Ntsiab lus tseem ceeb:
- Cov kev muaj peev xwm siv tau tej twj li cov app uas siv dawb thiab kawm tau hauv onlines pab kom kawm tau yooj yim.
- Tsoom fwv cov program qhia ntawv hu ua Adult Migrant English Program yog ib co program qhia ntawv Aakiv pab rau tej neeg tsiv teb tsaws chaw thiab neeg thoj nam uas tuaj nyob lub teb chaw no.
- Cov kev nyem tej ntawv sau hauv TV thiab nyeem tej ntawv nrog rau cov kev mloog tej ntawv kaw ua suab yuav pab kom kom paub tej kev cai siv ntawv yam koj tsis nco qab txog.
Yog tej yam nyuaj heev uas yuav muaj peev xwm siv los yog hais tau lus Aaskiv (English) kom npliag, thiab peb sawv daws yeej paub tias yeej yog tej yam nyuaj heev yuav mloog tau lub suab lus ntawm tej neeg Australia los yog nkag siab txog tej sob lus uas txhais tau ib yam ntsiab lus dab tsi.
Marcella Aguilar yog tus neeg Volunteer Tutor Coordinator nrog lub koom haum (AMEP).
Nws hais tias, tej neeg kawm ntawv Aaskiv yeej ntsib teeb meem nyuaj ntau yam, thiab thiab cov kev ntshai yog ib co teeb meem loj tshaj plaws.
“Tej zaum lawv kuj muaj hnoob nyoog dhau heev lawm, los yog lawv tsis tau kawm ntawv los ntev heev lawm, thiab tej zaum ho tsis tau kawm ntawv yav dhau los, thiab tsis paub tias yuav npaj tswv yim kawm li cas.”
Txawm li cas los kom nco tias, yeej muaj cov kev pab cuam rau cov kev kawm ntawv kom haum raws li tej neeg ntiag tug xav tau thiab, yog li ntawd ces kav tsij kawm.
Tej neeg yeej tsis kub siab txog yus cov kev siv lus yuam kev li. Vim ntawv los yog lus yeej siv coj los sib txuas lus nrog lwm tus, thiab tej neeg los tsuas xav hnov tias seb yus ho hais dab tsi xwb.Marcella Aguilar
Mus kawm ntawv Aaskiv kiag ntawm tej teej kawm
Raws li Alison Lennon uas yog tus coj tswj cov kev kawm ntawm lub teej kawm English Language College hais ces cov kev kawm ntawv Aaskiv kiag ntawm ib qho chaw kawm yuav kawm tau zoo dua.
Nws hais tias “Yog yus tau ua tib zoo kawm ntawv Aaskiv kiag lawm ces yuav pab tau yus txoj kev nrhiav hauj lwm rau yav pem suab zoo heev, los yog pab yus npaj rau yav tom ntej thiab kawm txuas ntxiv rau yav pem suab."
Thaum koj thov ib daig visa siv ces tej zaum nom tswv yeej xav kom koj muab tej pov thawj qhia tias seb koj kawm tau ntawv Aaskiv zoo npaum li cas thiab.
Tsoom fwv Australia yeej lees paub txog ntau cov kev xeem ntawv Aaskiv rau tej neeg thov visa siv. Tsis hais tej tsev kawm qib siab los yog qib nrab li TAFE, tej tsev kawm ntawv ntiav los yog tej chaw qhia ntawv yeej muaj cov sob kawm International English Language Testing System (IELTS), Cambridge Advance English (CAE) thiab Test of English as Foreign Language (TOEFL) uas tom qab kawm tiav thiab tshau txuj tau lawm ces yuav tau txaiv ntawv pov thawj.
Credit: Westend61/Getty Images/Westend61
“Tej tub kawm uas tuaj ntoj ncig thiab muaj kev lom zem xwb ces tsuas kawm cov sob kawm ntawv Aaskiv ua kawm nthuav dav xwb.''
“Ib txhia tub kawm uas xav kawm kom tiav ntawm tsev kawm qib siab ntawm lawv tej tsev kawm qib siab ntawm lawv tej teb chaws yuav tau kawm tej chaw uas qhia cov sob kawm cov sob kawm The Test of English for International Communication (TOEIC) thiab IELTS. Kom yus thiaj muaj lwm txoj xub kev xaiv rau yus kawm ntev txuas ntxiv ntawm tej TAFE los yog tsev kawm qib siab txuas ntxiv."
Tej tub kawm uas xav thov cov student visa siv los yuav tsum tau mus kawm ntawv Aaskiv ntawm ib lub teej kawm twg yam tsawg li 20 teev tim ntsej tim muag ntawm tej chav kawm rau ib limtiam twg thiab.
READ MORE
English for Work
Kuj muaj ib txhia tsev kawm ntawv npaj yus kom yus mus xeem seb siv tau ntawv Askiv zoo npaum li cas thiab.
Raws li Alison Lennon ntawm lub chaw qhia ntawv Langports tshab txhais ces nws piv txwv tias koj xav hloov koj cov visas los yog teev npe kawm hauv tsev kawm qib siab, ces tej zaum koj yuav tsum muaj ib daig ntawv pov thawj IELTS.
