Tangka kum thar, Thlennak thar
July 1 thawk in, ngunkhuai pek ding tlawmter deuh a si, ni hlawh niam a hmu mi hna thla hlawh kaih an si, cun federal budget ah an rak langhter cang bang khan ram mi hna mei man bawmhnak cu thla thum dan voikhat in an mei bill ah hmuh khawh a si lai.
Mei man bawmhnak
Inn khat nih mei man bamwhnak 75$ lengmang thla thum dan voikhat in an hmuh lai, hi bawmhnak hi chungkhar Nuai 10 (million) tluk nih an don ding mi bawmhnak a si. Small business a ngei mi belte cu kum khat ah mei man $325 lawng an hmu lai.
Queensland le Tasmania ah a um mi hna caah thawngpang tha ngai a si mi cu July 1 hnu in an hmuh hnga dingmi bawmhnak an cozah nih a timhlamh mi a um.
Thlahlawh kaiternak
Australia ram i hlawh tlawm bik a hmumi riantuantu nuai tampi hna cu July 1 hnu in an thlahlawh 3.75% karhter a si.
A sullam cu ram pumpi hlawh tlawmbik cu zarhkhat ah $882.80 asiloah suimilam pakhat ah $23.23 in zarhkhat ah $915.90 asiloah suimilam pakhat ah $24.10 tiang a kai lai tinak a si.
Federal ramkhel riantuantu hna zong hlawh kaiter an si lai, an nih pawl hlawh cu 3.5% in a kai lai.
MP pawl hlawh hi kumkhat ah $225,750 in $233,650 tiang a kai lai — kum khat ah $8,000 hrawng a karh lai tinak a si.
Kamkhat lei cozah hruaitu Peter Dutton hlawh cu $15,000 hrawng in a kai lai — $417,640 in $432,260 tiang — cu lio ah Prime Minister Anthony Albanese nih kum khat ah $20,000 leng a lak lai, a hlawh cu $586,950 in $607,490 tiang a kai lai.
Nuai tampi caah ngunkhuai tlawmternak
Australia innchungkhar kip nih zarhkhat ah $2,000 cung, asiloah $40 cung ngunkhuai tlawmternak an hmuh lai.
"Middle Australia" le khuasak a harh deuh mi hna caah ngunkhuai tlawmternak thar cu tukum hramthawk ah federal parliament nih a cohlan.
Tlawm tete in tangka kha a rak lut lai lo. Nan thlahlawh a rak luh tik tu ah khan a rak lut mi tangka kha a tam deuh cang lai.
Mithiam hna nih an chimmi cu, tahchunhnak ah, kum khat ah $60,000 a hmumi nih zarhkhat ah a hlawh $23 hrawng a kai ti kha a hmuh lai. Kum khat ah $120,000 a hmumi nih zarhkhat ah $52 tluk a hmuh lai.
Innchungkhar pakhat nih $130,000 hrawng a hmuh ahcun zarhkhat ah $50 hrawng a hmuh lai.
Na hlawh mi tangka tuaktan na duh ahcun , a tanglei i kan chiah mi kanan tuaknak kha rak hmang ve.
Superannuation
Na hlawh cazin ah na hmuh dingmi thlennak dang pakhat cu superannuation phun in a ra lai.
Riantuantu hna nih an pension tangka chiahmi ah tam deuh an hmuh lai i, rian dinh caan hmannak hngatchannak rate cu 11% in 11.5% tiang a karh lai.
Na rian ngeitu nih rian an dinh hnu ca hman ding mi tangka khawnnak ah tangka an chiahpiak mi a tam deuh le tam deuh lo tha tein na ngiat ve a hau.
Centrelink bawmhnak tangka
Kum khua upa cangmi hna nih an hmuh mi bawmhnak, mi tlamtling lo nih an hmuh mi bawmhnak, mi zohkhentu nih an hmuh mi bawmhnak, fale zohkhenhnak caah hmuh mi bawmhnak le a dangdang cozah sin in a ra mi bawmhnak hna cu tlawmpal kaih deuh an si ve lai.
Passports
Passport tuah man cu $346 a rak si nain July 1 hnu cun $398 ah a kai lai.
Rian riang deuh in khuatlawn a tim mi, tuan ah passport a herh mi hna kha khualtlawn khawhnak travel document pek chung an si lai.
Tuan ah passport a herh mi hna caah cozah nih passport sernak he pehtlaiin phung thar a ser mi a um.
Ninga chungah tuah piak ding a si lai nain, soknak man na liam mi pin ah a hlei in 100$ na pek chap a hau lai.
