Cov ntsiab lus tseem ceeb:
- Tsoom fwv Australia yeej muaj cov chav kawm ntawv Askiv qhia rau cov neeg tsiv teb tsaws chaw muaj hnoob nyoog (The Adult Migrant English Program) uas pub tej neeg tsiv teb tsaws chaw mus kawm ntawv Askiv dawb txog li 510 teev nrog rau tej sob kawm kom paub txog Australia tej kab lis kev cai, kev mus ntsib mus cuag nom tswv thiab kev cai nrog rau tej kev yuav tau them se.
- Cov neeg muaj cai kawm tau cov sob kawm ntawv Askiv dawb no yuav tsum tau teev zwm npe nrog ib lub koom haum qhia ntawv twg rau lub sij hawm li 6 lub hlis thaum lawv tuaj txog rau teb chaws Australia no los yog yuav tsum nug tej chaw uas qhia kom ib tug neeg twg muaj txuj ci yuav kawm tau ntawv qib siab txuas ntxiv (Skills for Education Program).
- Tej tub kawm uas mus kawm cov sob kawm no uas tseem muaj me nyuam hnoob nyoog me tsis tau mus kawm ntawv los yeej muaj chaw zov me nyuam pub dawb pab zov lawv tej me nyuam rau lawv thiab.
Tej neeg tsiv teb tsaws chaw ntawm tej cuab yig neeg uas yog cov neeg yeej paub ua hauj lwm zoo lawm, los yog cov neeg thov tau cov visa neeg thoj nam tawg tsov tawg rog uas tsis tshua paub lus Askiv zoo, yeej muaj peev xwm mus kawm tau tsoom fwv Australia cov chav kawm ntawv Askiv kawm dawb hu ua The Adult Migrant English Program (AMEP).
Cov chav kawm AMEP no yeej qhia cov lus Askiv yooj yooj yim rau tej neeg tuaj tshiab rau teb chaws Australia lub sij hawm thawj 5 xyoos tau kawm dawb kom lawv paub lus zoo zog tuaj.
Tej txuj ci pab kom tej neeg no muaj peev xwm pib tau lub neej tshiab los kuj raug muab coj los xyaw qhia nrog rau tej sob kawm no li cov kev qhia kom tej neeg paub mus siv cov kev kho mob, siv emergency services, mus siv tsoom fwv cov kev pab cuam thiab tej kev pab cuam rau tej neeg zejzog thiab siv tej txhab nyiaj nrog rau ntau yam uas piav tsis txog ntawm no ntxiv.
Getty Images/FG Trade
Catherine Devlin yog ib tug tswj cov kev qhia ntawv ntawm lub koom haum Adult Learning Australia.
Nws hais tias "Tej neeg uas muaj cai kawm cov sob kawm ntawv Askiv no ces yuav tau kawm 510 teev diam."
Ms Devlin hais tias tej tub kawm uas muaj cai kawm tau cov sob kawm no yuav tsum tau mus teev zwm npe nrog ib cov chaw qhia cov sob kawm AMEP rau lub caij li ntawm 6 lub hli uas lawv tau tuaj nyob teb chaws Australia no. Tej ma nyuam yaus thiab tej hluas hnoob nyoog qes dua 18 xyoo ces muaj ib hawm li 1 xyoos mus teev zwm npe kawm cov sob kawm no tau.
Yog tias koj tau tuaj rau teb chaws Australia no ntev tshaj 6 hli lawm thiab yeej paub lus Askiv zoo me ntsis lawm, tab sis xav kawm kom ho ib nyuag paub zoo zog tuaj ntxiv kom nrhiav tau hauj lwm ua ces yeej muaj cov sob kawm (SEE) rau koj kawm thiab.
Cov SEE program no yeej muaj lub hom phiaj tsi ntsees yauv los pab rau cov neeg xav nrhiav kom tau hauj lwm ua thiab tau kawm cov sob kawm no ntev txog 650 teev kom lawv paub siv zauv thiab paub siv tau ntaub ntawv zoo thaum kawm ntawm tej chaw kawm thiab qhia tej neeg xyaum ua hauj lwm ntawd.
Yav tag los Mehako Obaidullah kuj yog ib tug neeg thoj nam tsiv ntawm teb chaws Afghanistan tuaj nyob teb chaws Austria no. Nws hais tias tej neeg tsiv teb tsws chaw, neeg thoj nam thiab neeg tawg rog uas tuaj rau teb chaws Australia no yeej tsis tshua paub ntaub ntawv thiab tsis paub lus zoo, ces thiaj ntsib teeb meem nyuaj heev thaum lawv mus nrhiav hauj lwm ua.
Lawv tsis muaj peev xwm yuav yws tau dab tsi li; lawv yeej tsis paub tias yuav mus yws ib tug twg li cas; thiab lawv yeej tsis tawm tswv yim dab tsi kom lwm tus paub tias lawv xav li cas li.
Thiab yeej muaj 300 cov chaw qhia cov sob kawm AMEP thoob plaws teb chaws Australia diam.
