ཁྱེད་རང་དུས་རྒྱུན་སྤྱི་གླིང་ནང་འགྲོ་བསྐྱོད་བྱེད་མཁན་དང་། ཡང་ན་ལྗང་མདོག་གི་ཁོར་ཡུག་ལ་མྱུར་ཞིབ་བྱེད་མཁན་གང་ཡིན་ཡང་། ཨོ་སི་ཊོ་ལི་ཡའི་གྲོང་ཁྱེར་ནང་གི་སྤྱི་གླིང་ཁག་གི་སྒྲིག་སྲོལ་དང་གུས་ལུགས་ཤེས་ན་དེས་རང་གཞན་ཚང་མར་ཕན་ཐོགས་ཡོད།
ཨོ་སི་ཊོ་ལི་ཡ་ནི་གྲོང་ཁྱེར་གྱི་སྤྱི་གླིང་གྲངས་ ༥༠་༠༠༠ ལྷག་ཡོད་པའི་རྒྱལ་ཁབ་ཅིག་ཡིན། ཨོ་སི་ཊོ་ལི་ཡའི་གྲོང་ཁྱེར་སིཌ་ནིང་ཁུལ་གཅིག་པུ་ལའང་གནའ་བོའི་ལོ་རྒྱུས་ལྡན་པའི་སྤྱི་གླིང་སོགས་ཁྱོན་སྤྱི་གླིང་གྲངས་ ༤༠༠ ཙམ་ཡོད།
ཇོ་ཝེལ་ཇོན་སོན་ Joel Johnson ལགས་ནི་སིཌ་ནིང་གྲོང་ཁྱེར་གྱི་གྲོང་སྡེ་ལྷན་ཁང་གི་ལྗང་མདོག་དང་སྤྲོ་གསེང་གི་འགན་འཛིན་ཞིག་རེད།
ཁོང་གིས་སྤྱི་པའི་ལྗང་མདོག་ཁོར་ཡུག་དེ་སྤྱིར་སྟངས་མངའ་སྡེ་གཞུང་དང་ཐེབས་རྩ་ཁག གཞན་ཡང་ཚོགས་སྡེ་ཁག་དབར་མཉམ་འདུས་ཀྱི་འགན་འཁུར་ཞིག་ཆགས་ཡོད། འོན་ཀྱང་གྲོང་ཁྱེར་ནང་གི་སྤྱི་གླིང་ཁག་གི་འགན་འཁུར་དེ་གཙོ་བོར་གྲོང་ཁྱེར་གྱི་གྲོང་སྡེ་ལྷན་ཁང་གི་འོག་ཏུ་གནས་ཡོད་པ་རེད་ཅེས་གསུངས་འདུག
ཡང་ཁོང་གིས་རྒྱུན་དུ་མི་རྣམས་ཀྱིས་ས་གནས་དེ་གའི་སྤྱི་གླིང་གི་སྒྲིག་སྲོལ་ག་རེ་ཡོད་མེད་བལྟ་དགོས་པ་དེ་གལ་ཆེན་པོ་རེད་ཅེས་གསུངས་འདུག
ས་གནས་གྲོང་སྡེ་ལྷན་ཁང་མ་འདྲ་བ་དང་། ས་གནས་གཞུང་མ་འདྲ་བར་སྒྲིག་གཞི་མ་འདྲ་བ་ཡོད་པ་རེད། ངའི་བསམས་པར་སྤྱི་ཡོངས་སྒྲིག་གཞི་འདྲ་པོ་འདྲ་པོ་ཡོད་པ་རེད། ཡིན་ན་ཡང་ཨོ་སི་ཊོ་ལི་ཡའི་ནང་ཁྱེད་རང་འགྲོ་སའི་སྤྱི་གླིང་ལ་རག་ལུས་ཡོད་པས་མ་ཚད། སྤྱི་གླིང་དེའི་ནང་གནད་དོན་མ་འདྲ་བ་དང་། མཐུན་རྐྱེན་ཡང་མ་འདྲ་བ་དེ་འདྲ་ཡོད་སྲིད་པ་རེད། གལ་ཆེན་ཤོས་ནི་ཁྱེད་རང་གནས་སྡོད་བྱེད་སའི་ས་གནས་གྲོང་སྡེ་ལྷན་ཁང་ནས་ས་གནས་སུ་ཡོད་པའི་སྤྱི་གླིང་གི་སྒྲིག་གཞི་དང་མཐུན་རྐྱེན་གནས་སྟངས་སོགས་ཀྱི་སྐོར་བརྟག་དཔྱད་ཞིབ་འཇུག་བྱེད་དགོས་པ་རེད་ཅེས་གསུངས་འདུག
