Tus tsim lub Telegram app raug teem txim ntawm teb chaws Fabkis

Pavel Durov kuj raug muab tso lawm tab sis yuav ua raws li ib co lus zoj khis nws thiab tsis pub tawm ntawm lub teb chaws mus.

Man in black shirt looks to the side in front of white wall and trees

The charges against Durov concern alleged crimes involving an organised group including "complicity in the administration of an online platform to enable an illicit transaction". Source: AAP / Tatan Syuflana

Key Points

Pavel Durov uas yog tus tsim lub Telegram app siv raug muab txhom ntawm teb chaws Fabkis limtiam dhau los.
Tam sim no ces Durov raug tsub ntau lub txim vim lub app no tau ua txhaum nau yam cai.
Nws kuj raug muab tso tom qab tau muab nyiaj 5 million Euro xiab teem txim tab sis tseem yuav tau mus koom hais plaub ntxiv.

Pavel Durov uas yog tus coj uas tsim lub Telegram app uas pheej siv cov message xa xov sib tham raug rau txim ntawm teb chaws Fab kis vim lub app no tau ua txhaum ntau yam cai, tab sis lub teb chaws no kuj cia nws siv nyiaj xiab teem txim, txawm li cas los kuj tsis pub nws tawm ntawm lub teb chaws no mus.

Durov raug muab tso lawm tab sis tseem yuav tau ua raws li ib co lus zoj khi nws tom qab nws tau siv nyiaj 5 million Euro (AUD $ 8.19 million) xiab teem txim rau hnub zwj Feej (Wednesday) ntawm teb chaws Fabkis, thiab nws yuav tau cej luam qhia rau ib lub chaw tub ceev xwm 2 zaug ib limtiam twg. Nws tsis muaj peev xwm tawm ntawm teb chaws Fabkis mus. Ces Laure Ceccuau uas yog ib tug kws txiav txim plaub ntug ntawm tuam ceeb Paris thiaj tau hais ib co ncauj lug tom qab tau ib teev uas tau hais rooj plaub txog ob lub tsev hais plaub magistrates cov kev mus tshuaj ntsuam txog tej xwm txheej cuam tshuam txog lub Telegram app no.

Durov kuj tau raug muab txhom rau hnub zwj Cag (Saturday) ntawm lub tshav dav hlau Le Bourget sab nraum nroog Paris rau lub caij uas tseem tshuaj ntsuam 12 cov kev ua txhaum cai lub hli dhau los.

Why has the founder of messaging app Telegram been arrested in France?

Tej txim uas tau tsub rau nws tau liam tias nws ''tau muaj feem nrog ib pawg tswj ntawm ib lub online platform kom siv/xa tau nyiaj yam tsis raug cai''.

Tsis tas li ntawd los Durov kuj tseem raug tsub txim ntxiv tias nws tsis kam muab tej ntaub ntawv uas nom tswv xav tau rau lawv, thiab ''ib cov me nyuam yaus tej duab liab qab uas ib pawg neeg tau coj mus faib rau lwm tus'', nrog rau cov kev nyiag ua luam yaj yeeb txhaum cai, cov kev ntxias dag tej neeg nyiaj, thiab siv tej nyiaj tau los yam tsis dawb huv.

Ces tus kws txiav txim plaub ntug no thiaj tau hais tias Fabkis tej nom tswv tswj cai lij choj thiaj tau qhia rau sawv daws paub tias zoo li lub tuam txhab Telegram ''yeej tsis teb nws tej lus no'' rau lub caij thawj zaug uas nws tau pib muaj cov kev tshuaj ntsuam txog tej xwm txheej no rau lub 2 hlis ntuj xyoo 2024 ntawd.

Durov thiab nws tus kwv Nikolai yog ob tug uas tau tsim tsa lub app no siv xyoo 2013.

Thiab Telegram ces yog ib lub app uas tej neeg muaj peev xwm sau ntawv encrypted sib tham thiab yog ib lub social media app muaj ntsis zoo sib xws li WhatsApp.

Man holding sign in French stands in front of a glass building and another sign that reads 'Tribunal De Paris'

Ib tug txiv neej nqa ib daim phiaj sau tias ''Durov, rov qab xyuas kom peb rov qab muaj peev xwm siv tau (lub Telegram app)''. Source: EPA / Mohammed Badra

Durov cov kev raug txhom ntawm teb chaws Fabkis thiaj ua rau tej neeg tsis txaus siab ntawm teb chaws Russia, thiab tau muaj tsoom fwv ib co nom tswv tau hais tias yeej yog txhob txwm sib ib cov teeb meem laj fai kum xeeb rau ib tug twg thiab qhia tau tias yog ib cov kev saib dej ua ntuv saib neeg ua plhu rau cov kev tawm tau tswv yim ywj pheej xwb.

Cov kev tsis txaus siab no thiaj tau ua rau tej neeg tib tsis pom zoo nrog Kremlin xyoo 2018, thaum tsoom fwv Russia kiab los yeej nrhiav tswv yim los txwv tsis pub siv lub Telegram app tab sis tsis muaj peev xwm txwv tau - ces thiaj tau thim cov kev txwv no xyoo 2020 lawm.

Fab kis tus thawj tsav meem (President) Emmanuel Macron tau hais rau hnub zwj Hli (Monday) tias cov kev muab Durov txhob no tsis cuam tshuam txog laj fai kum xeeb dab tsi thiab tsuas yog ib cov kev tshuaj ntsuam ntawm ib lub koom haum ywj pheej xwb.

Macron kuj tau sau ib cov lus rau hauv nws phau X (Twitter) account tias nws lub teb chaws "yeej kub siab tiag tiag'' txog zej tsoom cov kev tawm tswv yim tau ywj pheej, tab sis ''yuav tsum yog cov kev ywj pheej uas raws cai uas tswj tej social media thiab tswj txoj kev ua lub neej tiag, thiab yuav tau pov puag nws tej pej xeem txoj cai thiab hwm lawv tej cai.''

Ces tom qab Durov raug txhom, Telegram thiaj tau hais ib co ncauj lug tias nws yeej ua raws li EU tej cai, thiab nws yeej tau kho nws lub app ''raws li tej cai tswj tej lagluam thiab yeej tau kho ua ntuv zus kom siv tau zoo tshaj qub tuaj ntxiv.''

Telegram sob lus thiaj tau hais tias ''Yog tej yam tej yam tsis muaj laij thawj li uas tseem cav tias nws lub platform los yog nws tus tswv tseem siv lub platform no los ua txhaum cai thiab.''

"Yeej muaj tej neeg siv lub Telegram app no yuav laug txog 1 billion tus thoob ntiaj teb no coj los sib txuas lus thiab yog ib qho chaw xov xwm tseem ceeb. Peb cia siab tias yuav muaj peev xwm daws tau tej xwm txheej no. Thiab Telegram yeej yuav tsis tso nej tseg.''

Mloog tau

SBS Hmong

hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm

Facebook

Google podcasts

Spotify

thiab

Apple podcasts

. Download

SBS Audio app

thiab caum

SBS Hmong pod follow.