Getty Images/Peter Muller
Rochelle Beatty uas yog tus tswj cov program qhia ntawv AMEP ntawm lub tsev kawm Melbourne Polytechnic hais tias tej chaw qhia cov sob kawm no feem ntau yeej muaj tej neeg ua hauj lwm paub hais tau 2 hom lus thaum tej tub kawm xub xub mus nug txog tias xav kawm tej sob kawm no, thiab yeej tau ua tib zoo xyuas kom tej tub kawm uas xav kom cov sob kawm no nkag siab txog txhua cov xov xwm cuam tshuam txog tej sob kawm no.
Feem ntau cov chav kawm AMEP no ces peb yeej muaj cov neeg ua hauj lwm yeem thaj paub 2 hom lus los pab tej tub kawm uas tsis tshua paub lus Askiv zoo thiab.
Thaum uas teev zwm npe kawm cov chav kawm AMEP no lawm ces tej tub kawm ntawd muaj cai xaiv tau 2 co sob kawm xws li: yuav kawm cov pab kom siv tau coj mus ua hauj lwm los yog siv tau nrog zejzog tham tau xwb.
Cov program uas qhia kom paub lus Askiv ua ntej yuav ua hauj lwm (Pre-Employment English) yog cov program pab rau cov neeg uas xav kawm kom paub lus Askiv zoo kom siv tau pab rau lawv thaum lawv ua hauj lwm, los yog kom lawv mus kawm tau txuas ntxiv kom nrhiav tau hauj lwm ruaj ua.
Cov sob kawm ntawv Askiv uas kawm kom paub tham lus siv lus (Social English) ces yog cov program qhia kom cov neeg tsiv teb tsaws chaw uas tseem tsis tau ntseeg lawv tus kheej tias muaj peev xwm siv tau lus Askiv sib tham nrog lwm tus neeg ntawd kom lawv muaj peev xwm sib tham ua lus Askiv tau nrog lwm tus.
Yog li tej tub kawm yeej muaj peev xwm kawm tau cov sij hawm kawm no txog li 510 teev thiab kawm 2 cov sob kawm no sib xyaw ua ke los tau.
Lawv muaj peev xwm txiav txim siab tias seb yuav kawm full time los yog kawm part time, kawm hauv cov chav kawm los yog kawm hauv online kawm ntawm tsev tau tib si.
Getty Images/Maskot
Lindee Conway yog tus coj qhia cov sob kawm School for Foundation and Preparatory Studies ntawm lub tsev kawm Melbourne Polytechnic.
Nws hais tias cov sob kawm no muaj lub hom phiaj qhia kom cov neeg tsiv teb tsaws chaw nkag siab txog qhov sib txawv txav ntawm tej kab li kev cai uas tej zaum yuav ua rau cov neeg tuaj tshiab cov heev los yog tis nkag siab.
Nws thiaj qhia txog lub luag hauj lwm tseem ceeb tnawm cov chav kawm AMEP tias yog qhia txog teb chaws Australia no thiab nws tej cai rau cov neeg tsiv teb tsaws chaw tuaj nyob tshiab ntawm teb chaws Australia.
Tsis yog peb qhia tej xov xwm meej thiab ntxaws uas yuav pab kom tej neeg no nkag siab txog tej lus thiab tej ntawv los yog tej hauj lwm xwb tab sis kuj yuav qhia txog tej ib puag ncig ntawm lawv tias zoo li cas thiab.
Tej tub kawm uas muaj tej me nyuam hnoob nyoog tseem yau uas tsis tau coj mus kawm ntawv, ces tej chaw qhia cov chav kawm Adult Migrants English Program (AMEP) yeej npaj cov chav kawm zov me nyuam ze rau tej tub kawm no cov chav kawm thiab npaj tej chav kawm kom haum raws li qhov tej tub kawm no muaj peev xwm kawm tau.
Thaum kawm tiav cov chav kawm AMEP no lawm ces tej tub kawm yeej muaj peev xwm nug tej chaw qhia ntawv no kom pab lawv npaj lawv tej hom phiaj, npaj tswv yim tias seb lawv xav ua dab tsi los yog xav mus kawm ntawv qib siab li cas txuas ntxiv los yog tham sab laj txog tias ho muaj cib fim yuav ua tau hauj lwm li cas ntxiv.
Yog koj xav paub txog cov sob kaw qhia ntawv Askiv rau cov neeg tsiv teb tsaws chaw muaj hnoob nyoog (Adult Migrant English Program) ces koj muaj peev xwm mus txheeb tau ntxiv ntawm
Yog koj xav nrhiav seb puas muaj cov chaw qhia cov chav kawm no ze koj ces txheeb tau ntawm lub vas sab.
Download tau lub los siv kom pab Australia tiv thaiv kom txhob muaj neeg kis tau tus kab mob coronavirus no ntxiv.
Tam sim no twb muaj neeg Australian ze txog 6 million tus tau download lub COIDSafe app no los siv lawm tab sis nom tswv Australia yeej xav kom muaj neeg yuav laug txog li ib nrab (10 million) tus download siv mas thiaj siv tau hauj lwm zoo.
Tsim nyog koj paug txog tej xo dab tsi rau lub caij muaj tus kab mob coronavirus no tseem sib kis thoob ntuj :
Australia muaj neeg kis tus kab mob COVID-19 li no:
Ntiaj teb muaj neeg kis tau kab mob COVID-19 npaum li no:
Ntiaj teb daim luaj chib lig (World map) qhia tias teb chaws twg kis thiab tas sim neej los ntawm tus kab mob COVID-19 ntau npaum li cas:
