AstraZeneca's COVID-19 pulrai khamnak sii cu vawlei cung ramkip nih hmang ti lo dingin biakhiahnak an tuah cang. Minung nunnak a khamhtu dingah an ser mi sii kha minung nunnak ca tu ah ral a rak si ai.
Hi pulrai khamtu sii a sertu kampani nih kan ser mi sii hi minung caah ral a si an ti le cangka in ahohmanh nih i chun ti hna hlah seh an ti. February thla ah khan AstraZenneca company cu biaceihnak zungah chuahpi a si. Biaceihnak zungah i phehnak bia chim lo tein kan ser mi si hi minung nunnak caah ral a si ko an ti.
Zei ruangah dah minung caah ttih cu a nun?
On 30 April ah khan sii sertu kampani AstraZeneca cu sual phawt a si. Aruang cu pulrai khamnak sii an ser mi kha mi nih an i chunh tikah a chun mi chungin thi-khal zawtnak a ngei mi an um. Sii an ser mi nin minung pum chungah thi-khal zawtnak a chuahter caah mipi kan caah ttih a nunnak hi a si.
Sii an ser mi nih thi-khal zawtnak a chuahter khawh timi zong cu sii sertu nih an rak theih ko nabuin mipi sinah pehzulh in an rak phakter i an i chun cio. Cucaah, AstraZenneca raikham sii a chun mi chungin a nunnak a liam mi zong an rak um len i an dihlak ah minung 50 tluk an si.
Biaceihnak zungah bia a hman ning tein an chim ve i, UK biaceihnak zung nih $190 million dantatnak canh ah an liamter hna.
AstraZenneca Raikhamsii hman kongah Australia dirhmun
Ram pumpi cozah nih AstraZenneca raikhamsii cu hman si ti hlah seh tiin March 21 2023 ah khan thawng a rak thanh cang.
Hman ti lo dingin thawng an rak thanh zong cu minung nunnak caah ral a chuahter khawh timi an rak hmuh caah a rak si.
Health Minister Mark Butler nih a chim mi cu: "khuaruah har awk zeihmanh a um lo, tuan te khan AstraZenneca hi minung caah ttihnung a rak si kha kan rak hngalh i hman ti lo dingin biakhiahnak kan rak tuah cang. AstraZenneca sii i chunh ti lo dingin kan rak thanhnak zong a rak sau ngaingai cang."
AstraZenneca sii nih a hliam chin mi Australia an um ma?
Infectious diseases physician Dr Paul Griffin nih a chim mi cu: "AstraZenneca i chun ruangah thi-khal zawtnak nih a tlunh mi hna an um. Atu bantuk thi-khal zawtnak hi hmuh a har ngaingai mi a si. A voikhatnak bik a chun mi hi thi-khal zawtnak nih a tlunh duh khun hna cun an van chiat cun a nunnak zong a liam kho fawn."
"Australia ram chungah AstraZenneca raikhamsii i chunh ruangah a nunnak a liam mi hi pa 11 an si. A nunnak a liam mi chungah 8 hi an sining kan kherhlai tikah phun dang ngai a si mi thi-khal zawtnak nih a tlun mi hna an si."
Zawtnak tha lo a chuahter chin mi nih kei ta a ka tlunh kho ma?
Zawtnak hmelchunhnak hi AstraZenneca raikhamsii i chunnak hnu ni 4 in 42 kar ah hmuh khawh a si tawn.
Atu hnu cun ttih tuk ding le thinphan awk cu aum ti lo tiin Griffin nih a chim.
Na rak i chunh ka hrawnghrang ah khan zawtnak tha lo nih an tlunh a si cun tuan ah a chuak cang lai. Hmelchunnak siseh, a dangdang dam lonak tete kha a na rak i chunh dih ka hrawng khan a puan ding a si cang.
AstraZenneca kampani nih zeidah an chim ve?
Thawngthanhnak an tuah ve ningah cun kan ser mi sii nih minung 6.5 million nunnak leng a khamh manh hna an ti.
AstraZenneca nih an chim rih mi cu raikhamsii dang phunphun kan ser mi an um len rih. sii dang kan ser ther mi chungin Vaxzevria hi zapi nih an hmang duh ti lo. Europe ram hna ah cun hman lo dingin nawl an chuah i kan ser sii mi an man ti lo an ti.
