Ua faatonuina e Joe Biden se toe iloiloga o tulafono ma aiaiga o loo puipuia ai le tua'oi o Amerika ma Mexico.
O loo manino mai i le faatonuga a le peresitene se taumafaiga e toe ta'ai i tua tulafono a Donald Trump i le 2018 lea na faa-faigata ai i tagata mai Mexico ma isi atunu'u i Amerika i Saute ona faatasi ma aiga ina ua taofia i le tua'oi.
Na saunoa Joe Biden o se tulafono le alofa ona na tu'u 'ese'esea ai matua ma fanau.
“We are going to work to undo the moral and national shame of the previous administration that literally, not figuratively, ripped children from the arms of their families,” Mr Biden said as he signed the orders at the White House.
O loo a'i'oi faalapotopotoga o loo finau mo aia tatau a tagata mai isi atunu'u ina ia faa-vave ona pasia se tulafono e toe faatasia ai aiga na vaevaeina i lalo o le faigamalo a Donald Trump.
Peita'i na faaalia e se sui o le fale pa'epa'e, o tulafono nei e tatau ona lava se taimi e tapena ai.
“It’s not going to happen overnight,” White House Press Secretary Jen Psaki said earlier in the day.
O le tulaga faigata i le faigamalo a Joe Biden, ona o le taumafaiga e ta'ai i tua tulafono a Donald Trump, ae puipuia ai fo'i le atunu'u mai le lolofi atu o tagata i auala solitulafono.
E le'i o'o le faatonuga a Joe Biden i le isi mataupu na faatulafonoina e Donald Trump e faaigoaina o le ‘Title 42,’ na mafai ai e leoleo ma pulega o tua'oi ona tuli 'ese pe tipoti i fafo tagata e maua i tua'oi o taumafai e ulufale faasolitulafono ona o puipuiga o Amerika mai le pepesi o le KOVITI-19.
View of the US border wall in the city of Tijuana, Baja California, Mexico, 21 January 2021. Source: AAP
I se pepa o faamatalaga mai le fale pa'epa'e, na ta'ua ai se manatu o le peresitene i le taua o le sao o tagata fai mai i le atina'e o le tamaoa'iga o Amerika, ma lona puipuiga.
