང་བའི་གཞིས་སྤོ་བ་ཚོ་ལ་ལྟ་ཚུལ་འགྱུར་བ་ཕྱིན་ཡོད་སྐོར་བརྗོད་འདུག
ཁོང་ཉིད་སྡོད་ཁང་ལ་དཀའ་ངལ་འཕྲད་ནས་ལུང་ཁུག་ཏུ་གནས་སྡོད་བྱས་སྐབས་སུ། གུང་སེང་དང་སྟབས་བསྟུན་ནས་ལས་ཀའི་ཐོངས་ཆེན་འོག་གནས་སྡོད་བྱེད་ཆོག་པའི་དུས་ཡུན་རིང་དུ་གཏོང་ཐབས་བྱེད་མཁན་ཚོ་དང་ཁང་གླ་འགྲན་རྩོད་བྱེད་དགོས་འཁེལ་གྱི་འདུག་ཅེས་བརྗོད་འདུག གལ་སྲིད་ཁྱེད་རང་ལ་འགྲན་རྩོད་བྱེད་པའི་སྒོར་མོ་མེད་ཚེ་དེ་ནི་རླུང་རྟ་མ་རྒྱུག་པ་རེད་ཅེས་བརྗོད་འདུག
ཁོང་གིས་ང་རང་གྲོང་ཁྱེར་ནང་ཁུལ་དུ་འཚར་ལོངས་བྱུང་བ་དང་། རིག་གནས་སྣ་མང་གི་ཁེ་ཕན་ཚང་མའི་མཐའ་འཁོར་རྟག་ཏུ་གནས་ཡོད་བསམས་ཀྱི་ཡོད། ངས་བསམ་ན་ད་ལྟ་ངའི་ཚོར་སྣང་དེ་འདྲ་ཞིག་མ་རེད་ཅེས་བརྗོད་འདུག
ཇོན་ཁོ་རང་གི་བཟའ་ཟླ་དང་ཁ་བྲལ་རྗེས་ཁོང་རང་ཉིད་གཅིག་པུས་ཁང་གླ་སྤྲོད་རྒྱུར་དཀའ་ལས་ཁག་པོ་བྱུང་ཡོད་པ་རེད།
ཁུན་སི་ལན་ཌིའི་གྲོང་གསེབ་ཏུ་སྡོད་མཁན་ཁོང་གིས། ལས་ཀའི་གུང་གསེང་གི་ཐོངས་ཆེན་ལག་ཁྱེར་དུས་ཡུན་རིང་དུ་གཏོང་འདོད་ཡོད་པའི་མི་ཚོ་དང་མཉམ་དུ་ཁང་གླའི་ཆེད་དུ་འགྲན་རྩོད་ཤུགས་ཆེ་བྱེད་དགོས་འཁེལ་གྱི་འདུག་ཅེས་བརྗོད་འདུག
ཁོང་ཚོ་འདིར་དུས་ཡུན་རིང་པོ་གནས་སྡོད་ཐུབ་ཐབས་བྱེད་མཁན་གྲས་ཡིན་པ་དང་། ཁོང་ཚོ་ཁང་པ་གཅིག་གི་ནང་མི་མང་པོ་ཞིག་མཉམ་དུ་གནས་སྡོད་བྱེད་བཞིན་ཡོད། གལ་སྲིད་ཁྱེད་རང་ལ་དངུལ་མེད་པ་དང་ཁོང་ཚོ་དང་འགྲན་བསྡུར་བྱེད་མ་ཐུབ་པ་ཡིན་ན། ཁྱེད་རང་ཁོར་ཡུག་འདིར་གནས་སྡོད་བྱེད་མི་ཐུབ་ལ་ཁྱེད་རང་རླུང་རྟ་མ་རྒྱུག་པ་རེད་ཅེས་བརྗོད་འདུག
ན་ནིང་ལོ་འདིར་ཇོན་བྷི་སི་བྷན་ལ་གནས་སྤོ་བྱས་པ་དང་། ཁོང་གིས་བསམས་པར་ས་གནས་འདིར་ཁང་པ་ཞིག་རག་གི་རེད་བསམས་ཡོད།
