Instagram tab tom yuav xyuas kom nws lub social media platform no siv tau txais kev nyab xeeb zog rau tej me nyuam yaus rau lub caij uas muaj tej kev tsis pom zoo hais tias tej social media ua rau muaj teeb meem rau tej hluas lub neej.
Tam sim no ces Meta uas yog lub tuam txhab tswj lub app Instagram yuav los tsim ib co kev pov puag tej account no thiab xyuas kom tej niam txiv muaj kev tso siab rau 'tej hluas tej account tshiab'.
Nod yog tej uas peb paub txog.
Tej hluas cov Instagram accounts yog dab tsi?
Raws li ntau cov kev hloov tshiab ces, ib tug twg uas muaj hnoob nyoog 18 xyoo uas qhib ib phau Instagram siv ntawm teb chaws Australia, Meskas, Askiv thiab Canada ces yuav siv qee cov kev txwv coj los tswj lawv tej accounts.
Thiaj yuav ua rau lawv tej accounts yog cov private account, tswv tsis pub siv tau cov messaging yooj yim, thiab tej hluas tsuas tau txais tej message los ntawm tej neeg lawv caum qab los yog twb tau sib cuag nrog lawm xwb.
Tsis tas li ntawd los Meta kuj tau qhia ntxiv thiab tias tej "Sensitive content," li tej videos uas tsis tsim nyog tej hluas saib li tej neeg sib ntaus thiab tej txheej txheej phais kho cev kom zoo nkauj yuav txwv tsis pub lawv saib lawm.
Tsis tas li ntawd los yog tias tej hluas nyuam qhuav nto nkauj nto raug siv lawv phau Instagram ntev tshaj 60 ntiag tiv lawm ces yuav muaj ib qho ''sleep mode'' los yog qhov tua tsis pub qhia dab tsi rau lawv los yog tsis pub lawv xa tau tej auto replies messages rau lwm tus txij 10pm txog 7am lawm.
Txawm tias yuav siv cov settings no rau tag nrho tej hluas, los tej hluas hnoob nyoog 16 thiab 17 xyoo yeej muaj peev xwm muab tej no tua tau thiab. Tab sis yog tej me nyuam hnoob nyoog qes dua 16 xyoo lawm ces yuav tau txais kev tso cai ntawm lawv niam lawv txiv mas thiaj ua tau.
Thaum twg mam li siv cov kev txwv no rau tej hluas cov Instagram accounts?
Twb tau pib siv cov kev pauv hloov no txij hnub tim 17 lub 9 hli ntuj (2024) rau tej neeg qhib tej account tshiab siv lawm.
Tej hluas uas nyuam qhuav nto nkauj nto raug uas twb yeej tab tom siv lawv tej Instagram account lawm ces yuav raug hloov mus siv tej accounts uas raug txwv li hais no rau lub caij 2 hlis ntxiv tom ntej no.
Meta tau hais tias thiab yuav coj cov kev pauv hloov tshiab no coj los siv ntawm lub koom haum European Union yav lig xyoo no, thiab yuav siv thoob rau ntiaj teb no rau lub 1 hlis ntuj.
Ho yuav siv cov kev hloov rau tej hluas cov accounts no li cas?
Meta yeej lees paub tias tej zaum tej hluas no yuav dag tsis qhia lawv tej hnoob nyoog tseeb, thiab tau hais tias yeej yuav hais kom lawv yuav tsum tau qhia lawv tej hnoob nyoog ntawm ntau qhov chaw.
Meta tau hais tias nws kuj tseem tab tom yuav tsim ib co technology uas yuav los ua tib zoo txheeb tej accounts uas yog tej hluas li, txawm tias tej accounts ntawd raug teev rau cov lists ntawm tej neeg uas muaj hnoob nyoog lawm.
Vim li cas thiam tsim tej hluas cov Instagram accounts tshiab no coj los siv?
Tau muaj tej lus tshaj tawm no rau lub caij uas lub tuam txhab no tseem ntib ntau rooj plaub ntawm teb chaws Meskas uas liam tias tau tsim teeb meem tsis zoo rau tej hluas thiab tau ua rau tej hluas ntsib kev nyuaj siab vim nws yeej paub thiab txhob txwm tsim tej twj siv ntawm Instagram thiab Facebook ua kom tej me nyuam yaus quav tej platforms.
Ua ke no los Meta kuj tseem tsis tau qhia tias cov kev pauv hloov no ho yuav ua rau muaj teeb meem rau nws tej lagluam li cas, tab sis lub tuam txhab no yeej tau hais tias cov kev hloov no yuav ua rau muaj tej hluas siv cov Instagram no tsawg zog rau ib lub caij luv luv no lawm.
Jasmine Enberg uas yog ib tug Emarketer analyst tau hais tias tej kev pauv hloov no ''tsuas ua rau muaj teeb meem rau tej nyiaj khawv tau los me ntsis xwb.''
Nws tau hais tias "Txawm tias Meta yuav tau xub kub siab txog tej hluas cov kev nyab xeeb ua ntej tshaj plaws txuas ntxiv , los tej zaum kuj yuav tsis yog ib cov kev pauv hloov loj uas yuav ua rau muaj teeb meem nyiaj txiaj loj dab tsi thiab,''
Enberg tau hais tias tej hluas tej accounts tshiab no yuav tsis muaj teeb meem dab tsi rau lawv cov kev siv lawv tej Instagram account, vim yam tsawg yeej tseem muaj ntau txoj xub ke lug hla tej cai, thiab tej zaum kuj yuav txhawb nqa kom tej hluas kub siab txog cov kev txwv tej hnoob nyoog.''
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
