Vixay Vue: Ntawm nod yog xov tooj cua SBS Radio Hmong program thiab zoo siab tos txais Emilie Dye uas yog tus neeg sab laj txog tej cai rau lub koom haum Australian Tax-payer Alliance. Koj ho qhia rau peb me ntsis txog tsoom hwv Australia cov kev siv tej nyiaj sau se tau los ntawd seb ho coj mus siv li cas tam sim no lawm vim rau qhov nws tej kev siv nyiaj no tau ua rau Australia tej neeg zejzog tsis txaus siab rau nws. Ua tsaug ntau.
Emilie Dye: Tau los mas, Senator McGrath yeej tau qhia txog nws tej hom phiaj uas yuav coj los sab laj hauv tsev kis xeev siab tom ntej no, thiab yog nws ib cov hom phiaj los xyuas kom tsoom hwv yuav tsuam qhia qhov tseeb tias nws siv nyiaj li cas, los yog tej tuam chav hauj lwm thiab tej nom kis xeev hos siv peb tej nyiaj them se mus ua dab tsi kom ntau tshaj no ntxiv. Peb lub koom haum Australian Tax-payers Alliance los yeej tau mus thov ib cov kev kos xyeem memtes thiab kev pom zoo los ntawm zej tsoom kom thiaj muaj peev xwm hais tau kom tsoom hwv Australia yuav tsum qhia txog tej nyiaj nws coj mus siv rau zej tsoom los yog tej neeg tshaj xovxwm paub kom meej tshaj no ntxiv rau ntawm nws lub koom haum Transparency Portal ntawd. Txawm tias nws yeej tau tsim ib cov graph qhia txog tej kev siv nyiaj ntawm lub vassab no lawm los peb yeej tseem xav kom nws qhia txog tej nyiaj se uas yog peb tej nyiaj uas nws coj mus siv kom meej tseeb tshaj qhov no ntxiv thiab. Vim rau qhov zoo li tam sim no nws tej system nws siv tseem tsis tau qhia tau tej kev siv nyiaj no kom meej raws li qhov tsim nyog. Kuv tuaj ntawm teb chaws America tuaj, thiab nyob rau teb chaws Meskas ces, peb yeej muaj lub tuam chav Congressional Budget Office uas yog ib lub tuam chav zoo coj los siv thiab. Vim rau qhov nws yeej tau muab tsoom hwv tej nyiaj uas nws tej tuam chav txhua nrho siv coj los teev zwm rau hauv ib daim ntawv uas siv cov program excel sau ntawd. Kuv thiaj xav tias peb xav tau tej yam muaj ntsis zoo tib yam li no siv hauv teb chaws Australia thiab, koj tej neeg los nrog xyuas kom tej nom tswv yuav tsum tau qhia qhov tseeb seb lawv siv tej nyiaj sau se li cas.
Vixay Vue: Koj puas xav tias muaj tej tuam chav li hais ntawd siv hauv teb chaws Australia no siv mas es kom zej tsoom ho mus txheeb xyuas tau?
Emilie Dye: Kuv xav tias tsim nyog muaj lub tuam chav li no kom zej tsoom thiaj paub tias nom tswv coj tej nyiaj se mus siv ua dab tsi, vim peb yog tej neeg xaiv lawv los ua nom, ces thiaj tsim nyog peb paub txog tej nyiaj no. Vim ib lub xyoos twg ces nom tswv yeej siv nyiaj txog li $116 million rau tej nom kis xeev hauv tsev tsoom hwv mus los hauv teb chaws Australia no.
Vixay Vue: Yog li ntawd tej neeg sawv daws ho yuav nrhiav tau tej xov xwm no qhov twg, peb puas muaj peev xwm cia li mus nrhiav tau ntawm lub koom haum Australian Tax Office (ATO) xwb ces yeej paub tias tsoom fwv coj tej nyiaj se mus siv ua dab tsi lawm, los yog tsim nyog peb yuav tau mus txheeb ib lub tuam chav twg es thiaj txheeb tau tej xov xwm no?
