Tsis hais yog tej dej qab zib, tej cereals thiab tej zaub mov uas ua tau lawm cia li noj los yog tej uas coj los rhaub kom sov mam noj yog tej uas tau ua rau zej tsoom rov qab kub siab txog tom qab muaj ib co kev teeb txheeb tau qhia tias cov kev noj tej zaub mov li no ntau muaj kev cuam tshuam nrog cov kev yuav muaj 30 yam mob.
Cov kev teeb txheeb uas tau coj mus nthuav tawm rau ntawm phau ntawv xov xwm BMJ medical journal (3 hlis ntuj 2024) ntawd ces yog tau mus txheeb txog tej pov thawj tej zaub mov ultra-processed foods (UPFs) uas ua rau tsis tau txais kev noj qab nyob zoo.
Tej kws teeb txheeb tshawb tau tias yeej muaj pov thawj ''zoo tib yam uas qhia tau qhov tseeb'' tias cov kev noj tej zaub mov UPFs no muaj kev cuam tshuam yuav raug kev phom sij ntau tuaj ntxiv suav cov kev mob plawv, mob ntsws thiab muaj kev ntxhov siab, mob ntshav qab zib hom 2 thiab tas sim neej ntxov dua lub caij tsim nyog.
Tej kev txheeb no thiaj tsuas ''qhia txog qhov dav dav'' thiab ''tau ua rau muaj lus nug txog cov kev noj tej zaub mov ultra-processed foods thiab cov kev tsis tau txais kev noj qab haus huv vim pheej coj tej cwj pwm noj tej zaub mov tsis muaj txiaj ntsiam pab rau lub cev.''
Yeej muaj neeg noj tej zaub mov UPFs no txog li 40 feem pua ib hnub twg ntawm teb chaws Australia.
Tab sis tej zaub mov ultra-processed foods ho yog tej zaub mov dab tsi, thiab tej kev teeb txheeb no ho hais li cas, thiab ho muaj tej zaub mob no dab tsi uas tsim nyog yus yuav tau zam tsis txhob noj?
Cov zaub mov ultra-processed foods (UPFs) yog tej zaub mov dab tsi?
Raws li Daisy Coyle uas yog ib tug neeg paub txog tej txiaj ntsim ntawm tej zaub mov thiab yog ib tug neeg teeb txheeb ntawm lub koom haum George Institute for Global Health hais ces tej zaub mov UPFs no yog tham rau kis dav dav lawm ces yog tej zaub mov uas yeej tsis yog tej ntuj tsim los.
Nws tau hais tias ''Tej zaub mov Ultra-processed foods ces yog tej uas tej uas ib lub factory twg tsim thiab siv ntau cov txheej txheem los tsim. Tej zaub mov no ces muaj ntau yam tov xyaw rau uas peb yeej tsis ib txwm siv, los yog tsis muaj siv hauv peb tej chav ua noj ntawm peb tsev — li tej kob (Xim), cov khoom tov rau kom muaj cov tsos qab (flavours), los yog lwm yam tov ntxiv rau (Additive) kom ntxim qab, cia noj tau ntev, los yog tej tshuaj xyaw kom tej zaub mov sib xyaw ua ke zoo los sis khaws cia noj tau ntev.''
Nws tau hais tias tej khoom noj no ces yeej ib txwm xyaw ntsev ntau, xyaw piam thaj ntau, muaj tej roj khub khov ntau — thiab muaj vitamins, minerals thiab fibre tsawg.
Yeej muaj ntau hom cereals uas tej neeg noj tshais ces yog cov zaub mov ultra-processed foods. Source: Getty / Grace Cary
Nws hais tias "Thiaj yog ib co teeb mem loj kawg nkaus li. Vim peb yuav tej zaub mob no ntau heev, thiab yeej muaj peb coob leej ntau tus tsis ras txog tias tej zaub mov ntawd yog cov zaub mov ultra-processed foods."
Tsis hais Coyle tej hauj lwm nws ua los yog nws cov kev teeb txheeb uas tau qhia rau lub 3 hlis ntuj xyoo 2024 yeej tau teev tias, tej zaub mov ultra-processed food yeej raug teev raws li cov NOVA system, uas faib cov hom zaub mov raws li tej txheej txheem tau siv coj los tsim. Hos lwm cov system siv coj los cais tej zaub mov ces yog cais raws seb muaj tej txiaj ntsim zaub mov dab tsi.
