Ntsiab lus tseem ceeb:
- Nom tswv phaub ntawv qhia koj npaj xeem ua pej xeem yeej qhia txog txhua yam tsim nyog koj paub kom koj thiaj xeem tau ua pej xeem.
- Yuav muaj cov kev xeem no ua ntawv Aaskiv, yog li ntawd koj yuav tsum tau nkag siab txog tej lus thiab tawv Aaskiv zoo.
- Yeej muaj tej koom haum zejzog muaj tej chav kawm qhia pab koj npaj mus xeem ua pej xeem thiab muaj tej xov xwm ntau yam pab koj npaj mus xeem.
Australia yeej yog ib lub teb chaws muaj ntau tsav neeg sib txawv thiab coj ntseeg ntau yam kab lis kev cai, thiab muaj tej neeg tej caj ceg poj koob yawm koob tshaj 270 yam.
Tsis tas li ntawd los Australia kuj yog ntiaj teb ib lub teb chaws uas muaj tej neeg txum tim uas tseem coj ntseeg tej kab lis kev cai qub tshaj plaws ua ntuv zus txuas ntxiv, thiab yeej tau tos txais tej neeg tsiv teb tsaws chaw yuav laug txog li ntawm xya (7) million tus tuaj nyob ntawm lub teb chaws no txij li xyoo 1945 los no.
Muaj ntau txoj xub ke uas koj muaj peev xwm siv coj los xeem ua pej xeem Australia. Thiab koj yuav tsum poob rau tej ua ntej koj yuav mus thov xeem.
'Conferral' ces yog tej neeg tsis yog neeg Australia yeem thaj los ua pej xeem Australia thiab 'descent' ces yog koj yog tej teeb los yog tub ki xeeb leej xeeb ntxwv ntawm neeg Australia uas yog ob co criteria uas ib txwm pom tej neeg siv coj los thov xeem ua pej xeem.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
Eva Abdel-Messiah uas yog ib tug kws lij choj paub zoo txog cov kev tsiv teb tsaws chaw yeej tau pab tej neeg ntau pua tus kom tau los ua pej xeem Australia lawm.
Nws hais tias qhov tseem ceeb tshaj plaws mas koj yuav tsum poob raws li tej criteria uas tau teev tseg li koj yuav tsum yog ib tug neeg uas tau nyob kom txwm rau ib lub caij twg ntawm Australia no lawm.
Li thawj yam ntawd, ces koj yuav tsum thov tau ib daig visa siv raug cai ntawm Australia no rau lub sij hawm plaub xyoos yam tsis tawm ntawm lub teb chaws no mus rau lwm teb chaws tsis pub tshaj 1 xyoos.
Xyoo kawg ntawd ces koj yuav tsum yog ib tug neeg thov tau ntaub ntawv nyob ruaj (permanet residency), tsis yog thov tau ntaub ntawv nyob ib ntus (temporary) thiab koj yuav tsum tsis txhob tawm ntawm Australia no mus rau lwm qhov ntev tshaj 3 hlis rau lub sij hawm ib xyoos ntawm xyoo kawg ntawd.Eva Abdel-Messiah
Dua ntawm cov kev yuav tau xyuas kom koj tau nyob ruaj li hais ntawd lawm, tej neeg uas xav thov xeem ua pej xeem Australia yuav tsum yog cov neeg muaj hnoob nyoog tshaj 18 xyoo thiab yuav tsum qhia kom tau tias 'yog ib tug neeg zoo', (uas tsis raug txim dab tsi, coj cwj pwm zoo, ncaj ncees).
Ntxiv ntawd los yuav tsum yog tus neeg uas:
- Yeej npaj tias yuav nyob ntawm Australia los yog txawm nyob txawv teb chaws los yeej tseem muaj feem sub cuag nrog Australia.
- Paub lus thiab ntawv Aaskiv uas siv tau yooj yim.
- Muaj txij ci paub txog teb chaws Australia thiab paub txog lub luag hauj lwm tam li yog ib tug pej xeem Australia. Yog li ntawd thiaj yuav siv cov kev tshau txuj los ua pej xeem (Australian citizenship test) no coj los ntsuam tej neeg feem coob uas thov xeem ua pej xeem.
