ནད་ཡམས་འགོས་ཡོད་པའི་མི་དེ་ Vietnam ཝི་ཏི་ནམ་ནས་ཨོ་སི་ཁྲུ་ལི་ཡར་ཕྱིར་ལོག་བྱས་ཡོད་འདུག་པ་དང་། ཐོག་མར་གནམ་གྲུར་བསྡད་སྐབས་ན་ཚ་དེ་ཕོག་ཡོད་པའི་ནད་རྟགས་གང་ཡང་མེད་པ་རེད་འདུག
གཤམ་གསལ་ཁ་བྱང་འཁོད་པའི་གནས་དེར་མི་སུ་ཞིག་ཕྱི་ཟླ་ ༡ ཚེས་ ༡༨ ཉིན་གྱི་སྔ་དྲོ་ཆུ་ཚོད་ ༡༠ ནས་ ༡༡ དང་སྐར་མ་ ༡༥ བར་སྨན་ཁང་དེར་འགྲོ་བསྐྱོད་བྱས་ཡོད་ཚེ་ན་ཚ་དེ་ཕོག་ཡོད་མེད་བརྟག་དཔྱད་དོ་སྣང་བྱེད་དགོས་སྐོར་ཨོ་སི་ཁྲུ་ལི་ཡ་འཕྲོད་བསྟེན་ལྷན་ཁང་ནས་གསལ་བསྒྲགས་སྤེལ་འདུག
Family Doctors Berala (co-located with Berala Pharmacy and 4Cyte Pathology) - 174B Woodburn Road, Berala, on Saturday 18 January from 10am to 11:15am.
སིཌ་ནིང་ལྷོ་ནུབ་ས་གནས་མི་མང་འཕྲོད་བསྟེན་ལྷན་ཁང་གི་སྨན་པ་ Dr Mitchell Smith མེ་ཤལ་སི་མི་ཐི་ལགས་ཀྱིས་ས་གནས་འདིར་ནས་ན་ཚ་དེ་ཁྱབ་བརྡལ་གྱི་ཉེན་ཁ་མེད་ཀྱང་། མི་སུ་ཞིག་གོང་འཁོད་ས་གནས་དེར་དུས་ཚོད་ཏག་ཏག་དེའི་ཐོག་འགྲོ་བསྐྱོད་བྱས་ཡོད་ཚེ་ནད་རྟགས་ཐོན་བཞིན་ཡོད་མེད་དོ་སྣང་བྱ་རྒྱུ་གལ་ཆེན་པོ་ཡིན་སྐོར་གསུངས་འདུག
འགོད་ནད་དེའི་ནད་རྟགས་ནི། ཚ་བ་རྒྱས་པ་དང་། མིག་ཟ་ཕྲུག་ལངས་བ། སྣ་ཆུ་འཛག་པ། གློ་ལུ་བ་སོགས་བྱེད་ཀྱི་ཡོད་འདུག་པ་དང་། ནད་རྟགས་དེ་འདྲ་ཐོན་རྗེས་ཉིན་གསུམ་བཞིའི་ནང་མགོ་དང་གདོང་པར་འབྲུམ་བུ་དམར་པོ་ཆུང་ཆུང་ཐོན་ནས་རིམ་བཞིན་ལུས་ཀྱི་ཆ་ཤས་གཞན་ལ་ཁྱབ་འགྲོ་བའི་འགོས་ནད་ཅིག་རེད་ཅེས་སྨན་པ་སི་མི་ཐི་ཡིས་འགྲེལ་བརྗོད་གནང་འདུག