Emilie Dye: Tam sim no ces tseem cov heev thiab tsis muaj peev xwm nrhiav tau tej xov xwm li hais no. Vim peb tseem yuav tau mus nrhiav ntawm ntau lub tuam chav sib txawv, los sis yog muaj qee zaus peb yuav tsum tau mus nyeej ib cov cai mas thiaj yuav muaj peev xwm paub tias tsoom hwv siv nyiaj npaum li cas xwb. Peb lub koom haum Australian Taxpayers' Alliance los yeej mus txheeb tau qee yam xov xwm tias tau coj tej nyiaj no mus siv rau tsev tsoom hwv ib xyoos npaum li cas lawm thiab, ho coj tej nyiaj se npaum li cas mus siv, coj mus siv rau cov kev xaiv tsa, cov kev mus los li cas lawm thiab. Tab sis yeej tsis yog tej yam yooj yim uas yuav nrhiav tau tej xovxwm no yooj yim raws li qhov tsim nyog nrhiav tau li. Tsis tsim nyog yog tej neeg paub mus nrhiav tsoom hwv tej vas sab xwb es thiaj nrhiav tau tej xov xwm no, tab sis tsim nyog tsoom hwv yuav tsum coj los qhia rau sawv daws paub thiab nrhiav tau yooj yim.
Vixay Vue: Koj puas xav tias tam li yog ib lub koom haum es koj lub koom haum no twb tsis muaj peev xwm tsub nias thiab hais kom tsoom hwv ua tej hauj lwm no, es puas tsim nyog Australia tej nom kis xeev qes thiab siab tsim nyog los nrog xyuas tej hauj lwm no?
Emilie Dye: Tsim nyog mas. Vim li ntawd, Senator McGrath thiaj tau qhia tias tej hauj lwm no yog nws ib cov hom phiaj yuav los tsim cai rau xyoo no. Thiab peb yeej cia siab ntsoov thiab yuav pab nws tej hauj lwm no kom muaj tej xov xwm no los qhia txog nws cov kev siv nyiaj qhia rau zej tsoom paub. Thiab yuav tsum tau mus hais hauv tsev tsoom hwv, thiab yeej muaj ntau yam hauj lwm yuav tau ua uas cov neeg paub txog fab txuj IT yuav tau los lis. Tab sis kuj yog tej yam tsim nyog yuav tau ua kom pej xeem Australia thiaj paub tias nom tswv coj lawv tej nyiaj se coj mus siv li cas lawm.
Vixay Vue: Tab sis yav tas los ces peb yeej tau hnov thiab tau pom tej xo no hauv TV, social media thiab tej ntawv xov xwm txog cov nyiaj coj mus pab cuam rau cov kev sib tw uas tsis ncaj ncees tsis ntev los no, nom tswv tej nyiaj ua nws siv, Australia tus thawj pwm tsav tej nyiaj siv mus txawv teb chaws thiab, yog li tam li yog tej neeg zejzog hauv teb chaws Australia no, los yog tej nom kis xeev ne ho yuav tau los daws cov teeb meem no li cas?
Emilie Dye: Tam sim no ces Bridget McKenzie twb tau tawm tsis ua nws txoj hauj lwm vim cuam tshuam txog cov nyiaj sports grants $100 million uas coj mus siv tsis raws li qhov tsim nyog lawm. Kuv xav tias tej teeb meem no tsuas yog ib cov me me ntawm ntau cov xwb, thiab tsoom hwv yeej muaj tej teeb meem no los ntev tsis yog muaj rau lub caij Bridget Mckenzie tseem ua nom los yog lub caij Ross Kelly ua dhau los xwb. Vim yeej tseem pom muaj cov kev coj tej nyiaj no mus siv tsis raws li qhov tsim nyog tas mus li. Tab sis zaum no ces peb kuj txhom tau tias lawv ho tau ua tsis ncaj rau tej nyiaj sports grants no lawm. Vim yeej tsis muaj xov xwm los ua tib zoo qhia kom ntxaws tias yog li cas tiag thiab tej neeg yeej tsis muaj peev xwm yuav mus txheeb tau tej nyiaj sports grants hauv tsoom hwv tej vassab li. Vim rau qhov peb yeej tsis muaj peev xwm cia li mus nrhiav tau tias tej nyiaj sports grants no raug coj mus siv rau qhov twg lawm, muab tej nyiaj no rau leej twg lawm, vim li no ces thiaj ua rau muaj cov kev lwg noj lwg haus tshwm sim, thiab muaj neeg coj tej nyiaj no mus siv ua lwm yam, los yog coj mus siv kom lawv yeej kev xaiv tsa, uas tsis tsim nyog yuav coj tej nyiaj se mus siv li no li.
