Tej neeg tsiv teb tsaws chaw feem coob ntawm Australia tsis paub yuav ua li cas thaum lawv mob

Tau muaj cov kev txhawb nqa kom tej neeg kho mob siv tej lus nkag siab yooj yim thaum lawv kho tej neeg mob.

Kuj yuav yog tej yam nyuaj tsis muaj peev xwm siv tau Australia cov healthcare system thiab thaum koj mob yog tias koj tsis hais lus Askiv ua thawj hom lus.

Tej xwm txheej no thiaj tau ua rau muaj kev txhawb nqa kom siv cov kev sib tham ua tej lus yooj yim tau nrog tej kws kho mob thiab tej nurses, thiab yeej xav kom tej neeg kho mob no siv txoj xub ke zoo tshaj plaws nrog tej neeg mob lawv kho/saib xyuas.

75 feem pua ntawm tej neeg Australia uas kawm ntawv Askiv tam li yog hom lus ob ntawd ces 'yeej tsis tshua paub zoo txog tej kev kho mob zoo' - txhais tias lawv tsis tshua to taub tias yuav tau ua dab tsi thaum lawv muaj mob thiab yuav siv tej kev kho mob qhov twg los pab kom kho lawv zoo.

Tab sis tsis yog tib co teeb meem muaj rau tej neeg tsiv teb tsaws chaws thiab tej neeg tuaj txog tshiab ntawm Australia nkaus xwb; 60 feem pua ntawm tag nrho tej neeg Australia yeej tsis tshua paub zoo txog Australia cov health care system zoo thiab.

Sixty per cent of Australians have a poor understanding of the country's health system.

SBS News/Omar Dabbagh

60 feem pua ntawm tej neeg Australia yeej tsis tshua nkag siab zoo txog Australia cov health care system SBS News/Omar Dabbagh

Fiorina Mastroianni uas yog tus manager tswj cov hauj lwm NSW health literacy and diversity tau qhia rau SBS News tias:

“Peb yeej paub tias muaj neeg coob heev pheej rov qab tuaj rau peb tej tuam chav kho mob uas yuav tau kub siab kho tej neeg mob ua ntej uas yeej ntsib teeb meem ntau yam txog tej kev siv tshuaj thiab lwm yam mob cuam tshuam. Yog li ntawd peb thiaj yuav tsum xyuas kom muaj cov kev sib tham siv tau zoo tshaj no ntxiv los yog ua tib zoo xyuas kom peb tej neeg mob thiab lawv tsev neeg los yog tej neeg tu saib xyuas lawv nkag siab txog tej xov xwm uas peb muab rau lawv.''

Tej neeg mob uas pheej ua tem toob

Ms Mastrionni tau qhia tias tej neeg mob yeej tsis nco qab txog tej xov xwm txog li ntawm 40 txog 80 feem pua uas tej neeg kho mob qhia rau lawv.

Nws hais tias “Peb yuav tsum tau ua tib zoo xyuas kom thaum peb (tej neeg ua hauj lwm kho mob) qhia tej xovxwm rau tej neeg mob nkag siab txog tej peb tau qhia rau lawv.''

Mob daim npluag qhwv hlwb txhab ua rau tub kawm qib siab tas sim neej ntawm NSW

Raws li tej xov xwm uas tau teev rau lub limtiam

NSW Multicultural Health Week

ces yuav los tham txog kom muaj cov kev sib tham kom meej thiab to taub zoo tshaj qub raws sob lus 'Tham, Mloog thiab Nug''.

Leissa Pitts uas yog tus manager ntawm lub koom haum Multicultural Health Service ntawm Illawarra Shoalhaven Local Health District tau hais tias “Cov kev sib tham yog tej yuav txiav txim tias seb puas yuav siv tau tej kev kho mob los siv tsis tau tej kev kho mob. Thiaj nyob ntawm tus kws kho mob ntawd yuav tau txheeb nrog tus neeg mob ntawd seb puas nkag siab txog tej xovxwm muab rau/qhia rau lawv, thiab thaum lawv tawm ntawm tsev kho mob mus tsev los yog ntawm tej chaw kho mob kom lawv paub tias lawv muaj peev xwm rov qab mus tsev thiab muaj peev xwm siv tau tej xov xwm uas qhia rau lawv zoo.''

