Cov ntsiab lus tseem ceeb:
- Raws li lub koom haum Australian Institute of Health and Welfare (AIHW) tau qhia ces ib lub xyoos twg muaj neeg Australia tshaj 65,000 tus khwv tswv yim txov txo lawv tus kheej txoj sia.
- Tej neeg txum tim Australia thiab tej neeg LGBTQI+ yog cov uas muaj cib fim yuav khwv txwv yim txov txo lawv tus kheej txoj sia ntau dua Australia lwm cov pej xeem.
- Yeej muaj ib co cim li hloov cwj pwm, tsis koom npoj cais nyob twm zeej, tham txog qhov xav txov tus kheej txoj sia thiab tag kev cia siab los yog pab tsis tau nws tus kheej.
Cov kev tas sim neej tsis hais yog tim dab tsi li, suav cov kev txov txo tus kheej txoj sia nrog, tau tsim teeb meem loj heev rau tej neeg yus hlub tshua thiab yus tej phooj ywg.
Raws li Anna Brooke uas yog tus coj teeb txheeb ntawm lub koom haum Lifeline Australia hais, ces feem ntau raws li ib txwm pom, mas tej neeg pheej mloog tau tias lawv ua txhaum ib yam dab tsi, vim lawv tsis muaj peev xwm paub txog tej cim ceeb toom rau ib lub caij twg ua ntej ib tug neeg twg yuav khwv tswv yim txov txo lawv tus kheej txoj sia.
Nws qhia rau SBS tias cov kev muaj peev xwm paub txog tej cim ceeb toom, thiab paub nrog tus neeg uas pheej xav khwv tswv yim txov nws ts kheej tham thiab mloog nws hais, thiab paub tias yuav mus nrhiav kev pab cuam qhov twg los pab rau nws yog tej yam uas muaj peev xwm yuav pab daws tau tej teeb meem no.
Thaum tham txog cov kev txov txo tus kheej txoj sia (suicide), ces peb yuav tsum tau nco tias ib tug neeg yeej txawv lwm tus, yog li Dr Brook thiaj hais tias, kom peb uas zoo xyuas kom paub txog tej yam uas tau pauv hloov ntawm ib tug neeg twg.
Piv txwv li tej zaum tau muaj cov kev pauv hloov li, tus neeg ntawd poob hauj lwm lawm, nws tau sib nrauj lawm, muaj teeb meem nyuaj nrog nws tsev neeg, thiab muaj ntau yam kev mob nkeeg, ces feem ntau tej no yog tej uas pheej ua rau ib tug neeg twg pheej khwv tau tej tswv yim xav txov tus kheej.
Dr Brook tshab txhais tias yeej muaj tej xwm txheej no tshwm sim yam tsis muaj kev ceeb toom dab tsi qhia rau lwm tus, los yog yeej tsis yog tim tus neeg ntiag tug ntawd tau ua txhaum ua yuam kev dab tsi, tab sis feem ntau mas pheej ras los ua ''ib co xwm txheej tseem ceeb'' rau ib tug neeg twg lub neej.
- Pheej nyob tib leej tsis xav koom kev sib raug zoo nrog lwm tus
- Muaj kev pauv hloov rau nws tej cwj pwm pw
- Ua dab tsi los zoo li tsis muaj peev xwm nias siab hlo ua
- Pheej xav thiab pheej tham txog txoj kev tuag thiab kev txov tus kheej
- Pheej tham txog qhov nws tsis muaj peev xwm ua tau dab tsi, nws tsis tsim nuj thiab pab tsis tau nws tus kheej
LISTEN TO
Tswv yim tiv thaiv kom tsis txhob txov txo txoj sia
SBS Hmong
15/09/202217:46
Thiab yeej muaj ntau yam laj tawj sib chab sib chaws cuam tshuam txog cov kev txov txo tus kheej txoj sia.
Ib tug neeg ntiag tug twg los yeej muaj tej yam txwv sib txawv, thiab ib txhia ces yeej tsis pom muaj ib cov cim dab tsi qhia rau lwm tus paub li.
Yog li ntawd, Dr Brook thiaj hais tias, thiaj yog tej yam tseem ceeb uas tej neeg yus hlub tshua thiab yus tej phooj ywg yuav tsum tau ua cov txiav txim siab raws qhov lawv xav uas tsim nyog ua yog thaum pom yus coj tej yam cwj pwm uas tej zaum yuav yog ib cov kev ceeb toom tias yuav raug tej teeb meem khwv tswv yim txov txo tus kheej txoj sia no.
Kub siab nrog txheeb xyuas tus neeg ntawd kiag tam sim ntawd
Dr Brook hais tias, yog thaum uas muaj ib tug neeg twg muaj tej yam ntxwv li hais saum toj no lawm, los yog pheej khwv tau tej tswv yim uas xav txov nws tus kheej, ces yog tej yam tseem ceeb uas yuav tau ''nrog tus neeg ntawv zaum tsaws tham thiab txheeb tias seb ho puas muaj teeb meem dab tsi rau lawv."
