Yog tias koj yeej ib txwm tsav tsheb ces tej zaum yuav koj yuav ua tsheb sib tsoo tau ntawm koj lub neej thiab. Nod yog qee cov kev taw qhia tias tsim nyog koj yuav tau ua li cas thaum tsheb sib tsoo.
Nres koj lub tsheb rau ib thaj chaw nyab xeeb
Thawj yam koj yuav tau ua tom qab tsheb sib tsoo ces yuav tsum coj koj lub tsheb mus nres rau ib thaj chaw nyab xeeb ua ntej tso. Thiab yuav yog ib co kev ua txhaum cai yog koj ua tsheb sib tsoo es koj cia li khiav lawm. Yog tias tsaus tsaus tsis pom kev ces yuav tsum tau taws koj lub teeb harzard lights uas cig 4 lub daj rau pem tobhau thiab nram pob tw qhia rau lwm tus paub tias koj nres rau qhov chaw ntawd. Hos yog tias tsam tsis tau txais kev nyab xeeb ces ho tshem tej yam yuav tsim tau teeb meem tawm rau lwm qhov.
Txheeb xyuas seb lwm tus nrog koj caij tsheb los yog ua tsheb sib tsoo nrog koj puas tau txais kev nyab xeeb
Yog koj tsis raug mob sab, ces ho mus txheeb xyuas lwm tus neeg tsav tsheb tsoo koj, cov neeg tsav tsheb kauj vab, los yog cov neeg taug kev seb lawv puas raug mob li cas thiab. Tab sis tsis txhob muab lawv tshem yog tias lawv raug mob lawm tsuas yog tias yog cia lawv nyob qhov chaw ntawd ces yuav tsis tau txais kev nyab xeeb rau lawv xwb mas mam li tshem lawv rau lwm qhov xwb.
Source: CC0 Creative Commons
Hu xov tooj thov cov kev pab cuam emergency thiab hu kom tub ceev xwm tuaj pab.
Thaum koj hu rau 000 ces yog lub caij muaj neeg:
- Ib tug twg raug mob,
- Lwm tus neeg tsav tsheb qaug cawv los yog siv tshuaj thiab yaj yeeb.
- Yog ua tsheb sib tsoo puas tsuaj loj heev los yog yuav muaj tau teeb meem.
- Los yog tias lwm tus neeg tsav tsheb nrau koj tsis nres thiab tsis kam qhia nws tej xov xwm ntiag tug rau koj tab sis cia li khiav lawm.
Koj thiab lwm tus neeg tsav tsheb sib nraus yuav tsum qhia neb tej xov xwm ntiag tug rau ib tog twg
Feem ntau mas tsis tas yuav hu emergency tuaj pab li, tab sis koj thiab lwm tus neeg ua tsheb sib tsoo yuav tsum tau qhia tej xov xwm ntiag tug rau ib tog twg. Thiab txhua tus muaj feem cuam tshuam rau cov kev sib nraus no yuav tsum tau teev zwm tej xwm txheej no tseg, xws li:
- Hnub, sij hawm thiab thaj chaw ua tsheb sib tsoo,
- Lwm tus neeg tsav tsheb cov xov xwm li (Npe, xov tooj, chaw nyob, nws tus insurer, nws tus zauv tsheb, tsos tsheb/ hom tsheb dab tsi,
- Yog tias tus tsav tsoo koj tsis yog tus tswv tsheb, ces yuav tsum nug thiab teev tus tswv tsheb npe, chaw nyob, xov tooj,
- Los yog tias ua tau ces ho sau npe thiab xov tooj ntawm cov neeg pom thiab ua pov thawj pom tsheb sib tsoo,
- Hos yog tias muaj tub ceev xwm tuaj ces yuav tsum tau teev npe, lub chaw lawv ua hauj lwm thiab xov tooj.
Siv koj lub xov tooj ntawm tes yees duab tseg cia seb koj lub tsheb puas li cas.
Yog li thiaj muaj ntau yam yuav tau nco cia, thiab qhov yooj yim tshaj ces yuav tau sau tej hais no ua ib daim list thiab luam tseg cia rau koj lub tsheb tsam ho tau siv. Tsis tas li no los tseem muaj ntau cov apps uas koj siv tau li Car Accident Report thab iWrecked, uas yeej muaj cov list no rau koj siv thiab.
Yog tus tswv tsheb tsis tuaj rau ntawm thaj chaw tsheb sib tsoo, los yog koj ua txhuam kos lawv lub tsheb nres tom chaw nres tsheb, ces yuav tsum sau ib daim ntawv qhia koj tej xov xwm ntiag tug tseg cia nrog lub tsheb ntawd kom lawv paub sib txuas lus nrog koj.
Cej luam qhia txog cov xwm txheej tsheb sib nraus.
Yog tias tsis muaj tub ceev xwm tuaj pab, ces koj yuav tau qhia cov xwm txheej tsheb sib nraus rau tub ceev xwm lub chaw hauj lwm ntawm lub xeev koj nyob li 24 teev los yog 1 hnub ntawd yog tias tsheb sib tsoo muaj ceem es ho muaj ib tug twg raug mob los yog tas sim neej, los yog tsis tau xov xwm ntawm ib tog, los sis yog muaj ib tog hu kom lwm tus tuaj cab tsheb mus lawm los yog cov xwm txheej tsheb sib tsoo yuav poob nyiaj txog $3000 los tshaj ntawd.
Yog ho ua tsheb sib tsoo kos me ntsi los yog zuav me ntsis xwb ces tsis tas cej luam rau tub ceev xwm paub los tau, tab sis yeej xav koj qhia vim yog tej yam zoo, rau qhov cov tuam txhab muag nyiaj tuav pov hwm yeej yuav nug seb koj puas tau qhia tej xwm txheej no li cas rau tub ceev xwm paub thiab xav tau tus zauv teev cov teeb meem no.
Source: Getty Images
Hu kom lwm tus tuaj cab koj lub tsheb mus
Yog koj xav kom lwm tus tuaj cab koj lub tsheb mus ces hu rau cov towing company. Yuav tsum khawb lawv tej xov tooj cia rau koj lub tseb thiab khaws cia rau koj lub xov tooj thiab.
Hu nrog koj tus insurer sib tham.
Yog koj yuav cov insurance rau koj lub tsheb ces hu rau lawv kom sai li sai tau, vim tej zaum lawv kuj yuav pab hais kom cov towing company tuaj cab koj lub tsheb mus thiab.
Koj lub tuam txhab koj ua insurance nrog yeej xav tau li hauv qab no:
- Lwm tus neeg tsav tsheb tsoo koj lub npe, daim ntawv tsav tsheb, thiab xov tooj, thiab nws tus insurer,
- Koj lub tsheb cov registration number, xim, thiab yog hom tsheb dab tsi,
- Thiab sau ib cov lus luv luv qhia tias seb cov xwm txheej tsheb sib tsoo no tshwm sim li cas.
Tsis tas li no los cov Insurers yeej tsis xav kom koj lees tias koj yog tus txhaum txog rau thaum muaj cov neeg paub ntsuam xyuas txog cov tsheb sib tsoo tuaj txheeb xyuas kom tau qhov tseeb tso.
Thiab yuav tsum tswj koj lub siab kom tus tus, vim kev ua tsheb sib tsoo ua rau koj nyuaj siab heev, ces yog txhua tus muaj feem koom rau cov tsheb sib tsoo no ua siab txias ua raws tej txheej txheem ces yuav yooj yim dua rau sawv daws.