“Peb yuav xyaum kom lawv kawm cov sob kawm IELTS kom lawv thiaj muaj tej tswv yim thiab txuj ci uas yuav pab kom lawv muaj peev xwm mus xeem IELTS.”
Cov program qhia ntawv Aakiv Adult Migrant English
Tsoom fwv Australia lub tuam chav Department of Home Affairs yog tus tshwm nyiaj pab los qhia cov program qhia ntawv hu ua Adult Migrant English Program (AMEP) uas pab qhia kom tej neeg tsiv teb tsaws chaw thiab tej neeg thoj nam uas muaj hnoob nyoog lawm tau kawm thiab siv tau lus thiab ntawv Aaskiv kom zoo ntxiv tuaj.
Tam li Marcellar Aguilar yog ib feem ntawm AMEP cov Volunteer Tutor Scheme, ces nws yeej ua tib zoo txheeb kom nrhiav tau ib cov neeg qhia ntawv haum coj los qhia ntawv tim ntsej tim muag rau ib tug neeg kawm twg. Ces cov program no thiaj muaj peev xwm yuav pab tau ntau yam tseem ceeb.
Tsis yog tias lawv pab qhia ntawv nkaus xwb tab sis tseem pab kom tsim tau kev phooj ywg thiab txhawb nqa tej neeg uas muaj tej zaug raug cais thiab.Marcella Aguilar
Yus muaj peev xwm xaiv seb puas xav kom tus neeg qhia ntawv tuaj ntsib yus ntawm yus tsev, ntsib yus ntawm tsev saib ntawv, los yog sib ntsib ntawm zej tsoom ib thaj chaw twg los tau.
“Kuv thiaj xav txhawb nqa kom nej ib tug twg ho mus xyuas peb lub tsev kawm college, thiab nrog peb tej neeg ua hauj lwm uas paub hais ob hom lus tham, thiab txheeb seb nej puas yog cov neeg muaj cai kawm tej sob kawm no, ces mam txheeb seb nej ho paub ntawv thiab lus Aaskiv zoo npaum li cas, ces mam nrhiav ib tug neeg los qhia ntej."
“Tej neeg qhia ntawv ces yog yuav txhawb nqa yus tias 'Yus yeej muaj peev xwm kawm tau/ua tau - nws qhia tias kuv yeej nyob nraim ntawm koj ib sab yuav pab koj txhua txoj xub ke’.”
Ib tug poj niam neeg Taiwan tab tom siv ib lub paj taub dawb mloog nkauj/mloog xov xwm ua suab/thiab mloog cov phau ntawv nyeem ua suab. Credit: Peter Berglund/Getty Images
Tej tswv yim pab kom koj kawm tau ntawv Aakiv zoo tuaj ntxiv
Marcella Aguilar cov tswv yim tseem ceeb uas xav qhia rau koj:
- Kom saib tej ntawv uas sau ntawm TV (Teletext TV). Thiab xav kom koj nyeem tej ntawv ntawd thiab mloog kom swm nrog Australia tej suab lus, thiab kom yus paub txog Australia cov sob lus uas siv ntau los lus ua ke uas txhais tau ib lub ntsiab lus dab tsi.
- Download tej apps uas muaj peev xwm kawm ntawv dawb li Duolingo, Bitsboard, Oz Phonics thiab Book Creator siv.
- Nyeem cov phau ntawv uas kaw ua suab rau lub caij koj mloog ib tug neeg nyeem. Ces koj yuav hnov tias seb yuav tawm suab li cas rau ib lo lus twg, thiab ho yuav hais lus raws cov suab siab qes li cas, tib lub caij ntawd los koj kuj tau kawm tej kev cai siv ntawv nrog thiab.
Hester Mostert tej tswv yim zoo uas nws xav qhia rau koj:
- Zam tsis txhob pheej txhawj tias tsam yus hais yuam kev thaum yus mus rau tej khw supermarket. Vim yog ib co cib fim rau yus xyaum nrog tej neeg sau nyiaj tham me ntsis.
- Nrog tej neeg tsav thiab cai tsheb taxi los yog Uber tham tsis yog pheej kov yus lub xov tooj nkaus xwb.
- Mus koom nrog ib pab neeg uas nyiam ua ib yam dab tsi hauv tej zejzog, los yog ntau pab neeg cov kev sib tw dab tsi. Vim tsis yog yuav ua rau yus tau koom sib txuas lus nrog lwm tus xwb tab sis tseem tau xyaum kom yus tau siv tej txuj ntawv Aaskiv thiab pab kom yus muaj kev sib raug zoo tuaj ntxiv nrog yus lub zejzog thiab.
Credit: Image Source/Getty Images
kawm ntawv hauv online
Koj muaj peev xwm txheeb tau tej twj pab koj kawm hauv online uas ABC thiab SBS muaj rau koj kawm tau.
yuav pab kom koj kawm tau ntawv Aaskiv zoo tuaj ntxiv ua ke no los kuj pab kom koj tau kawm txog Australia tej kab lis kev cai thaum koj kawm thiab saib tej videos (yeeb yaj kiab), tej ntawv los yog mloog tej xov xwm kaw ua suab (podcasts) thiab.