ཡང་ཁོང་གིས་ནད་རྟགས་དེ་ཐོན་པར་དུས་ཡུན་ཉིན་གྲངས་ ༡༨ ཙམ་འགོར་སྲིད་པས་དུས་ཚོད་དེའི་ནང་ས་གནས་དེར་ཕེབས་མི་ཚང་མས་ཕྱི་ཟླ་ ༢ ཚེས་ ༥ བར་རང་ཉིད་ལ་ནད་རྟགས་དེ་འདྲ་ཐོན་བཞིན་ཡོད་མེད་ཡིད་གཟབ་གནང་རོགས། གལ་སྲིད་ཁྱེད་ལ་ནད་རྟགས་དེ་འདྲ་ཐོན་ཚེ་སྨན་པར་བསྟེན་གཏུགས་ཆེད་མ་ཕེབས་གོང་སྨན་ཁང་ལ་ཁ་པར་གནང་རོགས།
དེ་བཞིན་ང་ཚོས་སྤྱི་ཚོགས་སྨན་ཁང་ཁག་ལ་ཁོང་ཚོར་རིམས་ནད་འགོག་ཁབ་དུས་ལྟར་བརྒྱབ་ཡོད་མེད་བརྟག་དཔྱད་དགོས་པར་དྲན་སྐུལ་བྱེད་བཞིན་ཡོད། མི་ཚང་མས་རང་ཉིད་ལ་འགོས་ཉེན་ཆེ་བའི་འབྲུམ་ནད་འགོག་སྲུང་ཡོད་མེད་བརྟག་དཔྱད་བྱེད་དགོས་ཞེས་གསུངས་འདུག
འཕྲོད་བསྟེན་ལྷན་ཁང་གིས། ༡༩༦༥ རྗེས་སུ་སྐྱེས་པའི་མི་ཚང་མར་ཚད་རིམས་ཀྱི་རིམས་འགོག་སྨན་ཁབ་གཉིས་བརྒྱབ་ཡོད་མེད་ལ་བརྟག་དཔྱད་བྱེད་དགོས། ཕྱི་རྒྱལ་དུ་འགྲོ་མ་ཐག་འདི་ནི་དམིགས་བསལ་གྱི་གལ་ཆེན་པོ་རེད། ད་ལྟའི་ཆར་འཛམ་གླིང་གི་ས་ཁུལ་ཁ་ཤས་སུ་འབྲུམ་ཚད་ཀྱི་ནད་ཡམས་ཁྱབ་གདལ་འགྲོ་བཞིན་ཡོད་ཅེས་གསུངས་འདུག
འབྲུམ་ནད་ཀྱི་སྨན་ཁབ་དེ་བདེ་འཇགས་དང་ནུས་པ་ལྡན་པ་ཞིག་ཡིན། ཟླ་བ་ ༡༢ དང་ ༡༨ ལ་སླེབས་པའི་ཕྲུ་གུ་ཚོར་འགོག་ཁབ་རིན་མེད་དུ་རྒྱག་གི་ཡོད། ཨོ་སི་ཁྲུ་ལི་ཡའི་ནིའུ་སའོ་ཐི་ཝལ་མངའ་སྡེ་ NSW ནང་ ༡༩༦༥ རྗེས་སུ་སྐྱེས་པའི་མི་ཚང་མར་སྨན་ཁབ་གཉིས་མ་ཐོབ་པར་རྣམས་ལ་རིན་མེད་ཡིན།
ཟླ་བ་ ༡༢ ཡན་གྱི་ཕྲུ་གུ་ཚོ་གལ་སྲིད་ཁོང་ཚོ་འབྲུམ་ཚད་ཀྱི་ཉེན་ཁ་ཆེ་བའི་ས་ཁུལ་ལ་འགྲོ་བཞིན་ཡོད་ན། ཕ་མ་ཚོས་རང་ཉིད་ཀྱི་སྨན་པ་ GP ལ་བཀའ་འདྲི་ལམ་སྟོན་ཞུ་དགོས།
