અંગનું દાન કરનાર તથા દાન મેળવનારી વ્યક્તિઓ પણ રમતોમાં ભાગ લઇને પોતાની શક્તિઓનો પરચો આપી શકે તે હેતૂથી વર્લ્ડ ટ્રાન્સપ્લાન્ટ ગેમ્સનું આયોજન કરવામાં આવે છે.
તાજેતરમાં 15થી 21મી એપ્રિલ 2023 દરમિયાન વર્લ્ડ ટ્રાન્સપ્લાન્ટ ગેમ્સ પર્થના ઓપ્ટ્સ સ્ટેડિયમમાં રમાઇ હતી.
મુંબઈના વિજય યાદવે બે મેડલ મેળવ્યા
રમતોત્સવમાં ભાગ લેવા માટે પર્થ આવેલા વિજય યાદવ મૂળ મુંબઈના છે. નોકરી અર્થ તેઓ યુનાઇટેડ કિંગડમ ગયા હતા.
ત્યાં તેમની પત્નીને કિડનીની જરૂર પડી હતી.
ટ્રાન્સપ્લાન્ટ ગેમ્સમાં વિજય યાદવે 5 કિમી દોડ અને અંડર-50 બોલ થ્રોમાં ગોલ્ડ મેડલ જીત્યા છે.
તેમની પત્નીને કિડની મળ્યા બાદ હાલ બન્ને સ્વસ્થ છે.
બેંગ્લોરના વરુણે 3 મેડલ જીત્યા
વરૂણ માત્ર ચૌદ વર્ષનો છે નાની ઉંમરે તેને કિડનીની બિમારી થઇ હતી.
વરુણને માતાએ કિડની આપી અને તે હાલમાં સ્વસ્થ છે.
ટેનિસ, ટેબલ-ટેનિસ અને બેડમિન્ટન ગેમ્સમાં ભાગ લઇને તેણે ત્રણ ગોલ્ડ મેડલ જીત્યા હતા.
હાર્ટ ટ્રાન્સપ્લાન્ટ થયું અને જીવ બચ્યો
દિલ્હીના કરણ નંદા અગાઉ સોકર રમતા હતા.
એક દિવસ રમતી વખતે અચાનક ગ્રાઉન્ડમાં તેમને હાર્ટ-અટેક આવ્યો હતો.
CPRની સારવાર આપતા તેઓ બચી ગયા હતા.
ચાર મહિના પછી કોઈ વ્યક્તિનું હૃદય મળ્યું અને હાર્ટ ટ્રાન્સપ્લાન્ટ કર્યું હતું.
હ્દયની બિમારીના કારણે ફરીથી ફૂટબોલ ન રમી શકાય તેથી તેમણે ગોલ્ફ રમવાનું શરુ કર્યું.
ટ્રાન્સપ્લાન્ટ ગેમ્સમાં તેમણે ગોલ્ફમાં એક વ્યક્તિગત અને એક ડબલ્સ સ્પર્ધામાં એમ બે સિલ્વર મેડલ જીત્યા હતા.
તૌહીદ અહમદ બારાબંકીના વતની છે
તૌહીદના જણાવ્યા પ્રમાણે, તેમને કિડનીની બીમારી થઇ ત્યારે કુટુંબીજનો પાસેથી કોઇ મદદ મળી નહી.
એક મિત્રએ ખેતર અને અન્ય મિલકત વેચી કિડનીની વ્યવસ્થા કરી આપી હતી.
આજે તૌહીદ સ્વસ્થ છે અને બેડમિન્ટન ડબલ્સમાં અભિનવ પંગત સાથે મળી બ્રોન્ઝ મેડલ મેળવી મિત્રનો આભાર માન્યો હતો.
પિતાને કિડનીનું દાન કર્યું અને ગોલ્ડ જીત્યા
રોય ટોમ અને મિલી પતિ-પત્ની છે. બંનેએ તેમના પોતપોતાના પિતાને કિડની આપી છે.
મિલીએ તેમનો પુત્ર એક વર્ષનો હતો ત્યારે તેમના પિતાને કિડનીનું દાન કર્યું હતું.
રોય ટોમે અંડર-50 માં 100 મીટર લોગ જમ્પમાં અને 100 મીટર દોડમાં ગોલ્ડ મેડલ જયારે મિલીએ 100 મીટર દોડ, અને અંડર-50 કેટેગરીમાં ગોલ્ડ મેડલ જીત્યા હતા.