ལྷག་པར་དུ་སྤྱི་གླིང་ནང་མི་མང་གི་བདེ་འཇགས་ལ་ཡིད་གཟབ་དགོས་པས་མ་ཚད། གྲོང་ཁྱེར་ནང་སྤྱི་གླིང་ཁག་གི་སྒྲིག་གཞིའི་དམིགས་ཡུལ་ནི་མི་ཚང་མ་མཛའ་མཐུན་ཞི་བདེ་ཡོང་ཐབས་བྱ་རྒྱུ་དེ་རེད།
སྐུ་ཞབས་ཇོན་སོན་ལགས་ཀྱིས་གྲོང་ཁྱེར་ནང་ཁུལ་དུ་ཡོད་པའི་སྤྱི་གླིང་ཁག་ལ་དམིགས་བསལ་གྱི་བཀག་རྒྱ་རིགས་ཕུད། དེ་མིན་སྤྱི་གླིང་ཁག་གི་ནང་བྱེད་སྒོ་མང་པོ་ཞིག་སྤེལ་ཆོག་གི་ཡོད་སྐོར་གསལ་བརྗོད་བྱས་འདུག
ང་ཚོའི་སྤྱི་གླིང་ནི་མི་རྣམས་ཀྱི་ཁང་པའི་སྒོ་ར་དང་འདྲ་པོ་རེད། དེར་བརྟེན་ང་ཚོས་མི་རྣམས་ལ་སྤྲོ་གསེང་བྱེད་སའི་ཁོར་ཡུག་བསྐྲུན་པའི་ས་ཆ་དེར་ཚང་མས་མཉམ་སྤྱོད་དང་ཁོར་ཡུག་ལ་བརྩི་འཇོག་བྱེད་དགོས་པའི་མཚོན་རྟགས་དེ་འདྲ་སྦྱར་ཡོད། ད་དུང་སྤྱི་གླིང་ནང་མོ་ཊ་འཇོག་མི་ཆོག་པས་མ་ཚད། སྒར་རྒྱག་ནས་སྡོད་མི་ཆོག ད་དུང་ཆང་རག་འཐུང་ནས་སྡོད་པ་སོགས་ཆོག་གི་མེད། སྤྱི་གླིང་ནང་གང་ཞིག་ཆོག་དང་མི་ཆོག་གི་པར་རིས་དང་ཚོན་རྟགས་དེ་འདྲ་སྦྱར་ཡོད་པས་དེ་ཚོ་ལ་དོ་སྣང་བྱ་རྒྱུ་དེ་གལ་ཆེན་ཆགས་ཡོད་ཅེས་གསུངས་འདུག
སཱ་མེ་ཌོ་བྷེན་སོན་ Sammi Dobinson ལགས་ནི་ཕྲུ་གུའི་གཉིས་ཀྱི་ཨ་མ་དང་། ཁོ་མོ་ནི་ཕྲུ་གུའི་རྩེད་མོ་རྩེ་ས་དང་སྤྲོ་འཆམ་འཁྲིད་ས་ངོ་སྤྲོད་བྱེད་པའི་དྲ་ཚིགས་
