न्यु साउथ वेल्समा चिनियाँ विद्यार्थीहरूको नक्कली अपहरणका घटना बढ्दो

सिड्नीकी एक १८ वर्षिया विद्यार्थी आठ दिनको लागि बेपत्ता भइन् र उनको परिवारलाई पुलिसलाई खबर नगर्न धम्की दिइयो। अनि उनको रिहाइको बदलामा लाखौँ अस्ट्रेलियाली डलरको फिरौती रकम माग गरियो तर आखिरमा, यो सबै एक घोटाला मात्र रहेको पत्ता लाग्यो। न्यु साउथ वेल्स प्रहरीका प्रमुख गुप्तचर अधिकृत ड्यारेन बेनेटका अनुसार ती विद्यार्थीले आफ्ना अभिभावकलाई आफ्नो रिहाइका लागि फिरौती तिर्न बिन्ती गर्दै भिडियोहरू पठाएकी थिइन्। यो घटनाको भिडियो च्याट्सवुड स्थित एक २२ वर्षीय कानुनको विद्यार्थीको युनिटमा खिचिएको थियो। ती पुरुष पनि यस्तै घोटालाको सिकार भएको बेनेट बताउँछन्। उनीहरूले ७ सेप्टेम्बरको दिन सिड्नी फिश मार्केटमा एक अर्कालाई भेटे, र त्यहाँबाट ती दुबै जना उक्त युनिटमा गए। भोलि पल्ट ८ सेप्टेम्बरको बिहान ती महिला विद्यार्थीका साथीहरूले उनी बेपत्ता भएको पुलिसलाई रिपोर्ट गरे। उनी च्याट्सवुड स्थित सो फ्ल्याटमा एक हप्तासम्म बसिन् र ती पुरुष आफ्नो पढाइको लागि विश्वविद्यालय गएको समयमा उनले आफ्नो भिडियोहरू बनाउँदै आफ्ना अभिभावकलाई पठाइन् । आफ्ना आमा बुवाले फिरौती तिरेपछि उनी १५ सेप्टेम्बरको दिन त्यहाँबाट निस्किन, र गुप्तचरहरूले उनलाई पिर्मोंटमा भेट्टाए।