પર્થ ખાતે રમાયેલી સ્પર્ધામાં ડાર્ટની રમતમાં તેમણે ગોલ્ડ મેડલ જીત્યો હતો.
ઓર્ગન ઇન્ડિયાના સીઈઓ સુનયના બેન છે. ફાઉન્ડર અનિકા પરાશરે કહ્યું કે મારી માતાનું દસ વર્ષ અગાઉ હાર્ટ ટ્રાન્સપ્લાન્ટ થયું હતું ત્યારથી ઓર્ગન ઇન્ડિયાની શરૂઆત કરી હતી.
દેશના લોકોમાં ઓર્ગન ડોનેશન માટે જાગૃતતા ફેલાવીયે છીએ અમે ભારતમાં શાળાઓ, નાના ગામ, પંચાયત એમ અનેક સંસ્થાઓ સાથે મળીને કામ કરીએ છીએ.
વર્લ્ડ ટ્રાન્સપ્લાન્ટ ગેમ્સનો ઉદ્દેશ્ય
શરીરના અંગો દાનમાં આપનાર કે મેળવનાર વ્યક્તિ પણ સ્વસ્થ જિંદગી જીવી શકે છે એવી પ્રેરણા આપવા માટે રમતોત્સવનું આયોજન કરવામાં આવ્યું હતું.
ભારતીય દળના ખેલાડીઓમાં કિડની, લીવર, હાર્ટનું દાન મેળવનાર અને દાન આપનારા ખેલાડીઓની સંખ્યા વધુ હતી.
24મી વર્લ્ડ ટ્રાન્સપ્લાન્ટ ગેમ્સમાં 30 દેશોના સ્પર્ધકોએ ભાગ લીધી હતો.
પ્રથમ વખત પર્થમાં આ રમતોનું આયોજન કરવામાં આવ્યું હતું.
પહેલી વખત ભારતથી ટીમ ઇન્ડિયા સૌથી મોટી સંખ્યામાં એટલે કે 32 ખેલાડીઓ સાથે સ્પર્ધામાં ભાગ લેવા આવી હતી.
ભારતથી ગેમ્સમાં ભાગ લેવા આવેલા ખેલાડીઓ, દળના સભ્યો અને ભારતીય સમુદાયના સભ્યોને કોન્સ્યુલ જનરલ ઓફ ઇન્ડિયા પર્થ ઓફિસ દ્વારા કાર્યક્રમમાં આમંત્રિત કરવામાં આવ્યા હતા.
પર્થ ખાતેના કોન્સ્યુલ જનરલ ઓફ ઇન્ડિયા અમરજીતસિંહ તખીએ ખેલાડીઓને તેમના સંઘર્ષની કહાની લોકો સમત્ર પહોંચાડવા પ્રોત્સાહિત કર્યા હતા.
ઓર્ગન ઇન્ડિયા દ્વારા વ્યવસ્થા કરાઈ
આ અગાઉની જુદા જુદા વર્ષોના રમતોત્સવમાં ભારત 15થી વધુ મેડલ જીતી શક્યું નથી.
વર્ષ 2023માં રમાયેલી ટૂર્નામેન્ટમાં પહેલી વખત ભારતે અંગોના દાન મેળવનારની કેટેગરીમાં અત્યાર સુધીના ભારતના ઇતિહાસમાં સૌથી વધુ 20 મેડલ મેળવ્યા છે જયારે અંગોનું દાન આપનારની કેટેગરીમાં 15 મેડલ જીત્યા છે. કુલ 35 મેડલ મેળવ્યા છે.
વિવિધ માધ્યમો દ્વારા SBS Gujarati સાથે જોડાયેલા રહી શકો છો.
SBS Gujarati Website: www.sbs.com.au/gujarati ને બુકમાર્ક કરો અને તાજા સમાચાર મેળવો.
SBS Radio App: SBS Gujarati ના તમામ પોડકાસ્ટ અને લાઇવ રેડિયો સાંભળવા App Store અને Google Play પરથી SBS Radio App ડાઉનલોડ કરો.
ગુજરાતીમાં સમાચારો અને મુલાકાતો સાંભળો: ગુજરાતીમાં દૈનિક સમાચારો અને દેશ – વિદેશમાં વસતા ગુજરાતી સમુદાયના લોકોની મુલાકાતો સાંભળવા SBS Gujarati ને Apple Podcasts, Google Podcasts, Spotify પર સબસ્ક્રાઈબ કરો.
Listen to SBS Gujarati every Wednesday and Friday at 4 pm.