འགན་འཛིན་གཞན་ཞིག་རེད། ཁོ་མོས་ཕྲུ་གུ་ཁྲིད་ནས་སྤྱི་གླིང་དང་མེ་ཏོག་ལྡུམ་ར་དེ་འདྲ་རྒྱུན་དུ་འགྲོ་བཞིན་ཡོད་འདུག ཁོ་མོས་སྤྱིི་གླིང་ཁག་གི་ནང་སྒྲིལ་གཞི་མང་དྲག་ན་དེས་ཕ་མ་དང་ཕྲུ་གུའི་བྱེད་སྒོར་ཚོད་འཛིན་ཐེབས་ཀྱི་ཡོད་སྐོར་བརྗོད་འདུག ཡིན་ན་ཡང་སྤྱི་གླིང་ཆེན་པོ་དེ་ཚོའི་ནང་སླེབས་སྐབས་སྤྱི་གླིང་གི་སྒྲིག་གཞི་ཡང་ཆ་ཚང་མ་འདྲ་བ་ཡོད་པ་རེད་ཅེས་གསུངས་འདུག
ཁོ་མོས་དཔེར་ན་ botanical gardens རྩི་ཤིང་ལྡུམ་ར་ལྟ་བུར་དེ་ཚོར་མཚོན་ན་ཁྱེད་རང་གིས་རྐང་རྩེད་སྤོ་ལོ་རྩེ་རྒྱུ་མེད། འོན་ཀྱང་རྩེ་མཁན་ཁ་ཤས་ཡོད་པ་རེད། ཡིན་ན་ཡང་རྩི་ཤིང་ལྡུམ་ར་དེ་ཚོའི་ནང་སྤོ་ལོའི་རྩེ་མོ་རིགས་དང་། ཐུགས་སྤྲོ་གླིང་ག་ཆེན་པོ་གཏོང་བ་སོགས་ལ་སྒྲིག་གཞི་འགྲོ་ལུགས་ཡོད་པ་རེད་ཅེས་གསུངས་འདུག
ལྕམ་ཌོ་བྷེན་སོན་ལགས་ཀྱིས་སྤྱི་གླིང་དང་ཕྲུ་གུ་རྩེད་མོ་རྩེ་ས་དེ་འདྲར་ཡོང་སྐབས་གནས་ཚུལ་མང་པོ་ཞིག་ནི་ཚང་མས་ཤེས་སླ་བའི་སྤྱི་སྟངས་ཀྱི་རྒྱུན་ཤེས་ཤིག་རེད་ཅེས་གསུངས་འདུག
ཁོ་མོས་ཁྱེད་རང་སྤྱི་གླིང་ནས་མ་ཐོན་གོང་ལ་ཁྱེད་རང་སྡོད་ས་གཙང་མ་བཟོ་དགོས་པས་མ་ཚད། གལ་སྲིད་ཐུབ་ཀྱི་ཡོད་ཚེ་གད་སྙིགས་དེ་ཚོ་ཁྱེད་རང་གིས་མཉམ་དུ་འཁྱེར་འགྲོ་དགོས་པ་དང་། ཡང་ན་གད་སྙིགས་བླུག་སྣོད་དེ་འདྲ་འཚོལ་ནས་གད་སྙིགས་རྣམས་དེའི་ནང་བླུག་དགོས། སྤྱི་གླིང་ནང་སྡོད་སྐབས་ཕྲུ་གུ་རྩེད་མོ་རྩེ་ས་མ་བཀག་མི་རུང་བ་དང་། ད་དུང་ཁྱེད་རང་དང་མཉམ་དུ་ཕྲུ་གུ་ཆེན་པོ་དེ་འདྲ་འཁྲིད་ཡོད་ཚེ། ཕྲུ་གུ་ཆུང་ཆུང་དེ་ཚོའི་རྩེད་མོ་རྩེ་སར་མི་གཏོང་བ་སོགས་ཕྲུ་གུ་གཞན་གྱི་བདེ་འཇགས་ལ་དོ་འཁུར་བྱེད་དགོས་པ་སོགས་གནས་ཚུལ་དེ་ཚོ་མང་ཆེ་བ་ནི་ཚང་མས་ཤེས་དགོས་ངེས་ཀྱི་སྤྱི་ཤེས་ཤིག་ཆགས་ཀྱི་ཡོད་པ་རེད་ཅེས་གསུངས་འདུག
