مهم ټکي:
- د جمهوریت له سقوط وروسته شاوخوا ۱۶ زره افغانانو ته د آسټرالیا بشردوستانه ویزې ورکړل شوي.
- د آسټرالیا د کورنیو چارو وزارت د نږدې ۷۰ زره کسانو غوښتنلیکونه رد کړي دي.
- د څلورو کټګوریو ترڅنګ، آسټرالیا هغو کسانو ته لومړیتوب ورکوي چې له افغانستان څخه بهر دي.
په افغانستان کې د جمهوریت له سقوط وروسته د آسټرالیا حکومت د افغانستان اوسېدونکو لپاره ۲۶ زره او ۵۰۰ بشردوستانه ویزې اعلان کړي، ترڅو په څلورو کلونو کې په شرایطو برابرو افغانانو ته ورکړل شي.
په افغانستان کې د جمهوریت له سقوط وروسته (د ۲۰۲۱ کال د آګسټ د پنځلسمې او د ۲۰۲۳ کال د ډسمبر تر ۳۱مې ڼېټې پورې) د بشردوستانه ویزو لپاره د افغانانو لخوا شاوخوا ۴۸ زره غوښتنلیکونه سپارل شوي چې د ۲۲۰ زره او ۷۸۷ کسانو لپاره په کې د ویزو غوښتنه شوې.
د آسټرالیا د کورنیو چارو وزارت لخوا خپاره شوي معلومات ښيي چې د جمهوریت له سقوط وروسته د ۲۰۲۳ کال د ډسمبر تر ۳۱مې نېټې پورې د شاوخوا ۸۵ زره کسانو غوښتنلیکونه نهايي شوي او ۱۶ زره او ۸ کسانو ته د آسټرالیا بشردوستانه ویزې ورکړل شوي دي.
د کورنیو چارو وزارت پر ویب پاڼه خپرې شوې شمېرې ښيي چې د ۲۰۲۳ کال تر پایه د نږدې ۷۰ زره افغانانو غوښتنلکونه رد شوي دي.
کومو کسانو ته لومړیتوب ورکول کېږي؟
د آسټرالیا د کورنیو چارو وزارت یوه ویاند تېره میاشت اس بي اس پښتو ته ویلي وه چې "حکومت د افغان ټولنې ملاتړ ته ژمن دی" او تر د ۲۰۲۵ او ۲۰۲۶ کلونو تر مالي کاله یې ۲۶ زره او ۵۰۰ ویزې ځانګړې کړي.
د کورنیو چارو وزارت ویاند ویلي چې په ځانګړو شویو ویزو کې "لومړیتوب هغو کسانو ته ورکول کیږي چې له خپل هیواد څخه بهر دي" او له لاندې ډلو څخه وي:
- ښځې او نجونې، توکمیز اقلیتونه، +LGBTQI او نورې پیژندل شوې اقلیتي ډلې.
- د کډوالۍ او بشردوستانه ویزو لرونکو افغانانو د کورنۍ نږدې غړي ( ښځه او له ۱۸ کلونونو کم عمر لرونکي ماشومان).
- د آسټرالیا د حکومت لخوا تصدیق شوي پخواني محلي کارمندان (LEE) او د دوی د کورنۍ نږدې غړي (ښځه او له ۱۸ کلونونو کم عمر لرونکي ماشومان).
- هغه کسان چې د ملګرو ملتونو د عالي کمیشنرۍ (UNHCR) لخوا آسټرالیا ته د بیا میشتیدنې لپاره معرفي شوي اوسي.
LISTEN TO
کډوالي او آسټرالیا ته د مهاجرت بېلابېلې ویزې
15:17
د غوښتنلیکونو ارزونه د هر شخص ځانګړو شرایطو، موقعیت، د سفر امکاناتو، د اسنادو له سپارلو او د آسټرالیا د حکومت مامورینو ته لاسرسی سره تړلې خبره ده. په دې معنی چې د ځینو کسانو د غوښتنلیکونو ارزونه ممکن لږ او د ځینو نورو ډېر وخت ونیسي، خو د دقیق وخت په اړه یې تر اوسه معلومات ندي شریک شوي.
په بشردوستانه پروګرام کې د ویزې ټول غوښتنلیک سپارونکي کسان باید د ویزې معیارونه پوره کړي او د شخصیت، امنیت او روغتیا لپاره د عامه ګټو معیارونه پوره کړي کوم چې د ویزې له صادرولو مخکې ترسره کېږي.
