Kum 20 fai a simi Pennsylvania pa, Thomas Matthew Crooks cu kan hnu zarh dongh i campaign rally an tuahnak ah US president hlun Donald Trump meithal in a kaptu a si tiah an lunghrinh.
Secret Service snipers nih Crooks cu inncung in meithal voi tam nawn a kah hnu ah an thah.
Nawlngeitu hna nih thawng fian hlat an i zuam lio ah, meithal kaptu tiah an ruahmi kong kan theih khawh tawk kan rak langhter lai.
Thomas Crooks cu 'mi dai', 'hawi ngei lo a si' tiin a kong an chim.
Crooks konglam an theih khawh mi cu a chuahkehnak khua Pennsylvania pawngah rian a rak tuan mi a si, 2022 ah sianginn sang a dih i cathiam ngai a si. Nain, hawi zong a rak ngei lo, a mah lawng in a rak um deuh mi si an ti.
Federal Bureau of Investigation (FBI) nih a social media profile ah hrocernak bia aa tial lo, lungthin lei ngandamnak kongah tuanbia zong a ngei lo tiah an ti. Agency, hlethlainak a tuahtu phu nih cun amah lawngin a cawlcang mi a si, cun zei ruangah hi thil hi a tuah ti cu kan hngal kho rih lo tiah an ti.
Crooks sianginn kai ti hawi hlun hna nih "dai tein a ummi" siangngakchia le "amah lawng a ummi" a si tiin ABC News ah an chim.
Thomas Matthew Crooks graduated from high school in Pennsylvania in 2022. Source: AFP / Handout
Kum 78 a simi Trump cu bia a chim lio ah a hnakhaw ah an kah. A pawng i a ummi pakhat a thi i a mipi thutnak lei ah mi pahnih cu fak ngai in hliamhma an tuar.
Jason Kohler cu Trump a kaptu a si tiah an lunghrinh mi Crooks he sianginn kai tti an si, sianginn an rak kai lio ah hin midang nih Crooks hi an rak nehsawh, tuaitam lengmang mi a si tiah a chim.
Donald Trump was bundled into a car by Secret Service agents after the shooting at his campaign rally. Source: AAP / Gene J. Puskar/AP
Crooks hi a caan ah cun ram vaihnak thilthuam bantuk hna khi a hruk tawn, a thil hruk fanh aih he pehtlaiin midang nih capo ah an rak saih.
The Times nih a langhter mi cu Crooks hi tar zohkhenhnak inn ah rian a ttuan lio mi a si, meithal kahnak ah aa telnak kong an theih tikah a rian tuannak hmun cu an khuaruah a har ngaingai.
"Thomas Matthew Crooks a rian tuanning zoh tikah mi fel a si cun a nun hlun tuanbia zoh tik zongah a tuanbia a thiang. Atu bantuk thawngpang kan theih cu kan ngeih a chia cun alau zong kan lau ngai ko," tiah Bethel Park Skilled Nursing le Rehabilitation Centre hruaitu Marcie Grimm nih a chim.
Crooks hi ralkap he pehtlaihnak a ngei mi si lo
Mah thil cangmi hnu ah, hlathlaitu hna nih Crooks mawtaw chungah "lunghrinhmi thilri" an hmuh, cucu bomb kong hngalhnak ngeimi thiamsang hna nih an zohfel i an hlathlai cuahmah lio a si.
Tehte caah lunghrinhmi puak khomi thilri pawl an lak hna tiah an ti.
Nawlngeitu hna nih Crooks phone cu an kawl cuahmah lio.
FBI’s Pittsburgh field office ah special agent in rian a ttuanmi Kevin Rojek nih thawngzamhtu sin ah a chimmi cu meithal kahnak ah an hmanmi meithal cu phungning tein cawkmi AR-style semi-automatic meithal a si tiah a chim.
Hlathlaitu hna nih cun hriamnam hi Crooks hringtu a pa nih a cawkmi a si lai tiah an zumh.
Rojek nih a chim rihmi cu, atu tiangah lungthin lei ngandamnak kong he pehtlai in zeihmanh langhternak a um lo a ti.
Pentagon biachimtu Major General Pat Ryder nih a chim ning ahcun, Crooks cu ralkap he pehtlaihnak a ngei lo.
FBI nih thawngzamhtu hna sinah hi thil a cangmi hi thah timhnak le ramchung ralhrang tuahsernak a si khomi a si tiah an hlathlai cuahmah lio a si tiah an chim.
Crooks cu amah lawngin a cawlcang mi a si
Meithal kaptu pa hi amah lawngin rian a ttuanmi a si lai tiah zumh a si, tiah FBI nih an chim, cun nawlngeitu hna nih amah he aa pehtlainak a ngei lai ti zumhmi tehte kan hmu lo tiah an chim.
Ramkhel lei ah a lungput hi fiang in theih a si lo.
thawngpang nih a langhter ning ahcun amah cu Republican ah aa telmi a si, asinain a hlan ah Democratic he aa pehtlaimi tthanchonak ramkhel cawlcanghnak committee sinah tangka a rak pek bel mi a si ti zong a langhter.
Social media platform Discord nih lunghrinhmi he pehtlaihnak a ngeimi account pakhat kan hmuh, asinain "a hman tlawm" tiah a ti.
Biachimtu nih a chim chapmi cu, "hi thil cangmi timhtuahnak, thahnawnnak karhternak, asiloah a ramkhel hmuhning kong ceihhmainak ah hmanmi a si timi tehte kan hmu lo" tiah a ti.
Lunghrinhmi a pa Matthew Crooks nih CNN ah a chimmi cu, a fapa kong a chim hlan ah "zeidah a cang" timi hngalh khawh aa zuam tiah a chim.
Trump rally a tongmi cu meithat rian a ttuanmi le hringtu pa a si
Meithal kahnak in a thimi cu Corey Comperatore a si, kum 50 mi meithat rian a ttuanmi le fa pahnih a ngeimi a si.
“Nizan ah Pennsylvania mi kan hawi Corey Comperatore nih mual a kan liamtak,” tiah ramkulh uktu Josh Shapiro nih thawngzamhtu hna sin ah a chim. "A nupi le a fanu pahnih he zong bia ruahnak kan ngei kho,” a ti.
A chim nolh rih mi cu, Corey te chung hi zarh fatin biakinn a panh mi, meithat rian a tuan mi le Trump a dirkamhtu a si i, "pawngkam hawikom le community cun ... a chungkhar a daw ngaingai mi a si" tiah a ti.
Midang hliamtuar mi hna cu an min an langhter rih lo, asinain NPR thawngzamhnak he aa pehtlaimi WESA nih Pittsburgh um siizung riantuantu hna he biaruahnak an ngei hi khuachung mi an si ko, an dirhmun a chia ngaingai tiin a chim.