མི་སུ་ཞིག་གིས་རང་ཉིད་ལ་སྨན་ཁབ་ཐེངས་གཉིས་བརྒྱབ་ཡོད་མེད་གསལ་པོ་ཤེས་རྟོགས་མེད་ན་སྨན་ཁབ་དེ་ཁ་སྣོན་བྱེད་པར་ཉེན་ཁ་གང་ཡང་མེད། དེ་ནི་དམིགས་བསལ་འགྲུལ་བཞུད་མ་བྱས་པའི་སྔོན་ལ་གལ་ཆེན་པོ་ཆགས་ཀྱི་ཡོད། MMR སྨན་ཁབ་དེ་སྨན་པ་ GP ནས་ལོ་ཚད་ཚང་མ་དང་ Pharmacies སྨན་རྫས་ཚོང་ཁང་ཁག་ནས་ལོ་ན་ ༥ ཡན་གྱི་མི་རྣམས་ལ་འགོག་ཁབ་དེ་རག་གི་ཡོད་པ་རེད།
འབྲུམ་ནད་ཟེར་བ་གང་ཡིན་ནམ།
འབྲུམ་ནད་ནི་འགོས་ཉེས་ཆེ་བའི་ནད་དུག་ཅིག་ཡིན་ཞིང་། འཛམ་གླིང་གི་ས་ཁུལ་ཁ་ཤས་སུ་ལོ་ ༥ མན་གྱི་བྱིས་པ་ཤི་བའི་རྒྱུ་རྐྱེན་གཙོ་བོ་ཞིག་ཆགས་ཀྱི་ཡོད།
སྔོན་ཆད་ཨོ་སི་ཁྲུ་ལི་ཡའི་ནང་བྱིས་པའི་དུས་སུ་འབྲུམ་ཚད་ཀྱི་ནད་གཞི་ཕོག་མཁན་ཧ་ཅང་མང་པོ་ཡོད། ༡༩༦༦ ལོའི་སྔོན་ལ་སྐྱེས་པའི་མི་ཕལ་ཆེ་བ་བྱིས་པའི་དུས་སུ་འབྲུམ་ནད་ཕོག་ཡོད་པ་དང་། སྨན་ཁབ་བརྒྱབ་རྗེས་ད་ལྟ་ཨོ་སི་ཁྲུ་ལི་ཡའི་ནང་འབྲུམ་ནད་དཀོན་པོ་ཆགས་ཡོད།
ཡིན་ནའང་འཛམ་གླིང་གི་ས་ཁུལ་མང་པོར་འབྲུམ་ནད་དེ་ད་དུང་ཡང་ཁྱབ་ཆེ་བ་དང་རྒྱལ་ཁབ་ཁ་ཤས་སུ་ནད་ཡམས་དེ་མུ་མཐུད་དུ་གནས་ཡོད། ཕྱི་རྒྱལ་དུ་འགྲོ་བའམ་ཡང་ན་ཨོ་སི་ཁྲུ་ལི་ཡར་ཡོང་མཁན་གྱི་མི་ཚོས་ནད་གཞི་དེ་ཁོང་ཚོ་དང་མཉམ་དུ་འཁྱེར་ཡོང་གི་ཡོད་པའི་རྐྱེན་གྱིས་སྤྱི་ཚོགས་ནང་འབྲུམ་ཚད་ཀྱི་ནད་ཡམས་ཁྱབ་གདལ་འགྲོ་བཞིན་ཡོད། རང་ཉིད་དང་སྤྱི་ཚོགས་སྲུང་སྐྱོབ་བྱེད་པར་ འབྲུམ་ནད་ཀྱི་སྨན་ཁབ་བརྒྱབ་དགོས་པ་དེ་གལ་ཆེན་པོ་ཆགས་ཡོད།
༡༩༦༦ ལོའི་སྐབས་དང་དེའི་རྗེས་སུ་སྐྱེས་པའི་མི་ཚང་མར་འབྲུམ་ནད་ཀྱི་སྨན་ཁབ་གཉིས་བརྒྱབ་ཡོད་མེད་ལ་ལྟ་ཞིབ་བྱེད་རྒྱུ་གལ་ཆེན་པོ་རེད།
དབྱིན་སྐད་ནང་ Measles ཞེས་པའི་ན་ཚ་འདིར་བོད་སྐད་ནང་འབྲུམ་ནད་དང་། ཡང་ཁག་ཅིག་གིས་མཆིན་ནད། སིབ་བི་ཞེས་འབོད་སྲོལ་སྣ་ཚོགས་ཡོད་པ་རེད་འདུག