Vixay Vue: Koj puas xav tias tsim nyog lub koom haum Australian Auditor General yuav tsum kub siab tshaj no los nrog xyuas kom ATO thiab tsoom hwv Australia yuav tsum tau qhia tias seb lawv coj tej nyiaj se mus siv ua dab tsi lawm?
Emilie Dye: Kuv xav tias tsim nyog tsoom hwv txhua cov tuam chav thiab txhua tus nom kis xeev tsim nyog qhia kiag qhov tseeb rau zej tsoom sawv daws paub tias lawv coj tej nyiaj se mus siv npaum li cas lawm. Thiab xav kom lawv muab tej nyiaj se uas raug coj mus siv lawm los teev ua ib cov excel charts kom tej neeg thiaj paub thiab pom thiab thiaj nrhiav tau saib. Tsis tsim nyog peb pheej mus nrhiav tej xov xwm no ntawm tsoom hwv 12 lub vassab uas peb tsis paub meej tias tsoom hwv siv tej nyiaj no mus ua dab tsi lawm.
Vixay Vue: Koj lub koom haum twb yog lub mus txheeb xyuas kiag tej hauj lwm no lawm tab sis twb tseem nyuaj heev thiab tsis muaj peev xwm mus txheeb tau tej xov xwm no yooj yim, ces zej tsoom Australia ib tug twg yuav mus txheeb xyuas mas ntshe tsis hais txog li pob?
Emilie Dye: Muaj tseeb. Vim kuv yeej tau los ua txhoj hauj lwm full-time los nrhiav tias seb tsoom hwv coj tej nyiaj no mus siv ntau npaum li cas ua dab tsi lawm. Yog li thiaj tsis yog tej yam yooj yim rau tej neeg sawv daws yuav cia li muaj peev xwm mus txheeb tau. Yus yeej muaj peev xwm sau ntawv thov txheeb tau tej xov xwm yog tias yus muaj nyiaj them tab sis tej zaum yus tus kheej yeej yuav tau them tus nqe kim heev thiab ces tej zaum yuav tsis muaj peev xwm txheeb tau tej xov xwm li tej koom haum loj uas muaj peev xwm them tej nqe txheeb tej xov xwm tau ntau zaus.
Vixay Vue: Tab sis koj puas xav tias yuav muaj txoj xub ke los tsim kom tau ib tsab cai los tswj kom nom tswv yuav tsum tau qhia tej nyiaj se nws coj mus siv no rau zej tsoom paub mas? Es kom txhua tsav yam raug coj los qhia tso tshav lug thiab qhia qhov tseeb dawb paug rau sawv daws paub, leej twg xav mus txheeb xyuas los tau, los yog ib tug twg ho xav paub es mus txheeb xyuas tias tej nyiaj seb uas tsoom hwv sau tau los raug coj mus siv ua dab tsi lawm los kom nws thiaj paub?
Emilie Dye: Yog kawg, kuv xav tias tib txoj xub kev yuav ua tau li hais ntawd ces yuav tsum tsim kom tau ib tsab cai coj los siv xwb. Vim tej xwm txheej tau tswm shim cuam tshuam txog tus nom Bridget McKenzie uas tswj cov nyiaj sports grants uas tau tawm nws txoj hauj lwm lawm yog ib yam ua rau sawv daws ib nyuag ras txog tej nyiaj se no me ntsis tuaj lawm, ces thiaj yog lub caij los tsim tsab cai no lawm kom thiaj tsim tau cov transparent system los tswj tej kev siv nyiaj kom muaj kev dawb huv.