ཡིན་ན་ཡང་ཁོང་རང་ཉིད་ཀྱི་ལས་ཀའི་རླངས་འཁོར་ནང་ཞག་སྡོད་བྱེད་ཀྱི་ཡོད་པ་དང་། དེ་དང་ཆབས་ཅིག་ཉིན་རེར་ཆུ་ཚོད་ ༡༠ ཙམ་རིང་ལས་ཀ་བྱེད་བཞིན་ཡོད་འདུག ཁོང་གིས་དོན་ངོ་མ་བཤད་ན་ཁོང་ནི་ལོ་གཅིག་ཙམ་རིང་སྡོད་ཁྱིམ་མེད་པའི་མི་ཞིག་ཡིན་སྐོར་བརྗོད་འདུག
ཟླ་བ་གཉིས་གོང་ལ་ཁོང་གྲོང་གསེབ་ཁང་ཆུང་ཞིག་གི་ནང་གནས་སྤོ་བྱས། ཡིན་ན་ཡང་ཁོང་རང་ཉིད་ཀྱི་ནང་མི་དང་ས་ཐག་རིང་པོ་གྱུར།
ཁོང་གིས་ས་གནས་དེར་ཁང་པ་དཀོན་པོ་ཡིན་དོན་ནི་ས་གནས་གཞན་ནས་ཡོང་མཁན་དང་གཞིས་སྤོ་བ་མང་པོ་ཞིག་ཡོད་པའི་རྐྱེན་གྱི་རེད་འདུག་ཅེས་བརྗོད་འདུག
ཁོང་གིས་ང་རང་ཆེས་མི་དགའ་ཤོས་ཤིག་ནི་ངས་ཝིག་ཊོ་རི་ཡའི་རླངས་འཁོར་ཨང་གྲངས་དེ་མཐོང་དུས་ངས་རང་ཉིད་ལ་‘ཁྱིམ་དུ་ལོག་འགྲོ’ཞེས་ཆིག་ལབ་རྒྱག་གི་ཡོད་ཅེས་བརྗོད་འདུག
འཚོ་བའི་འགྲོ་གྲོན་གྱི་རིང་གོང་ཇེ་ཆེར་ཕྱིན་པའི་གནོན་ཤུགས་དེས་ཇོན་གྱི་བསམ་བློ་དང་ལྟ་ཚུལ་འགྱུར་བ་ཐེངས་མང་འགྲོ་གི་ཡོད་པ་ཁོང་རང་ཉིད་ཀྱི་ཚོར་གྱི་ཡོད་འདུག
ཁོང་གིས་དེ་ནི་ཏན་ཏན་མིག་ཕྱེ་བ་ལྟར་བུ་ཞིག་རེད། ང་ནི་ཞེ་སྡང་ཆེ་བའི་མི་ཞིག་མིན་རུང་། ངས་ཁྱོད་ཀྱི་པགས་པའི་ཁ་དོག་དང་། ཁྱོད་ཀྱིས་གོམ་པ་རྒྱག་སྟངས། ཁྱོད་གང་འདྲ་ཞིག་ཡིན་མིན་ལ་ལྟ་འདོད་མེད། འོན་ཀྱང་དེས་ང་ལ་ཧ་ཅང་འཇིགས་སྣང་སློང་གི་འདུག་ཅེས་བརྗོད་འདུག
ཇོན་གཅིག་པུ་ཙམ་མ་ཡིན་པར། ད་ལྟའི་ཆར་ཨོ་སི་ཁྲུ་ལི་ཡའི་ནང་དཔལ་འབྱོར་ཐད་སེམས་ཁྲལ་ཆེ་ཤོས་ཆགས་ཀྱི་ཡོད་སྐོར་སྤྱི་ཚོགས་གནད་དོན་ཞིབ་འཇུག་བྱེད་མཁན་སི་ཁན་ལོན་ལྟེ་གནས་ Scanlon Institute ཀྱིས་འགྲེལ་བརྗོད་བྱས་འདུག
ཚོགས་པ་དེའི་སྤྱི་ཁྱབ་འགན་འཛིན་ཨན་ཐེ་ཧན་ཁོ་ཁེས་ Anthea Hancocks ཡི་མི་རྣམས་དཔལ་འབྱོར་གྱི་གནས་སྟངས་ཚད་གཞི་དམའ་ཤོས་སུ་ཆགས་ཡོད་སྐོར་བརྗོད་འདུག
