Tej txhab nyiaj, tej tuam txhab muag xov tooj thiab tej tuam txhab technology lis Facebook yuav tsum tau qhai tais lawv tau tab tom ua dab tsi coj los tiv thaiv kom tej customers tsis txhob raug neeg phem ntxias dag tsis li ntawd ces yuav raug nplua hnyav heev.
Tej lagluam uas tsis kub siab tawm tsam nrog tej neeg phem uas pheej ntxias dag tej neeg yuav raug nplua nyiaj txog li ntawm $50 million raws li ib tsab cai tshiab uas tsoom fwv tau qhia rau hnub zwj Kuab (Friday tim 13.09.2024) tias yuav tsim coj los siv.
LISTEN TO
Tswv yim tawm tsam nrog scmmers
SBS Hmong
13/09/202403:06
Tsaib no ces yeej tau muaj tej xwm txheej uas tej neeg raug neeg phem ntxias dag ntau tshaj 600,000 zaus raug coj mus qhia rau nom tswv paub thoob teb chaws, raws li tsab ntawv cej luam Target Scams tshiab uas lub koom haum Australian Competition and Consumer Commission (ACCC) tau coj los qhia ntawd.
Stephen Jones uas yog tus nom ua hauj lwm pab tus nom lis laj fai tswj nyiaj txiaj rau tsoom fwv teb chaws tau hais tias tej cai tshiab no yuav yuam kom tej tuam txhab lagluam yuav tau los pov puag neeg Australia kom tsis txhob poob nyiaj ntxiv, rau qhov tias
Nws tau hais rau hnub zwj Kuab (Friday tim 13.09.2024) tias "Tsoom fwv Albanese tab tom yuav xyuas kom teb chaws Australia yog ib lub teb chaws muaj cai nruj tshaj plaws hauv ntiaj teb los tawm tsam nrog tej scammers,''
''Ces tag nrho tej tuam txhab lagluam thiaj muaj lub luag hauj lwm yuav tau ub tib zoo xyuas kom lawv yuav tau los nrog pab tiv thaiv, txwv txiav los ua kom tej scammers tsis txhob muaj peev xwm dag ntxias tau neeg Australia, yuav tau cej luam qhia rau nom tswv paub thiab ua ib yam dab tsi los tawm tsam nrog tej scammers ... uas lawv yuav tau ua tib zoo xyuas kom kub siab tshaj qub ntxiv los pov puag kom lawv tej customers tau txais kev nyab xeeb.''
Tsoom fwv cov hauj lwm Scams Prevention Framework
Tsoom fwv teb chaws xav los tsim cov hauj lwm Scams Prevention Framework uas yuav teeb tsa ib co hauj lwm rau tej tuam txhab lagluam ua kom los tiv thaiv, txheeb, cej luam, cuam tshuam, thiab los tawm tsam daws tej xwm txheej neeg phem ntxias dag zej tsoom.
Raws li tej cai tshiab no hais, ces tej txhab nyiaj yuav tsum tau kub siab tshaj no los txheeb kom tau tias tus neeg twg them nyiaj rau leej twg los yog tus neeg twg yog tus tau txais nyiaj ua ntej yuav pub ib tug twg xa nyiaj rau lwm tus.
Tej tuam txhab muaj xov tooj los kuj raug yuam kom yuav tau tawm tsam nrog tej scam messages thiab tej xov tooj uas pheej xa rau los yog hu nrog ib tug neeg twg tham kom tej neeg phem ntxias tau tus neeg ntawd nyiaj thiab.
Tsoom fwv thiaj tau hais tias nws tej tswv yim no yog ib co cim qhia tias nws hloov tswv yim tshiab thiab txhais tias tej tuam txhab lagluam yuav tau kub siab nrog tawm tsam tej xwm txheej scams uas tau tshwm sim thoob plaws rau lawv tej lagluam.
Ces tej zaum tej tuam txhab thiaj yuav raug yuam kom yuav tsum them tej nyiaj uas tej neeg raug neeg phem dag poob nyiaj ntawd rov qab rau tej neeg raug neeg phem dag ntawd.
Jones tau hais tias tej tuam txhab technology loj li Google, Tiktok thiab Facebook yeej tseem tsis tau kub siab ''txaus los xyuas kom lawv tej platforms tau txais kev nyab xeeb'', thiab tseem muaj tej xov xwm cuav ''uas pheej siv coj los ntxias dag neeg Australia poob nyiaj ntau billion dollars''.
Nws tau hais tias "Tej social media platforms yuav muaj ib co luag hauj lwm tshiab uas lawv yuav tsum tau ua raws los ua tib zoo xyuas kom lawv txheeb tau tias leej twg yog tus neeg uas pheej haub tau yaum ntawm lawv tej platforms kom tej neeg ua txhaum cai tsis txhob muaj peev xwm coj lawv tej xov xwm cuav txog cov kev nqe peev lagluam dag coj mus tso tau yooj yiam ntawm lawv tej platform lawm.''
Tsoom fwv los tseem yuav teeb tsa ib lub chaw hais plaub tuaj nruab nrab coj los pab tej neeg raug neeg phem ntxias dag poob nyiaj mus hais kom them nyiaj paj tshab pauj rov qab rau lawv thiab yuav xyuas kom tsim tau cov txheej txheem txheeb tau tej neeg Australia tej nyiaj yooj yim tshaj qub tuaj ntxiv.
Jones tau hais tias lub koom haum ACCC yeej muaj fwj ib co fwj chim ntau tuaj ntxiv raws li tej cai tshiab los nrog ''ua tib zoo xyuas kom tej tuam txhab lagluam yuav tsum nrog xyuas kom lawv tej system siv tau txais kev nyab xeeb thiab yuav rau txim rau tej tuam txhab lagluam uas ua tej yam tsis zoo''.
Lub koom haum sawv cev rau Australia tej txhab nyiaj (Australian Banking Association - ABA) los kuj zoo siab rau tsoom fwv tej hauj lwm no thiab.
Anna Bligh uas yog tus coj lub koom haum ABA thiaj tau hais ib co ncauj lug tias "Australia yeej tau ua tau tej hauj lwm no zoo zuj zus tuaj ntxiv lawm, thiab tej xwm txheej ntxias dag neeg los kuj poob nyiaj tsawg lawm, txawm li cas los cov kev los ua tib zoo xyuas kom tag nrho txhua tog uas muaj feem cuam tshuam nrog tej xwm txheej scmas thiaj yog tib txoj xub ke uas yuav muaj peev xwm pov puag tau tej zejzog xwb,''
''Tej cai no thiaj yog tej yuav tsum tau siv coj los daws tej teeb meem tseem ceeb uas pheej ua rau tej neeg raug neeg phem ntxias dag ua ntej tshaj plaws. Txhais tau tias yuav tsum tau ua tib zoo los xyuas kom tej tuam txhab muag xov tooj thiab tej tuam txhab social media platforms yuav tsum tau kub siab tiag tiag kom muaj cov kev pov puag tej neeg zoo coj los siv mas thiaj yuav xaus tau tej xwm txheej scams kom tsis txhob mus dag tau tej neeg Australia.''
Tsab cai nod ces tam sim no yeej tseem qhib kev dav coj mus sab laj nrog zej tsoom, uas tsoom fwv cia siab tias yuav muaj peev xwm tsim tau coj los ua cai siv rau thaum ntxov xyoo tom ntej no (2025).
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