Thiab raws li tau muaj cov kev teeb txheeb txog lwm cov system uas siv los cais cov hom zaub mov lawm ces yeej pom tias tej teb chaws uas khwv tau nyiaj ntau (suav Australia thiab Meskas nrog) yeej yog cov teb chaws uas noj tej zaub mov UPFs ntau txog li 42 txog 58 feem pua diam, tab sis kuj muaj ib co teb chaws li Italy thiab South Korea ces tsuas noj tej zaub mov no tsawg txog li 10 thiab 25 feem pua xwb.
Thiab yeej muaj ntau yam zaub mov no ''coj mus muag ntau tuaj ntxiv thiab muag zais tshaj plaws ntau tuaj ntxiv'' — hais tsi ntsees yog muag rau ntawm cov teb chaws ntau lub uas muaj pej xeem coob uas khwv tau nyiaj tsawg thiab khwv tau nyiaj nrab.
Muaj kev teeb txheeb tshiab qhia dab tsi txog tej zaub mov UPFs?
Australia thiab zejzog pej kum haiv tej kws teeb txheeb cov kev teeb txheeb uas tau coj los nthuav tawm ntawm phau ntawv xov xwm BMJ yeej tau los ua tib zoo txheeb ntxaws txog 45 cov kev tshuaj ntsuam thiab los txheeb 14 tsab xov xwm uas cuam tshuam nrog tej neeg koom tej kev teeb txheeb no yuav laug txog 10 million tus.
Tej kws teeb txheeb kuj txheeb tau tias cov kev pheej noj tej zaub mov ultra-processed foods ntau tas mus li ces yuav muaj kev cuam tshuam ua rau muaj 32 yam mob tau.
Thiab yeej muaj pov thawj ''txaus ntseeg'' qhia tias yuav ua rau muaj cib fim txog li 50 feem pua mob plawv thiab hlab plawv ua rau tej neeg tas sim neej, muaj cib fim ua rau tej neeg muaj kev txhawj xeeb txog li 48 txog 53 feem pua thiab muaj kev nyuaj siab ntxhov plawv, thiab yuav ua rau muaj cib fim yuav mob ntshav qab zib hom 2 txog 12 feem pua ntau tuaj ntxiv.
Tsis tas li ntawd los kuj tseem muaj tej pov thawj ''uas qhia tias tej zaum'' yuav ua rau tej neeg noj tej zaub mov no muaj cib fim tas sim neej txog li 21 feem pua thiab vim lawv lub cev muaj ceeb thawj, tsis tau pw txaus thiab muaj kev nyuaj siab ntxhov plawv.
Txawm li cas los tej kws teeb txheeb kuj tawm tswv yim tias yeej muaj pov thawj tsawg qhia tias tej zaub mov no muaj kev cuam tshuam txog cov kev mob hawb pob, mob plab thiab hnyuv los yog ib co cancer twg.
Coyle thiaj hais tias cov kev rov qab mus txheeb ntau cov kev teeb txheeb no ''yog tej yam qhia txog qhov tseeb uas txaus txhawj xeeb heev''.
Nws tau hais tias ''Cov kev teeb txheeb dhau los ces tsuas txheeb txog ib yam kev mob nkeeg twg xwb, tab sis cov kev txheeb zaum no yog ib co uas ua rau peb xav paub xav pom heev vim tau coj tag nrho ntau cov kev teeb txheeb los sib sau ua ke.''
Helen Truby yog ib tug zeskais teeb txheeb ntawm tsev kawm qib siab University of Queensland tau hais tias txawm tias cov teeb txheeb no ces yeej yog ib txoj xub ke qhia txog cov kev sib cuam tshuam ntawm tej zaub mov UPFs thiab cov kev tsis tshua tau txais kev noj qab nyob zoo, tab sis yeej tsis tshua muaj tej pov thawj zoo txaus thiab ''cov kev sib cuam tshuam no yeej tsis muaj peev xwm qhia tau tias yog muaj kev sib cuam tshuam ntawm ib yam nrog lwm yam los yog noj ib yam zaub mov twg lawm yuav ua rau muaj teeb meem dab tsi''.
