This article is more than 1 year old
Xav hloov ua hauj lwm tshiab lod? Nod qhia tias tej hauj lwm twg khwv tau nyiaj npaum li cas
Puas yog tias koj xav kawm kom tau ib co txuj ci tshiab los yog xav hloov ua dua hauj lwm tshiab? Nod yog tej koj tsim nyog paub txog tej cib fim thiab teeb teeb meem uas tej zaum koj yuav ntsib koj yuav ntsib.
Published 5 October 2023 11:44am
By David Aidone
Presented by Vixay Vue
Source: SBS
Image: Eesha Katyare and her daughter Myra. Katyare started her career as a dental assistant and now works in IT. (Supplied / Eesha Katyare)
Yog tham txog Eesha Katyare lawm ces cov kev hloov ua dua hauj lwm tshiab yuav tau lub neej pem suab zoo dua rau nws tus ntxhais.
Katyare muaj hnoob nyoog 26 xyoo thiab kuj ua ib tug neeg ua hauj lwm pab tej kws rho hnyiav los tau tsib xyoos no lawm, txawm tias nws nyiam ua nws txoj hauj lwm heev, los nws tsis ntseeg tias txoj hauj lwm nws ua no yuav khwv tau nyiaj txaus los pab rau nws tsev neeg.
Katyare tau hais tias ''Kuv tus ntxhais twb muaj ob xyoos tam sim no lawm; thaum nws tseem muaj rau hli ces kuv pheej saib nws thiab xav tias, 'tsim nyog muaj ib lub tsev rau nws nyob, tsim nyog nws tau txais kev zoo siab', ces kuv thiaj tau txiav txim siab hloov hauj lwm tshiab.''
Yog li ntawd tsaib no tus neeg nyob ntawm nroog Melbourne no thiaj tau mus teev zwm npe kawm ntawm cov sob kawm Certificate IV rau cov sob kaw Information Technology (IT) uas kawm tsi ntsees txog programming thiab database development ntawm ib lub teej kawm. Tos nws ho kawm IT los vim nws txiv yeej ua cov hauj lwm no, thiab vim muaj kab mob COVID-19 sib kis coob uas yeej ''tau qhia rau peb lawm tias yog peb tej technology siv tsis tau ces peb yeej tsis muaj peev xwm ua hauj lwm.''
Nws tau hais tias "Kuv xav tias yog thaum yus laus lawm ces yeej yuav muaj tiam tshiab uas txhua tsav yam yeej siv techology lawm xwb."
Mloog tau zaj xov xwm qhia txog tej sob kawm fee-free TAFE uas tej zaum koj muaj cai kawm ntawm koj lub xeev tau ntawm no.
READ MORE
Cov sob kawm fee-free TAFE
Eesha Katyare nrog nws tus txiv Liam, athiab nkawv tus ntxhai Myra. Katyare tau hais tias Liam txhawb nqa thiab pab nws heev rau lub caij nws tseem kawm. Source: Supplied / Eesha Katyare
Thiab nws muaj ib cov lus taw qhia rau tej neeg uas xav tias yuav hloov ua dua hauj lwm tshiab tias.
"Yog koj muaj cib fim ua, ces kav tsij ua ntag."
Tej hauj lwm uas Australia xav tau
Cov hauj lwm cuam tshuam txog technology thiab digital yog ib co ntawm ntau yam lagluam uas raug lees paub tias yog ''ib co hauj lwm tsem ceeb ntawm rau haiv neeg no" raws li cov kev pom zoo uas thawj pwm tsav Anthony Albanese thiab tej hau xeev tau pom zoo txhawb nqa thaum koom rooj sab laj tsaib no.
Cov kev pom zoo no muaj lub hom phiaj los npaj kom tau ''tej neeg paub ua hauj lwm rau tej lagluam tshiab, lagluam tu thiab saib xyuas tej laus thiab tej me nyuam yaus, lagluam ntoj ncig thiab tos txais qhua, lagluam txhim kho (tsim vaj tse/choj/kev tsheb), services thiab cog qoob loo,'' uas yog ib co lagluam uas yuav tau kawm cov sob kawm .
Brendon O'Connor uas yog tus nom tswj tej dej num xyaum qhia kom tej neeg muaj txuj ci paub ua hauj lwm tau hais ib cov lus tawm tswv yim rau lub caij koom lub rooj sab laj National Skills Week tim 21-27 lub 8 hli ntuj 2023 tias "Yog ua tib zoo xyuas tag nrho tej hom phiaj ntawm tsoom fwv teb chaws thiab tsoom fwv xeev ces yeej pom tau tias yog tsis muaj tej neeg paub ua hauj lwm ces ntshe yuav tsis pab kom tej lagluam tseem ceeb loj hlob huam vam li. Ces thiaj muaj ntau yam lagluam tsis hais yuav yog tej lagluam tu tsom kwm, los yog tej lag luam cuam tshuam txog tej roj tej gas thiab tej hluav taws xob nrog rau lwm cov lagluam ntxiv thiab."
