Tej neeg Australia uas khwv tau nyiaj ib xyoos twg txog li $150,000 ces yog cov yuav tau nyiaj ntau ntxiv los ntawm tsoom fwv cov kev kho nws cov kev txo se theem peb txij lub 7 hli ntuj no mus.
Thawj pwm tsav Anthony Albanese thiaj tau coj lub tswv yim xav thov kho tej kev txo se no thiab tej zaum yuav los qhia txog nws tej tswv yim pab kom lagluam rov qab zoo tuaj ntxiv rau hnub zwj Teeb (Thursday) no.
Albanese tau hais tias lub tswv yim tshiab no muaj hom phiaj los pab tej neeg khwv tau nyiaj nrab no kom nthuav dav tshaj qub ntxiv rau lub caij tseem ntsib teeb meem nuj nqe siv ua lub neej ua kim tuaj ntxiv no.
Ces tsoom fwv thiaj yuav txo se rau kom tsawg rau tej neeg Australia uas kwv tau nyiaj ib xyoos twg txog li $200,000 los yog khwv tau ntau tshaj ntawd yuav laug txog ib nrab kom thiaj tau nyiaj coj los pab rau tej neeg khwv tau nyiaj tsawg thiab khwv tau nyiaj nrab.
Tej kev txo se no ho yuav muaj teeb meem dab tsi rau tej neeg ua hauj lwm?
Tej neeg ua hauj lwm feem coob yeej yuav tau txais txiaj ntsim zoo dua tej uas lawv tau tas sim no, tab sis tej neeg khwv tau nyiaj ntau tshaj plaws tsuas tau tej txiaj ntsim ntawm cov kev txo se no ib nrab xwb.
Raws li cov kev pauv hloov uas yuav pib siv txij tim 1 lub 7 hli ntuj no mus, ces ib tug neeg uas kwv tau nyiaj hauj lwm txog li $73,000 yuav tau nyuaj ntau tshaj $1500 ib lub xyoos twg los ntawm cov kev txo se.
Tej khwv tau $50,000 ces yuav tau nyiaj $929 rau ib lub xyoos twg hos cov khwv tau $100,000 ces tsuas tau nyiaj los ntawm cov kev txo se txog li $2100 xwb.
Tej cuab yig uas khwv tau nyiaj sib sau ua ke txog $130,000 ces yuav tau nyiaj txog $2600.
Hos tej neeg khwv tau nyiaj ntau txog li $200,000 los yog ntau tshaj ntawd ces tej nyiaj tau los ntawm cov kev txo se uas tau $9,075 ntawd tsuas tau txog li $4500 lawm xwb.
Tom qab tav su dua uas tau muaj lub rooj sab laj lawm, ces pab nom Labor tej nom kis xeev qes (MPs) tau qhia meej rau lub chaw nthuav xov xwm ABC tias lawv tau pom zoo rau cov kev pauv hloov no lawm.
Jim Chalmers uas yog tus nom tswj nyiaj txiaj rau tsoom fwv Albanese tau hais tias cov kev pauv hloov no yuav tsim tau cov kev pab cuam los daws tej teeb meem nuj nqes siv ua lub neej uas kim tuaj ntau dua.
Peb muaj cov kev xav txawv rau cov kev txo se theem 3 no vim peb nrhiav tau ib txoj xub ke zoo dua uas yuav pab tau tej neeg txom nyem coob dua lawm. Yog li tej tswv yim txo se uas thawj pwm tsav yuav qhia hnub no thiaj zoo dua rau tej neeg Australia uas khwv tau nyiaj nrab, thiab pab tau tej teeb meem nuj nqes siv ua lub neej zoo dua, thiab zoo dua rau tej poj niam thiab pab kom tej neeg rov qab mus ua hauj lwm...tsis tas li ntawd los yog tej yam zoo dua rau peb tej lagluam thiab.Treasurer Jim Chalmers
Thaum twg mam ib siv cov kev txo se theem peb no?
Yuav pib txo tej se no txij hnub tim 1 lub 7 hli ntuj (2024) no mus lawm.
Txawm li cas los tsoom fwv yuav tsum xub tau txais kev pab los ntawm pab nom Greens thiab tej nom ntawm cov pab nom me los kho tsab cai dhau los uas yuav txo se tso.
Thaum ntxov limtiam no, ces pab nom koom tswj kuj tau cog lus tias yuav tawm tsam thiab tsis pom zoo nrog tej kev hloov tsab cai txo se theem peb no.
Lwm pab nom teb chaws ho xav li cas?
Hnub zwj Hli (Monday) dhau los ntawd Angus Taylor tau hais tias tsis hais yuav yog cov kev hloov zoo li cas li rau cov kev txo se theem peb no ces yog ib cov kev tsis ua raws li tej lus tau cog tseg thiab kom Albnaese nco tias neeg Australia tawm suab pom zoo rau tsab cai no rau ob cov kev xaiv nom lawm.
Sussan Ley uas yog tus lwm coj ntawm lwm pab nom teb chaws thiaj tau hais tias Albanese "yog ib tug neeg dag".
Kuv yeej nco tias nws yeej saib ntsoov neeg Australia qhov muag thiab hais tias 'Kuv yeej yuav ua raws li kuv cov lus thiab kuv yuav tsis hloov cov kev txo se theem peb'. Tab sis ... tej no tsuas yog nws lub tswv yim xwb. Ces cov kev yeej cov kev xaiv tsa no thiaj yeej raws cov kev dag xwb.Deputy leader of Opposition, Sussan Ley told Sky News.
Chalmers thiaj tau los tiv thaiv tsoom fwv cov kev hloov tshiab no thiab tau hais tias yog tej yam tsim nyog ua vim peb yeej paub tseeb txog tej xwm txheej rau lub caij so dhau los no lawm.
Peb yeej paub tseeb rau lub caij ntuj so no lawm tias yeej muaj ib txoj xub ke zoo tshaj coj los siv tej nyiaj no coj los pab daws tej nuj nqes siv ua lub neej ntawm tej neeg Australia khwv tau nyiaj nrab uas xav tau kev pab cuam heev ntawd. Ces peb thiaj tau hloov peb cov kev xav thiab kuj yog ib cov kev hloov uas zoo dua.Treasurer Jim Chalmers
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
