Tej kws kho mob thiab tej neeg ua lub neej nyob nrog tej pob txha phom (pob txha tsis ruaj) tau los tsim ib cov kev taw qhia thiab nqua hu kom zej tsoom Australia kub siab txog lawv tej pob txha kom tau txais kev noj qab nyob zoo.
Sussane Gervay uas yog ib tug neeg sau tej me nyuam yaus phau ntawv dab neeg 'I am Jack' ntau toom uas tau yeej khoom plig tau qhia tias ''Kuv yeej muaj keeb kwm mob pob qej txha los tau ntau xyoo, tab sis kuv yeej tsis paub li tias tus mob no yuav ua rau kuv mob tej pob txha phom/nkig tsis ruaj. Vim zoo li tej neeg tseem hluas li kuv yeej tsis tshua kub siab tu saib xyuas peb tej pob txhab, thiab txog thaum kuv tau ntog uas ua rau kev tej pob txha tav dam los zoo li kuv yeej tsis kub siab tu saib xyuas kuv tej pob txha li, thiab kuv tseem xav tias vim li cas kuv tej pob txha thiaj dam xwb?''
Nws hais ntxiv tias 'Kuv nim pog los kuj tas sim neej vim nws tus pob txha nrob qaum dam ces ua rau muaj dej txheem nws lub ntsws. Kuv niam kiag los kuj tas sim neej vim nws tej pob txha tsis ruaj ces ua rau nws mus tsis tau kev. Thiab kuv yeej tsis xav tias kuv yuav tau tus mob zoo li no li.''
Raws li lub koom haum Healthy Bones Australia tsab ntawv cej luam qhia ces xyoo 2012 xwb twb muaj tej neeg tej pob txha tsis ruaj/khov ntau tuaj ntxiv txog 34 feem pua lawm. Thiab tej kws paub zoo txog tus mob no yeej tau kwv yees tias ntshe txog xyoo 2033 ces ntshe yuav muaj tej neeg pob txha tsis ruaj ntau txog li 7.7 million tus lawm.
Australia los kuj yog lub teb chaws muaj tej pej xeem muaj hnoob nyoog tuaj ntxiv. Raws li cov kev txheeb pej xeem xyoo 2021 teev tseg ces Australia tej pej xeem hnoob nyoog 50 xyoo los yog siab tshaj ntawd twb muaj txog li 30 feem pua lawm. Tsaib no ces txhua txhua 2.7 ntiag tiv twg (minutes) yeej muaj ib tug neeg twg pob txha dam, ces thiaj ua rau muaj tej neeg pob txha dam txog 193,000 zaug diam.
Tej xwm txheej pob txha dam no tsis yog tias ua rau poob nyiaj kho mob xwb tab sis tseem ua ib cov mob nkeeg rau tej chaw kho mob thiab ua ib co teeb meem rau teb chaws Australia thiab.
Professor Perter Wong uas yog tus Medical Director ntawm lub koom haum Healthy Bones Australia thiaj hais tias ''Cov pob txha ntsag dam yog ib co txaus txhawj xeeb tshaj plaws, vim yuav tau siv nyiaj ntau tshaj AUD 45,000 mus kho tus neeg ntawd, tab sis tseem yuav muaj lwm yam nqe siv ntxiv coj los pab kho kom tsis txhob mob, kom muaj neeg tu tus neeg ntawd, thiab nws tsev neeg. Thiab tom qab ib tug twg pob txha ntsag dam rau lub caij 1 xyoo ntawd ces yeej muaj tej neeg no li ntawm 1 tug ntawm 3 tug twg kuj yuav tas sim neej tau thiab.''
Thiaj tsis yog cuam tshuam txog tej pob txha ntsag dam nkaus xwb yeej muaj tej pob txha caj dag teg, pob txha nqaj qaum (pob txha nrob qaum), pob txha ceg, pob txha caj npab dam uas yog tej xwm txheej pob txha dam pom muaj tas mus li thiab.
Yog li ntawd thiaj muaj cov kev nqua hu kom tej neeg kub siab mus tshuaj ntsuam nrog tej kws kho mob seb puas yog tau tus mob pob txha tsis ruaj/nkig thiab dam tau yooj yim li osteopenia thiab osteoporosis, los yog puas mob raws caj ces thiab nrhiav kev pab thaum ntxov kom raug tej mob nkeeg no qeeb zog, uas thiaj yuav pab tau kom tej pob txha ruaj khov.
rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm ,, , thiab los yog download thiab kom koj mloog tau SBS Hmong.