Raws li tej kuj tau teev txog tej hauj lwm 20 yam uas tej lagluam xav tau tshaj plaws ntawm teb chaws Australia tias.
Tej hauj lwm registered nurses thiab cov neeg tu saib xyuas lwm tus, tej kws ua zaub mov noj, thiab tej neeg ua cov hauj lwm information and communications technology systems analysts yog cov uas tej lagluam xav tau heev.
Thiab tej nyiaj hli xam ua tus zauv nrab uas khwv tau rau tej hauj lwm no pib txij li ntawm $55,000 txog $380,000, raws li lub koom haum SEEK uas yog ib lub koom haum nrhiav neeg ua hauj lwm qhia.
Thiab raws li tej xov xwm tshiab tau los ntawm lub koom haum ces yeej pom tau tias tej neeg ua cov hauj lwm no full-time ces yeej khwv tau nyiaj ib limtiam twg txog li $1,838.60 los yog khwv tau $95,581,20 rau ib lub xyoo twg. Hos yog xam rau lwm cov neeg ua hauj lwm ces tsuas khwv tau $1,400.20 ib limtiam twg los sis yog khwv tau $72,810.40 ib xyoos twg xwb.
Australia's in-demand occupations. Source: SBS / Kenneth Macleod
Australia's most in-demand occupations. Source: SBS / Kenneth Macleod
Tej xov xwm tsim nyog koj paub txog yog koj xav nrhiav hauj lwm tshiab ua los yog kawm ib yam txuj kom paub ua tau hauj lwm zoo tshaj qub ntxiv
ABS tej xov xwm teev txog uas tau coj los qhia rau lub 6 hli ntuj dhau los qhia tias, yeej muaj tej neeg 1.3 million tus tau hloov ua dua hauj lwm tshiab los txog rau lub 2 hlis ntuj dhau los xyoo (2023) no.
Ces pom tau tias ib feem peb ntawm tej neeg uas hloov ua hauj lwm tshiab no ''xav kom tau ua txoj hauj lwm zoo tshaj qub los yog xav hloov ua dua txoj hauj lwm tshiab."
Raws li Vitoriya Fedorova uas yog ib tug neeg sab laj txog tej hauj lwm ntawm lub teej kawm Chisholm TAFE hais, ces tej neeg uas xav hloov ua dua hauj lwm tshiab los yog xav kawm kom paub ua hauj lwm tshaj qub yeej tsis tshua nyiam tej hauj lwm lawv tab tom ua tam sim no los yog ua los zoo li tsis nce qeb li.
Fedorova thiaj hais tias "Tej zaum kuj yog ib cov kev xav uas tag nrho peb sawv daws yeej ntsib rau ib lub caij twg xwb thiab. Tab sis yog tias pheej ua rau yus muaj chaw khuam siab tau ntau hli los yog ntau xyoo lawm ... ces tej neeg yuav pib nug lawv tus kheej tias puas yog lawv ua tej hauj lwm yuam kev lawm."
Fedorova tau hais tias yeej muaj hauj lwm ntau yam uas tej lagluam xav tau neeg ua hauj lwm tab sis yuav tsum kawm kom tiav ib theem txuj dab tsi li tej hauj lwm tu tsom kwm lwm tus thiab tej hauj lwm qhia thiab zov los yog saib xyuas tej me nyuam yaus uas tseem kawm early childhood education ntawd.
"Yog li cov kev kawm kom tiav ib theem txuj kom tau tej hauj lwm no thiab yog thawj kauj ruam tseem ceeb rau tej neeg uas tseeb tab tom xav hloov ua dua hauj lwm tshiab thiab pab kom lawv muaj tej txuj ci uas yuav ua tau tej hauj lwm ua lawv xav ua ntawd."
"Thiab thaum uas yus muaj txuj ci thiab paub ua hauj lwm ntau tuaj ntxiv lawm, ces yus thiaj muaj peev xwm mus kawm qib siab ntxiv kom ua tau hauj lwm zoo tuaj ntxiv."