Tham, Mloog, Nug

Tam li yog ib feem ntawm lub limtiam Multicultural Health Week, ces yuav coj tej neeg tsiv teb tsaws chaws uas kawm chav kawm ntawv Askiv thiab tej neeg nyuam qhuav tuaj tshiab mus ncig xyuas lub tsev kho mob Shoalhaven Memorial Hospital ntawm Nowra ntawm xeev NSW tej chaw raws ntug hiav txwv sab qab teb.

Ces pab neeg no thiaj muaj 16 tus neeg ntawm cov neeg Tibet thiab Taiwan, uas tau raug coj mus ncig tej chaw tej neeg mob pw kom lawv swm nrog tej chaw kho mob - thiab kawm kom paub tias yuav tau ua dab tsi thaum muaj tej xwm txheej mob nkeeg ti tes ti taw tshwm sim.

A class are taken on a tour of a hospital on the NSW south coast. SBS News/Omar Dabbagh

Coj ib chav tub kawm mus ncig ib lub tsev kho mob ntawm thaj chaw nyob raws cov ntug hiav txwv sab qab teb ntawm xeev NSW. SBS News/Omar Dabbagh

Yi Ping McCarthy tau hais tias “Cov kev mus xyuas tsev kho mob zaum no pab tau kuv zoo heev.”

Nws los yeej yog ib tug neeg tshiab rau ntawm thaj chaw nyob raws ntug hiav txwv sab qab teb ntawm xeev NSW thiab kuj tau ntoj ncig nrog nws tus txiv thiab nkawv tus ntxhais Delaney hnoob nyoog 2 xyoos.

Nws hais tias “Kuv paub tias yog thaum kuv tus ntxhais mob yuav coj mus kho qhov twg, los yog kuv muaj peev xwm mua tau rau qhov twg, thiab yog kuv ho mus rau ntawm lub tsev kho mob no ces kuv paub tias yuav tsim nyog nrog leej twg tham ua ntej, ces thiaj yog tej yam zoo heev rau kuv.''

Ms McCarthy yeej tau xub pib tsiv ntawm Taiwan mus nyob rau Darwin yuav laug txog 10 xyoo dhau los lawm, thiab tau hais tias nws kuj tseem tsis tshua nkag siab txog tej lus uas tej khws kho mob nrog nws tham.

Nws tau hais tias “Yog tej yam uas totaub nyuaj kawg, vim yog ib co lus txawv lawm. Thiab yeej muaj ib txhia neeg ua hauj lwm ces thaum lawv hais lawv tej lus kuv yeej tsis nkab siab li. Txawm tam sim no kiag muaj tej thaum kuv mus ntsib kws kho mob los nws pheej hais ntau yam uas kuv yeej tsis paub tias xyov nws hais dab tsi li?''

'Dr Google' kuj muaj peev xwm pab tau thiab: raws li tau muaj ib co kev ntsuam zej tsoom cov kev xav

Cov kev yoob no tej zaum kuj yuav ua rau ib txhia neeg txhawj rau lub caij lawv yuav tau npaj mus siv tsev kho mob tas mus li, li tus neej niam Mai Ngo uas tseem yuav yug me nyuam ua ntej yuav txog caij Christmas.

Ms Ngo hais tias “Yeej ua rau kuv ib nyuag txhawj me ntsis thiab, tab sis kuv yuav tau tso siab thiab kom tsis txhob muaj teeb meem rau kuv tus mos ab. Kuv ntseeg thiab tso siab rau tus kws kho mob thiab tej nurses.''