Tej kws teeb txheeb yeej lees paub tias cov kev rov qab los txheeb tej kev teeb txheeb no tsuas yog ''ib cov kev qhia tau txog qhov dav dav'' ntawm tej pov thawj xwb, yeej tseem yuav tau los ua ib cov kev teeb txheeb twg txog ib yam dab tsi tias muaj kev sib cuam tshuam thiab yuav ua rau muaj teeb meem dab tsi.
Puas muaj cov theem kev nyab xeeb rau cov kev noj tej zaub mov ultra-processed foods?
Coyle tau hasi tias cov kev teeb txheeb no tseem nyob rau theem thaum tseem ntxov xwb, ces peb thiaj tsis paub tias seb puas muaj peev xwm noj tej zaub mov ultral-processed foods raws cov theem kev nyab xeeb (noj txog theem zoo li cas thiaj tau txais kev nyab xeeb).
Nws tau hais tias "Peb yeej paub tias muaj kev sib cuam tshuam. Thiab peb yeej paub tias tej zaub mov ultra-processed foods no tsim kev puas tsuam rau txoj kev noj qab nyob zoo. Tab sis peb tsis paub tseeb kiag tias dab tsi tiag thiaj yog qhov yuav ua rau muaj tau teeb meem,''
"Peb kuj tsis paub tseeb kiag tias yog dab tsi kiag uas tej zaub mov ultra-processed foods yog tej tsis zoo rau peb. Peb tsuas paub tias tej txheej txheem ua tej zaub mob no yog ib co zaub mov tsis zoo rau peb lub cev los yog tsis muaj tej txiaj ntsim zaub mov rau peb lub cev, tab sis peb yeej tseem tsis tau paub kiag tias qhov phem tsis zoo ntawd yog dab tsi kiag.''
Tej kws hais tias muaj ib nrab ntawm tej zaub mov muag ntawm tej supermarkets ntawm teb chaws Australia no yog cov zaub mov ultra-processed foods. Source: Getty / Jacobs Stock Photography Ltd
Yuav tau tsis txhob noj tej zaub mov ultra-processed foods dab tsi?
Coyle tau qhia tias tej kws teeb txheeb yeej tab tom txheeb tias ''cov zaub mov twg yog cov zaub mov tsis zoo uas yuav ua rau muaj teeb meem'' thaum lawv mus txheeb tej zaub mov ultra-processed foods.
Cov kev rov qab mus txheeb txog ntau cov kev teeb txheeb tsis ntev los no kuj txheeb tau tias yeej muaj ib cov zaub mov UPFs twg yog cov ua rau muaj teeb meem tsis tau txais kev noj qab haus huv tsawg, li tej cereals, wholegrain bread, tej kob thaj thiab tej khoom noj txom ncauj qab zib, yoghurt thiab tej khoom noj qab zib uas muaj mis xyaw.
Nws tau hais tias "Ua ke no los kuj muaj lwm cov ultra-processed foods li tej dej haus qab zib, tej nqaij uas siv tswv yim los tswj kom noj qab txawv los yog khaws noj tau ntev, tej sauces, los yog tej khoom noj coj los pleev los yog noj xyaw mov mog (spreads and condiments). Tej khoom noj no ces yog cov uas yuav ua rau muaj teeb meem tsis tau txais kev noj qab haus huv tshaj plaws. Thiab yog tej uas tsim nyog zam tsis txhob noj los sis xav kom noj tsawg.''
Yuav ua li cas kom tej neeg sawv daws thiaj noj tej zaub mov ultra-processed foods kom tsawg?
Coyle thiaj xav kom yus nug tej lus nug no yog pheej ua rau yus txhawj tias yuav ua li cas yus thiaj paub tias ib hom zaub mov twg yog los tsis yog cov zaub mov ultra-processed foods:
- Cov zaub mov no puas yog ntuj tsim?
- Los yog yus puas muaj peev xwm ua tau tej zaub mov no ntawm tsev?
Tsis tas li ntawd los nws kuj tau taw qhia kom tej neeg nyeem tej ntawv sau lo qhia ntawm yam khoom noj ntawd tias seb siv dab tsi los ua, vim tej zaum yeej yuav muaj tej khoom txog li tsib yam los yog ntau tshaj ntawd yog cov zaub mov ultra-processed foods uas raug siv coj los tov xyaw rau yam zaub mov ntawd thiab.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab mloog tau caum los yog lwm cov podcast platforms (, , thiab ).