Nug tus neeg ntawd ncaj qhia tias seb puas yog lawv tab tom khwv tswv yim txov txo tus kheej txoj sia.
Yus yeej nug tau, thiab yog tej yam tseem ceeb uas yus nug.Dr Anna Brook, national manager for Lifeline Research Foundation
Dr Brook hais tias pheej tseem muaj neeg totaub yuam kev tias lub tswv yim uas pheej tham txog cov kev txov txo tus kheej txoj siab no yuav ua kom tus neeg ntawd khwv tau tej tswv yim los txov nws.
Nws tshab txhais tias “Tab sis raws li peb paub ces yeej tsis yog li hais ntawd."
LISTEN TO
Kev teeb txheeb txog Hmoob cov teeb meem nyuaj siab ntxov plawv
SBS Hmong
25/10/201926:13
Qhov tseeb tiag ces, cov kev coj tej no los tham phua ntsiab ncaj qha tej zaum kuj yuav pab tau tus neeg uas pheej khwv tswv yim xav txov nws tus kheej txoj siab thiab. Vim yog tej yam ntawm yus qhia rau tus neeg ntawd paub tias yus kub siab txog nws, yus totaub txog nws thiab yus yeej npaj txhij yuav mloog nws hais.
Thiab yog tias tus neeg ntawd ho qhib siab kam qhia txog nws tej tswv yim uas khwv txov nws tus kheej ntawd, ces raws li Dr Brook hais, ''kom nrog nws tham kiag tam sim ntawd.''
Txhawb kom nws piav txog nws cov kev xav thiab ua tib zoo mloog nws tham yam ua rau nws paub tias yus kub siab thiab txhawj xeeb txog nws yam tsis txiav txim dab tsi rau nws.
Nug tej lo lus nug li “pab qhia kom ntxaws me ntsis txog tej no rau kuv paub puas tau?'', los yog ''tej ntawd ho ua rau koj mloog tau li cas xwb?'' kom nws thiaj muaj peev xwm qhia tau tias nws xav li cas.
Yuav thov kev pab cuam qhov twg
Tej zaum kuj yuav ua rau yus ntshai thiab txhawj xeeb heev thiab nyuaj rau yus heev yog thaum yus pom ib tug twg qhia rau yus tias lawv pheej khwv tau ib co tswv yim tsim teeb meem rau lawv tus kheej los yog xav txov lawv tus kheej txoj sia.
Thiab yeej muaj tej kev pab cuam thiab tej xov xwm ntau yam coj los pab rau tus neeg ntsib tej teeb meem no thiab tus neeg uas xav los pab tus neeg ntsib tej teeb meem no thiab.
Hos yog tias lawv ho nyuaj siab tab sis tsis raug kev phom sij kiag tam sim ntawd ces kom hu rau lub koom haum
Thiab yog tias tus neeg ntawd ho nyuaj siab xwb tab sis ho tsis raug kev phom sij dab tsi loj uas tsis tas siv lub koom haum Lifeline (13 11 14) los yog lub koom haum cov kev pab cuam uas muaj pab 24 teev 7 hnub ntawd, ces yeej muaj ib co kev pab cuam text message thiab chat services pab thiab.
Tej neeg uas tsis paub hais lus Aaskiv (English) zoo los kuj yeej muaj peev xwm thov neeg txhais lus ntawm lub koom haum txhais lus thiab txhais ntawv (Translating and Interpreting Service - TIS) tau raws li tus zauv xov tooj 13 14 50 thiab.
Lub koom haum Mental Health Federation Australia (MHFA) thiaj tau tsim cov multilingual chatbot service (txheeb tau hauv qab ntxiv), coj los pab ua koj hom lus pab rau koj.
Dr Brook hais tias tej zaum kuj yuav muaj peev xwm teem caij saib rau koj mus ntsib tau ib tug kws kho mob, kws paub ntsuam thiab daws kev nyuaj siab, kws paub sab laj thiab mloog koj tham txog koj tej kev nyuaj siab yog lawv pom tias tsim nyog lawm thiab.
Tab sis thaum uas ib tug twg qhia rau lwm tus paub tias nws khwv tau ib co tswv yim xav txov los yog tsim teeb meem rau nws tus kheej lawm, ''ces yuav tau npaj tej kauj ruam theem tom ntej ntxiv'' kom nrhiav tau tej kev pab cuam raws li qhov tsim nyog pab rau lawv thiab.
Thiab yog thaum tau npaj tej no lawm, ces xav kom kub siab txheeb xyuas tus neeg ntawd tas mus li, thiab qhia rau lawv paub tias yus yeej kub siab txog nws, thiab nws kuj tshab txhais ntxiv tias kom yus qhia rau tus neeg ntawd paub tias ''yus xav yog ib tug uas yuav pab nrhiav txoj sub ke pab rau nws txuas ntxiv rau yav tom ntej."