Raws li Ms Abdel-Messiah tshab txhais ces "Yog tias koj yog ib tug neeg muaj hnoob nyoog nto. Pib txij li 18 txog 59 xyoo, ces koj yuav tsum qhia kom tau tias koj yeej paub siv tau tej lus thiab ntaub ntawv Aaskiv yooj yim. Vim yuav siv tej txuj no coj mus interview thiab mus teb cov lus nug thaum xeem ua pej xeem ntawd."
Kevin Andrews uas yog Australia tus lis laj fai tsiv teb tsaws chaw thiab pej xeem tuav phau ntawv Australian Citizenship Test booklet ntawm nroog Melbourne, hnub zwj Hli (Monday), Oct. 1, 2007. (AAP Image/Andrew Brownbill) Source: AAP / ANDREW BROWNBILL/AAPIMAGE
Ms Abdel-Messiah hais tias cov kev xeem ua pej xeem Australia (Australian citizenship test) no muaj hom phiaj los txheeb tias seb koj muaj tej txuj ci thiab koj nkag siab zoo npaum li cas txog cov kev ua ib tug pej xeem Australia.
Tej no ces cuam tshuam txog cov kev swm nrog lub teb chaws Australia, nws tej neeg, nws tej cim, nws txoj kev ntseeg txog txoj kev tswj hwm democracy, tej cai, tej kev ywj pheej, thiab cov kev teeb tsa ntawm tej tsoom fwv.
Tsis tas li ntawd los tseem cuam tshuam txog cov kev totaub txog tias seb ho tsim tej cai no li ca ntawm teb chaws Australia, thiab qhia tias koj yeej kub siab yuav ua raws li tej cai coj tau tseem ceeb ntawm haiv neeg no, uas cuam tshuam txog cov kev ywj pheej, kev cam hwm, thiab vaj huam sib luag.
ces muaj 20 nqe lus nug uas muaj ntau lo lus teb rau koj xaiv. Thiab tej lus nug no yuav nug txog ntau yam sib txawv li Australia tej cim, tej xwm txheej keeb kwm tseem ceeb, tsoom fwv tej kev teeb tsa, thiab tej cai los yog tej luag hauj lwm ntawm cov kev ua ib tug pej xeem.
"Muaj tsib nqe lus nug ntawm 20 nqe uas muaj ntau lo lus teb rau koj xaiv teb no ces yog nug txog Australia tej kev coj taug ua zoo (Australian values -fwm lwm tus txoj kev ywj pheej thiab lub meej mom, fwm lwm tus txoj kev xaiv kev ntseeg, cov kev tawm tau tswv yim ywj pheej thiab cov kev muaj cai koom tau ua tub koom siab nrog ib lub koom haum twg), thiab yuav tsis pub koj teb tsib nqe lus nug no ib nqe twg yuam kev hlo li. Yog li ntawd koj yuav tsum tau cov zauv xeem txog lu 75% mas koj thiaj yuav xeem tau, uas tsuas pub koj teb yuam kev qee nqe lus nug me ntsis xwb.''
Tab sis yog tham txog cov lus nug uas nug txog Australian values ntawd, ces koj yuav tsum teb kom raug tag nrho xwb. Yog koj tseem teb ib nqe twg yuam kev los yog koj tsis teb ib nqe lus nug twg thiab, ces txhais tau tias koj xeem tsis tau lawm.Eva Abdel-Messiah
Lub tuam chav Department of Home Affairs (uas yog lub tuam chav uas sib cuag nrog lwm cov tuam chav, saib xyuas tej tswv yim npaj tseg yuav ua raws thiab tej cai cuam tshuam txog tej dej num: cyber thiab tej hauv paus txhim kho, kev ruaj ntseg thiab kev tsiv teb tsaws chaw, kev sib haum xeeb, pej xeem, tswj ciam teb chaws li ciam nruab ntug, nruab teb, nruag deg thiab saib xyuas tsis pub txawv teb chaws raus tes) lub vas sab ((homeaffairs.gov.au)) yeej taw qhia kom tej neeg nyeem nom tswv phau ntawv "".
Phau ntawv no yeej raug txhais ua 40 hom ntawv, thiab koj yeej muaj peev xwm mloog tau tej sob kawm uas kaw ua suab lus tau ntawm lub tuam chav no lub vas sab.
Tag nrho tej xov xwm uas koj xav tau coj los siv teb tej lus nug thaum koj xeem ntawd ces yeej nyob rau ntawm phau ntawv ''Our Common Bond'' no lawm. Thiaj xav koj koj yuav tsum tau nyeem thiab xyuas kom koj totaub ntxaws thiab ho sau thiab teev tej xov xwm tseem ceeb coj los pab kom koj ho nco tau tej xov xwm ntawd.
Tsis tas li ntawd los koj yeej tseem muaj peev xwm mus sim xeem tej lus nug txog hauv online ntawm ntau cov vas sab uas muaj ntsis zoo li cov lus nug xeem tiag ntawd tau thiab.
Ms. Abdel-Messsiah hais tias yeej muaj tej neeg coob kawg muaj peev xwm siv xov tooj mus thov xeem vim yuav tau txais kev yooj yim dua cov kev yuav tau mus txheeb ntau cov vas sab tej links ntawm yus tej computers thiab.
"Tej app uas siv hauv tej xov tooj tes yeej pab tau yus thiab. Kuv yeej ib txwm txhawb nqa tej neeg tuaj thov kev pab cuam ntawm kuv kom download tej apps no thiab siv sij hawm li peb caug ntiag tiv los yog ib teev twg txhua hmo los kawm. Thiab yeej muaj tej videos hauv YuTube qhia txog cov tej lus nug los yog cov kev xeem no thiab."
Nws hais ntxiv tias cov kev nkag siab txog peb theem nom tswv, tsev tsoom fwv teb chaws, thiab tus nom sawv cev rau huab tais Aaskiv tej luag hauj lwm kuj yog tej yam tseem ceeb thiab.
Yog li ntawd cov kev thov xeem ua pej xeem no thiaj yog ib cov kev ntsuam yus tej txuj ci txog Australia tej xwm txheej tseem ceeb thiab tej uas Australia cov neeg txum tim tau ua pab rau lub teb chaws no thiab tej neeg Australia uas coj ntseeg ntau yam kab lis kev cai siv txawv.
Thiab cov kev xeem no tsuas xeem ua ntawv Aaskiv (English) nkaus xwb. Yog li ntawd koj yuav tsum paub ntawv thiab lus zoo.
Tina Brown uas yog ib tug laus neeg tseem ceeb ntawm cov neeg txum tim Ngunnawal thiab tej neeg txum tim seev cev ua yeeb yam rau lub caij tsa chij thiab ua koob tsheej tos txhais pej xeem tshiab ntawm lub pas dej Lake Burley Griffin lub 1 hlis ntuj tim 26, xyoo 2020 ntawm Canberra, Australia. Uas neeg txum tim xam tias yog hnub 'Invasion Day' thiab muaj cov kev txhawb nqa ntau zuj zus tuaj koj mua hnub no hloov ua lwm hnub tshiab kom tag nrho txhua tus neeg Australia thiaj muaj peev xwm koom ua kev zoo siab tau. (Photo by Wendell Teodoro/Getty Images) Credit: Wendell Teodoro/Getty Images
Ms Abdel-Messsiah hais tias "Thaum uas muaj tej neeg tuaj ntsib kuv, ces kuv yeej txhawb nqa kom lawv npaj. Ib feem ntawm cov kev npaj no los mloog xov xwm ua lus Aaskiv thiab nyeem ntawv xov xwm ua ntawv Aaskiv. Thiab xyaum teb tej lus nug yam tsawg li ib zaug rau ib limtiam twg. Vim tias yog tam sim no peb xa tsab ntawv mus thov xeem lawm, ces tsis yog tias yuav tau xeem kiag tam sim ntawd; thiab tseem yuav tau tos rau lub sij hawm ntev txog li ntawm rau hli mus txog cua hli diam thiab mam tau xeem."
Yog tias koj xav tau txais kev pab kom koj thiaj paub mus txheeb tej xov xwm uas koj xav nyeem ntawm Department of Home Affairs lub vas sab thiab xav pab kom koj kawm tau ntawv Aaskiv zoo tuaj ntxiv, ces koj muaj peev xwm sib txuas lus nrog ntau lub koom haum ntawm koj tej zejzog thiab thov tau kev pab cuam los pab koj.
Piv txwv li lub koom haum Multicultural Services ntawm xeev New South Wales (NSW) thiab lub koom haum ntawm xeev Victoria yeej muaj tej chav kawm los npaj cov kev yuav xeem pej ua pej xeem no thiab yeej muaj tej xov xwm ntau yam coj los pab tej neeg uas xav ua pej xeem los npaj lawv cov kev xeem no.
