Na ta'ua e Anasina i se talanoaga ma le SBS Samoan le amataga o lona soifuaga a'oa'oina i le a'oga tulaga lua i Utuali'i, soso'o ai le Kolisi a Leulumoega Fou, ma faasolo atu ai i Aotearoa ma Melbourne, lea na i'u ai ma se tikeri i mata'upu faapisinisi.
O le sui o Metropolitan North na lalamua i le faavaeina o le faalapotopotoga le Engage Pasefika i Melbourne, e ofoina fesoasoani ma faamatalaga aoga i tagata Pasefika i mata'upu o le soifua maloloina.
Na fa'aalia e Anasina Gray-Barberio lona naunauta'iga e fa'aaoga lona tofiga ma le tula'i mai e tulei atili ai polokalame o puipuiga mai a'afiaga ogaoga o fesuia'iga o le tau.
O se tasi o itu e taua ai lona tula'i mai, o le avatu ai o se faata'ita'iga i le itupa o teine ma tama'ita'i o le Pasefika i lo latou mafaia ona 'ausia o so'o se tulaga e taumafai iai, e o'o i le avea ma sui faipule o se palemene i Ausetalia.