Vixay Vue: Koj puas xav tias tsim nyog Australia muaj cov system siv li lwm cov teb chaws Five Eyes (Meskas, Askiv, Canada thiab New Zealand)? Lawv puas muaj cov system zoo li koj tau teev txog siv thiab?
Emilie Dye: Muaj los mas, lawv tseem muaj cov system zoo tshaj coj los siv thiab. Ib cov piv txwv zoo tshaj plaws ces yog lub tuam chav Congressional Budget Office uas lis tej dej num no ntawm teb chaws Meskas. Lawv yeej muaj cov Excel sheets ntau heev coj los qhia rau tej neeg kom nkag siab tau yooj yim thiab kom lawv nrhiav tau tej xov xwm txog nom tswv cov kev siv tej nyiaj se no sai heev. Vim lub koom haum no yeej muaj tau ntaub ntawv qhia txog txhua yam kev siv nyiaj teev tseg cia, thiab qhov tseem ceeb tshaj ces nom tswv siv nyiaj li cas yeej teev ncaj nraim li tau siv ntawd kiag, tsis yog yuav coj tej xov xwm los ua ib cov kev tawm tswv yim los yog ua ib yam dab tsi. Yeej tsis muaj kev muab tej xov xwm no lem li ub li no los yog hloov li ub li no, yeej yog cov xov xwm teev txog tej nyiaj uas siv tsawg kis los yeej teev tseg tib si cia. Uas kuv xav tias yog tej yam tseem ceeb heev, vim rau qhov yeej muaj ntau zaus tej nom tswv yeej muab tej xovxwm no ua txuj coj los tsim ib cov graph zoo zoo nkauj rau hauv tsoom hwv tej vas sab rau sawv daws tau saib xwbm tab sis qhov tseeb tiag yeej txawv txav deb heev ntawm tej xov xwm tau teev tseg ntawd. Yog li no peb thiaj xav tau tej xov xwm muaj tseeb tiag kom tej neeg thiaj muaj peev xwm rov qab mus txheeb tau kom txhob pub tej nom tswv ua txhaum thiab yuav tsum tau qhia qhov tseeb tias lawv tau siv tej nyiaj coj mus ua dab tsi li cas lawm.
Vixay Vue: Koj puas muaj lus dab tsi txhab ntxiv los yog hais rau Asutralia tej zejzog, los yog tej neeg ua hauj lwm them se rau tsoom hwv los yog hais rau tsoom hwv Australia li cas?
Emilie Dye: Kuv xav tias yog tej yam hauj lwm zoo uas Senator McGrath tab tom nrog xyuas cov hauj lwm no, thiab tau coj los ua nws ib cov hauj lwm tseem ceeb xyoo no. Yog li thiaj yog tej yam tseem ceeb thiab yog tej yam zoo uas muaj ib tug neeg kub sib thiab pab tej neeg ua hauj lwm them se rau nom tswv. Yog li kuv thiaj vam thiab cia siab tias nom tswv txhua lub tuam chav tsis hais ntawm nom tswv zejzog, nom tswv xeev thiab nom tswv teb chaws yuav kub siab los xyuas kom qhia tau qhov tseeb dawb paug tso tshav lug txog tej nyiaj seb seb lawv coj mus siv li cas lawm qhia rau zej tsoom sawv daws paub.
Vixay Vue: Ua tsaug ntau rau koj cov lus tawm tswv yim txog tsoom hwv cov kev siv tejnyiaj se nrog rau xov tooj cua SBS Radio Hmong Program nawb.
Emilie Dye: Ua tsaug ntau ntau nawb uas tseem cia kuv tuaj koom tawm tswv yim ntawm lub xov tooj cua no thiab.