གལ་སྲིད་ཁྱེད་རང་སྤྱི་གླིང་ནང་ཤ་སོགས་སྲེག་སྐབས་མེ་གཏོང་རྒྱུ་བཀག་འགོག་གི་རྟགས་དེ་འདྲ་ཡོད་མེད་བལྟ་དགོས་པས་མ་ཚད། ད་དུང་ས་གནས་གྲོང་སྡེ་ལྷན་ཁང་གི་དྲ་ཚིགས་ཐོག་ནས་སྤྱི་གླིང་དང་ས་གནས་དེར་མེ་སྐྱོན་གྱི་ཉེན་ཁ་ཡོད་པའི་འགྲེལ་བརྗོད་དང་སྒྲིག་གཞི་དེ་འདྲ་ཡོད་མེད་བལྟ་དགོས་པ་རེད། མ་ཚད་ཁྱེད་རང་གནས་སྡོད་བྱེད་སའི་མངའ་སྡེ་དང་ས་ཁུལ་དེ་ནས་ས་གནས་དེར་མེ་སྐྱོན་གྱི་ཉེན་ཁ་ཡོད་པ་དང་། མེ་གཏོང་རྒྱུར་བཀག་འགོག་ཡོད་མེད་བལྟ་རྒྱུ་ནི་ཤིན་ཏུ་གལ་ཆེ་བ་ཡིན།
སི་ཀོ་ཊི་ཧན་ཊི་ Scott Hunt ལགས་ནི་མངའ་སྡེ་གསུམ་ནང་ཁྱབ་ཡོད་པའི་ལུས་སྦྱོང་ལྟེ་གནས་ཤིག་གསར་འཛུགས་བྱེད་མཁན་དང་ལུས་སྦྱོང་ཁང་དེའི་སྤྱི་ཁྱབ་འགན་འཛིན་རེད།
སྐུ་ཞབས་ཧན་ཊི་ལགས་ཀྱིས་གྲོང་ཁྱེར་བྷེར་སི་བྷན་ Brisbane ནང་སྤྱི་གླིང་ཁག་ལ་མི་སྒེར་གྱི་སྦྱོང་བརྡར་རིགས་ལ་ཆོག་མཆན་ལམ་ལུགས་གང་འདྲ་ཡོད་མེད་འགྲེལ་བརྗོད་གནང་འདུག
ཁོང་གིས་གལ་སྲིད་ཁྱེད་རང་གིས་སྤྱི་གླིང་ནང་མི་གྲངས་ ༡༠ ལས་ཉུང་བར་ཐེངས་གཅིག་སྦྱོང་བརྡར་སྤྲོད་ས་བྱས་ཚེ་རིན་མེད་ཡིན། འོན་ཀྱང་ཆོག་མཆན་ཞུ་དགོས་པ་རེད། གལ་སྲིད་ཁྱེད་རང་གིས་ཚོ་ཁག་མི་གྲངས་ ༡༠ ལས་མང་བ་དེ་འདྲ་སྦྱོར་བརྡར་སྤྲོད་ཚེ་ཆོག་མཆན་ཞུ་བར་སྒོར་མོ་སྤྲོད་དགོས་པ་རེད། དེ་ལ་ཕལ་ཆེར་ལོ་གཅིག་གི་རིང་ཨོ་སྒོར་ ༡༢༠༠ ཙམ་སྤྲོད་དགོས་ཀྱི་ཡོད། གལ་སྲིད་མི་གྲངས་ ༡༠ དང་ ༢༠ དེ་འདྲ་ཡོད་ཚེ་ཁོར་ཡུག་ལ་གནོད་སྐྱོན་ཤུགས་ཆེ་གཏོང་གི་ཡོད་པ་རེད་ཅེས་གསུངས་འདུག
ས་གནས་གྲོང་སྡེ་ལྷན་ཁང་གིས་སྤྱི་གླིང་ནང་ཁུལ་གྱི་ཚོང་ལས་དང་བྱེད་སྒོར་ལ་སྒྲིག་གཞི་བཟོ་དགོས་དོན་ནི་སྤྱི་གླིང་གི་ཁོར་ཡུག་སྲུང་སྐྱོབ་དང་སྤྱི་གླིང་ནང་ཡོང་མཁན་གྱི་མི་མང་གི་འཕྲོད་བསྟེན་དང་བདེ་འཇགས་ཡོང་ཐབས་སོགས་ལ་དམིགས་ཡོད་པ་རེད།