Katyare tau hais tias nws yuav tau mus kawm ntawm tej chaw kawm 4 hnub ib limtiam twg rau lub caij nws tseem kawm. Thiab lub caij uas thaum nws thov so yug me nyuam thaum tseem ua txoj hauj lwm pab kws rho hniav ntawd, ces kuj yog tej yam nyuaj kawg rau nws, vim yuav tau kawm, yuav tau siv caij nyoog nrog yus tsev neeg thiab tseem yuav ua hauj lwm casual rau ob hnub so ntawm ib lub supermarket thiab. Nws tau qhia tias nws tsuas tau nyeem ntawv tom qab uas nws tus ntxhais pw lawm xwb, tab sis kuj muaj hmoo heev uas nws tus txiv los kuj pab thiab txhawb siab rau nws heev.
Yog li ntawd nws thiaj hais tias cov kev hloov ua hauj lwm tshiab thiaj yog tej yam tsis yooj yim thaum uas muaj ntau tsav yam tseem ceeb yuav tau ua ntawm yus lub neej.
"Xav kom sawv daws ua tib zoo xav tias seb yus xav ua dab tsi tiag thiab xyuas seb ho yuav siv sij hawm ntev npaum li cas, vim cov kev hloov ua hauj lwm tshiab yog tej yam hloov tsis tau yooj yim, thiab yuav tau siv caij nyoog ntev heev."
Tej xub ke pab kom yus muaj txuj ci paub ua hauj lwm tshaj qub ntxiv yam tsis tau them dab tsi
Tsoom fwv teb chaws yeej tau koom tes nrog tej nom tswv xeev yuav tshwm nyiaj pab tej neeg kom tau kawm tej sob kawm dawb fee-free TAFE
180,000 qhov chaw kawm.
Tam sim no tsoom fwv teb chaws tseem tab tom sib khom nrog tej nom tswv xeev kom ua tau cov hauj lwm no txuas ntxiv rau xyoo 2024 thiab. Nws kuj tau cog lus tias yuav tshwm nyiaj $414 million los tsim kom tau tej chaw kawm li 300,000 qhov chaw uas kawm fee-free TAFE ntxiv thiab.
Tej sob kawm fee-free TAFE no yuav yob ib cov sob kawm "qhia txog tej txuj ci tseem ceeb uas haiv neeg no xav tau ua ntej tshaj plaws" thiab muaj qee zaus ces yuav los txheeb tias seb tej xeev ho xav tau tej txuj ci tseem ceeb dab tsi rau tej hauj lwm dab tsi thiab.
Ces thiaj muaj cov criteria siv sib txawv thoob teb chaws no teev tseg tias leej twg yog cov muaj cai kawm tej sob kawm no. Piv txwv li ntawm xeev Victoria no ces, ib tug twg muaj peev xwm kwm tau ntau cov sob kawm uas kawm dawb xwb yog tias yog cov sob kawm ''uas tseem ceeb rau tej lagluam'' hos ntawm xeev Queensland ces tsuas tau kawm ib yam sob kawm twg dawb xwb.
Hos lwm lub xeev ces twb tag sij hawm rau cov kev tau kawm tej sob kawm fee-free TAFE xyoo no lawm.
Fedorova tau hais tias tsis tas li ntawd los tej tswv lagluam kuj muaj peev xwm pab kom tej neeg hloov ua dua tej hauj lwm tshiab thiab pab kom tej neeg tau kawm tej txuj ci kom lawv paub ua hauj lwm zoo tshaj qub ntxiv thiab. Ces tej zaum thiaj tsis tas yuav mus kawm ib co sob kawm twg uas tsis tsim nyog kawm thiab.
Nws tau hais tias "Peb ib txwm pom tias tsim nyog tej neeg sawv daws mus nrog lawv tus tswv lagluam tam sim no sab laj. Yus tsis tas qhia rau lawv tias yus xav hloov ua txoj hauj lwm tshiab; tab sis tsuas qhia rau lawv tias yus xav kawm kom paub ib cov txuj ci twg ntxiv xwb."
Fedorova thiaj tau hais tias tej zaum yuav muaj ib tug tswv lagluam twg yuav pab ib tug neeg ua hauj lwm twg kom muaj ib yam txuj ci twg thiab. Yog tia lawv tsis muaj peev xwm ua tau, ces seb lawv ho puas pab tus neeg ua hauj lwm ntawd mus kawm rau ib qho chaw kawm twg.
Nws tau hais tias "Yus tsis tas yuav kom kom tag ib qib kawm twg kiag, thiab tsuas kawm ib co txuj twg tsi ntsees los yog kawm ib co sob kawm luv luv twg xwb ces tau lawm."
Koj muaj peev xwm txheeb tau raws li cov links ntawm tej xeev no kom thiaj pab tau koj txheeb tau tej xov xwm ntxaws txog cov sob kawm fee-free TAFE ntau ntawm tej xeev li xeev: , , , thiab xeev .
Share