Tej koom haum no yeej ib txwm muaj tej neeg paub qhia ntawv thiab muaj peev xwm qhia ib cov lus taw qhia thiab muaj kev pab cuam txog tej txheej txheem xeem no.
Vikki Hine ntawm lub koom haum Sydwest tshab txhais tias lawv tej sob kawm tau pab coob leej ntau tus neeg tsiv teb tsaws chaw tshiab, tej neeg thoj nam tawg tsov tawg rog, thiab tej neeg tuaj nyob ruaj ntawm Australia no npaj lawv cov kev xeem ua pej xeem.
Tej neeg yeej xav tau kev txhawb nqa thiab kev pab cuam los pab lawv npaj mus xeem pej xeem thiab kom lawv nkag siab txog tias cov kev thov ua tau pej xeem ntawm lub teb chaws no tseem ceeb npaum li cas rau lawv cov kev ruaj ntseg.Vikki Hine
Tej sob kawm no yeej muaj rau tej neeg tsiv teb tsaws chaw uas coj ntseeg ntau yam kab lis kev cai thiab hais ntau hom lus tau kawm. Tsis hais koj yuav yog tej neeg thoj nam li cas li, los yog ib tug twg uas nyuam qhuav tuaj txog ntawm Australia no, uas muaj cai thov tau kev pab cuam ntawm lub koom haum Settlement Services rau lub sij hawm thawj thawj tsib lub xyoo thaum tseem ntxov ntawd.
Sydwest ces yog lub koom haum uas tau xub tsim thawj cov chav kawm qhia txog cov kev thov xeem pej xeem no ntwm nroog Sydney sab hnub poob rau xyoo 2014.
Txij ntawd los ces Ms Hine hais tias tau muaj ntau puas tus neeg yeej mus xeem tau ua pej xeem thiab yeej tau txais lawv tej ntawv pov thawj pej xeem lawm.
"Tej chav kawm no yeej ua tib zoo txheeb ib nqe lus ntwg twg thiab tham txog nqe lus nug ntawd kom tau kawm txog qee yam keeb kwm. Tsis tas li ntawd los peb kuj coj tej neeg ua ntau pab mus ncig rau ib qho chaw qhov twg thiab tshab txhais txog thaj chaw ntawd kom lawv nkag siab. Piv txwv li peb kuj mus rau ntawm lub zos Katoomba thiab tham txog tej keeb kwm ntawm tej neeg tuaj tshawb kawm tej yam tshiab txog teb chaws Australia no thiab."
Ib tug neeg uas tau txais daim ntawv pov thawj tuav nws daim ntawv rau lub caij ua koom txoos tos txais pej xeem tshiab rau hnub Australia Day ntawm Brisbane, hnub zwj Teeb (Thursday) lub 1 hlis ntuj tim 26 xyoo 2017. (AAP Image/Dan Peled) Source: AAP / DAN PELED/AAPIMAGE
Nws hais tias cov kev lees paub thiab lees txais Australia tej kab lis kev cai no yuav paub kom yus nkag siab txog haiv neeg no thiab nws tej kev coj taug tshaj tej xov xwm tseeb uas yus nco tau ntawd lawm.
"Tsis hais yuav yog cov kev tham pem, tej kev ci nqaij noj, cov kev ntim su mus noj ntawm park, cov kev kawm txog tej nroj tsuag xyoob ntoo ntawm tej park. Tag nrho li tej hais no ces yeej yog ib co kev kawm rau yus thiab.''
Ms Abdel-Messiah kuj tau qhia txog qee yam uas pheej pom tej neeg ua yuam kev tas mus li los yog tej teeb meem uas pheej muaj rau tej neeg xav mus xeem ntawd kom tsis txhob ua rau lub caij lawv mus xeem ua pej xeem ntawd tias, xav kom ua tib zoo nyeem tej nqe lus nug ntawd kom zoo, thiab teb tej lus nug no raws li tej sij hawm tsawg tsawg uas lawv pub rau yus ntawd xwb, thiab kom tsis txhob maj maj kos rau tej nqe lus teb.
Ms Abdel Messiah hais tias "Peb yeej muaj cib fim mus xeem peb zaug diam. Tab sis tom qab xeem zum peb lawm ces yuav tsis pub peb xeem lawm. Txhais tau tias yuav tsum rov qab tau xa dua ib daim ntawv mus thov xeem dua tshiab."