Cov kev raug ntaus nqe tsis zoo los ntawm tej zej zog coj ntseeg ntau yam kab kis kev cai thiab hais ntau hom lus
Tej zaum cov kev tsis paub lus thiab tej kab lis kev cai ntawm lub teb chaws no zoo kuj yuav ua rau tej neeg zejzog uas coj ntseeg ntau yam kab lis kev cai thiab hais ntau hom lus tsis muaj peev xwm nrhiav tau tej kev pab cuam raws li qhov lawv xav tau, thiab yog tham txog tej neeg tuaj txog tshiab lawm, ces haj yam tsis muaj ib tug twg uas lawv yuav pom qab sab laj nrog li, dua ntawm tej kev txhawj xeeb thiab nyuaj ntau tsav ntau yam uas lawv ntsib ntawd lawm.
Raws li Vasan Srinivasan uas yog tus coj lub koom haum Mental Health Foundation Australia (MFHA) hais ces tej neeg zejzog Culturally and linguistically diverse (CALD) los yog tej neeg zejzog uas coj ntseeg ntau yam kab lis kev cai thiab hais ntau hom lus yog cov uas ntsib cov teeb meem txov txo tus kheej txoj siab txog li ntawm 21 feem pua ntawm teb chaws Australia no rau ib lub xyoo twg, los sis yog muab xam tias muaj tej neeg txog li 700 leej los yog coob tshaj ntawd raug tej teeb meem no.
Mr Srinivasan thiaj hais tias kuj tseem muaj cov kev ntaus nqe yuam kev loj kawg nkaus rau cov kev sab laj sib tham txog cov kev txov txo tus kheej txoj sia ntawm tej neeg zejzog CALD no thiab.
Yog tej yam tsis muaj hmoo uas peb yeej tsis tham txog tej teeb meem nyuaj siab ntxhov plawv li, thiab peb yeej tsis pom tias tej kev nyuaj siab ntxhov plawv no yog tej yam tseem ceeb dab tsi. Ces peb thiaj tsis kub siab txog.Vasan Srinivasan, CEO of Mental Health Foundation Australia
Mr Srinivasan hais tias neeg Australia yuav tsum tau kuab siab txog ntau yam ua rau muaj tej teeb meem no thaum tham txog tej kev txov txo tus kheej txoj sia nrog tej neeg zejzog coj ntseeg ntau yam kab lis kev cai thiab hais ntau hom lus, thiab ua tib zoo xyuas kom thaum tau haum raws li lawv tej kab lis kev cai, muaj kev hwm thiab siv tej xub ke los txhawb siab rau lawv kom xav tham txog tej no.
Tej neeg zejzog CALD muaj peev xwm nrhiav tau kev pab cuam qhov twg
Lub koom haum MHFA yeej muaj kev sib cuag nro tej zejzog tshaj 90 cov zejzog, uas tsis yog tias yuav pab tej neeg uas xav tau txais kev pab cuam xwb, tab sis kuj tseem qhia rau tej neeg kom paub zoo txog tej teeb meem nyuaj siab ntxhov plawv no kom totaub zoo tshaj qub ntxiv thiab.
Lub koom haum no thiaj li tau tsim cov tsaib no los pab daws tej teeb meem nyuaj siab ntxhov plawv pab rau tej neeg 24 teev 7 hnub ua 114 hom lus.
Thiab yeej muaj tej neeg mus siv cov chatbot uas tham ua ntau hom lus no txog 1,760 tus rau thawj hnub uas pib qhib siv ntawd, thiab tej neeg yeej tham txog tej kev txov txo tus kheej txoj siab thiab tej kev ntxhov siab uas yog ob yam uas muaj neeg tham txog ntau tshaj plaws.
Thiab Mr Srinivasan hais tias ''Yeej muaj neeg coob heev xav siv cov kev pab cuam no."
Thiab raws li lub koom haum no tau muaj ib co kev teeb txheeb xyoo 2020-21 txog tej neeg coj ntseeg ntau yam kab lis kev cai thiab hais ntau hom lus ces kuj pom tau tias tej neeg zejzog no nyiam mus sau ntawv sib tham (chat digitally), thiab muaj tej neeg no txog li 60% nyiam siv cov kev sab laj daws kev nyuaj siab uas siv tau hauv online dua cov kev mus ntsib tej kws tim ntsej tim muag.
"Thiaj pom tau tias tej neeg yeej tseem raug lwm tus ntaus nqe tsis zoo rau", tab sis qhov tseem ceeb ces yuav tau siv ib lub tswv yim txawv li lub tswv yim digital, vim tsis ua rau tej neeg no pheej yuav tau mus ntsib lwm tus tim ntsej tim muag.
uas yuav pab tau tej zejzog no
Yog tias koj los yog ib tug twg uas koj paub ho ntsib kev teeb meem puas tsuaj thiab xav tau kev pab cuam kiag tam sim no ces hu rau Triple Zero (000).
Los sis yog hu mus thov cov kev pab cuam daws teeb meem nyuaj siab ntxhov plawv ntau yam tau ntawm tej koom haum no:
Lifeline 13 11 14
Beyond Blue 1300 22 4636
Mental Health Foundation Australia 1300 643 287
Nod yog tej kev pab cuam daws teeb meem yuaj siab ntxhov plawv ntawm koj tej xeev:
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