ཁོ་མོས་ཁོ་ཚོར་རང་ཉིད་གང་ཞིག་ལ་བདག་གི་ཡོད་པའི་འདུ་ཤེས་དམའ་བ་དང་། གཞུང་ལ་ཡིད་ཆེས་ཆུང་བ། མི་གཞན་ལ་ཡིད་ཆེས་མེད་པ། གཞན་དང་འབྲེལ་འདྲིས་བྱེད་བསམས་པའི་ཚོར་བ་མེད་པ། ཁོ་ཚོས་ད་དུང་ཨོ་སི་ཁྲུ་ལི་ཡའི་འཚོ་བ་ནི་ཡར་རྒྱུས་སུ་འགྲོ་རྒྱུ་མིན་པར་འདོད་བཞིན་ཡོད་པ་དང་། གནས་སྤོ་བ་མང་པོ་ཞིག་ཡོང་བཞིན་པ་དེས་ཨོ་སི་ཁྲུ་ལི་ཡའི་སྟོབས་ཤུགས་ཇེ་ཆེར་གཏོང་ཐུབ་ཀྱི་མ་རེད་བསམས་པའི་ཚོར་བ་ཞིག་ཀྱང་ཡོང་བཞིན་འདུག་ཅེས་བརྗོད་འདུག
ཁོ་མོས་རེ་བ་ཟད་པའི་འདུ་ཤེས་དང་རེ་བཟང་ཕུགས་བཅོལ་གྱི་འདུ་ཤེས་ནི་དཀའ་ངལ་ཆེན་པོ་ཞིག་རེད་ཅེས་གསུངས་འདུག
ང་ཚོས་མི་རེ་རེའི་ཉིན་རེའི་འཚོ་བའི་ནང་དུ་རེ་བཟང་ཕུགས་བཅོལ་གྱི་འདུ་ཤེས་ཤིག་དང་། འབྱུང་འགྱུར་ཇེ་ལེགས་སུ་འགྲོ་བའི་རེ་བ་ངེས་ཅན་ཞིག་སྐྲུན་ཐུབ་ན། མི་ཚང་མ་ལ་སེམས་ཤུགས་སྦྱིན་པའི་བདེན་དོན་ཞིག་རེད་ཅེས་གསུངས་འདུག
རེ་ཤལ་ལི་ཇཱ་སུན་ Rachael Leah Jackson ལགས་ནི་སིཌ་ནིང་བྱང་ཁུལ་མཚོ་ངོགས་སུ་ས་གནས་སྤྱི་ཚོགས་ཀྱི་འགོ་ཁྲིད་ཅིག་རེད། ཁོ་མོས་དཔལ་འབྱོར་དང་སྒོར་མོའི་དཀའ་ངལ་འཕྲད་མཁན་དང་ཕྱུག་པོ་གཉིས་ཀྱི་བར་ལ་དབྱེ་བ་ཆེ་རུ་འགྲོ་བཞིན་འདུག་ཅེས་བརྗོད་འདུག
ཁོ་མོས་སིཌ་ནིང་བྱང་ཁུལ་མཚོ་ངོགས་དེ་གནས་སྡོད་བྱེད་ས་ས་ཆ་སྙིང་རྗེ་མོ་ཞིག་རེད། ཡིན་ན་ཡང་ས་གནས་དེར་དབུལ་ཕོངས་མང་པོ་ཡོད་པ་དང་དགོས་མཁོ་ཆེན་པོ་ཡོད་པ། གཞན་དང་འབྲེལ་བ་ཆད་པ་མང་པོ་ཡོད། མི་རྣམས་ཁེར་རྐྱང་དང་ཁེར་རྐྱང་གི་ཚོར་སྣང་ཤུགས་ཆེ་ཡོད་པ་དེ་ངས་ཤེས་ཀྱི་ཡོད་ཅེས་གསུངས་འདུག
རེ་ཤལ་རང་ཉིད་ཀྱི་ཉམས་མྱོང་ལས་སྐུལ་སློང་ཐེབས་ཏེ། དཔལ་འབྱོར་སྐད་གྲགས་ཆེ་སའི་ས་ཁུལ་དུ་སྤྱི་ཚོགས་རང་བཞིན་ཅན་དང་རིན་གོང་ཁེ་པོའི་སྡོད་ཁང་འཛུགས་སྐྲུན་བྱ་རྒྱུར་ཐད་རྒྱབ་སྐྱོར་བྱེད་མཁན་ཞིག་ཏུ་གྱུར།
ཁོ་མོས་ དཔལ་འབྱོར་ཐད་ནས་ང་ཚོ་དཀའ་ངལ་འཕྲད་པ་དང་། ང་ཚོར་སྡོད་ཁྱིམ་མེད་མཁན་ཞིག་ཏུ་གྱུར་གྱི་ཡོད། ང་ཚོ་འགྲོ་སའི་ས་ཆ་གཅིག་པུ་དེ་ནི་ང་ཚོ་རང་ཉིད་ཀྱི་མོ་ཊའི་ནང་དུ་ཉལ་དགོས་པ་ཆགས་ཀྱི་ཡོད། ངས་ང་ལ་ཡོད་པའི་ཨང་གྲངས་ཚང་མར་ཁ་པར་བཏང་ཡང་སུས་ཀྱང་རོགས་རམ་བྱས་མ་བྱུང་ཞེས་བརྗོད་འདུག
རེ་ཤལ་ལགས་ནི་ ༢༠༡༡ ལོར་ཁྱིམ་ཚང་ནང་རྩུབ་སྤྱོད་ཀྱི་དཀའ་ངལ་འོག་ཁོ་མོ་ཁོང་གི་ཕྲུ་གུ་གསུམ་དང་ལྷན་དུ་ནང་ནས་ཐོན་དགོས་བྱུང་སྐོར་བརྗོད་འདུག
ངས་གཞུང་གི་སྡོད་ཁང་ཞིག་རག་རྒྱུར་ལོ་ངོ་ ༢༠ ཙམ་སྒུག་པ་ཡིན། ད་དུང་ཡང་ང་ལ་གཏན་འཁེལ་བའི་གནས་སྡོད་བྱེད་སའི་ཁང་པ་ཞིག་མེད་ཅེས་བརྗོད་འདུག
ཁོང་མོ་ཐོག་མར་མོ་ཊའི་ནང་གནས་སྡོད་བྱས་པ་དང་། དེ་ནི་སྡོད་གུར་ནང་གནས་སྡོད་བྱས། དེ་རྗེས་གྲོགས་མོ་ཞིག་གི་ནང་ལ་གནས་སྡོད་དང་། དེ་ནི་སྟབས་བདེ་ཁང་ཆུང་ཞིག་གི་ནང་གནས་སྡོད་ཀྱིས་སྡོད་གནས་ཐེངས་མང་སྤོ་དགོས་བྱུང་ཡོད་འདུག
ཁོ་མོས་འདས་པའི་ལོ་ངོ་ ༡༣ ཙམ་གྱི་རིང་སྡོད་གནས་གཏན་འཁེལ་གང་ཡང་མེད་པར་འཚོ་བ་སྐྱེལ་དགོས་བྱུང་ཡོད་སྐོར་ SBS གསར་ཁང་ལ་འགྲེལ་བརྗོད་གནང་།
ཁོ་མོས་སྡོད་ཁྱིམ་མེད་པའི་དཀའ་ངལ་དེ་ཁྱིམ་ཚང་ནང་རྩུབ་སྤྱོད་ཀྱི་དཀའ་ངལ་ལས་དཀའ་ངལ་ཤུགས་ཆེ་བ་ཞིག་ཏུ་ཚོར་གྱི་འདུག དེས་ཉིན་ལྟར་སེམས་པ་དང་འཚོ་བར་གནོན་ཤུགས་སླེབས་ཀྱི་འདུག་ཅེས་བརྗོད་འདུག
ཡིན་ན་ཡང་རེ་ཤལ་ལགས་ཀྱིས་མི་རྣམས་སོ་སོ་ཁ་བྲལ་དུ་མི་གཏོང་བར་མཉམ་གནས་ཀྱི་གོ་སྐབས་ཤིག་མཐོང་གི་ཡོད་འདུག
ཁོ་མོས་ང་ཚོ་ཚང་མས་མཉམ་རུབ་ཀྱིས་སྤྱི་ཚོགས་ཤིག་སྐྲུན་རྒྱུ་གལ་ཆེན་པོ་ཡིན་པ་དང་། སྤྱི་ཚོགས་ནི་ང་ཚོའི་སྟོབས་ཤུགས་ཡིན་པས། ང་ཚོ་ཚང་མས་མཉམ་རུབ་བྱས་ཏེ་ཕན་ཚུན་ལ་རོགས་རམ་བྱེད་དགོས་ཞེས་གསུངས་འདུག
གལ་སྲིད་ཁྱེད་རང་ཉིད་དང་མི་གཞན་སུ་ཞིག་ལ་ཁྱིམ་ཚང་ནང་རྩུབ་སྤྱོད་ཀྱི་དཀའ་ངལ་མྱོངས་བཞིན་ཡོད་ཚེ་ཁ་པར་ཨང་གྲངས་ 1800 ཐོག་འབྲེལ་བ་གནང་དགོས།
