የተቃዋሚ ቡድንና ሊብራል ፓርቲ መሪው አቶ ጆን ፐሱቶና ገዲብ አመራሮች ረቡዕ ኖቬምበር 13 / ሕዳር 4 አመሻሽ በጠሩት ፕሬስ ኮንፈረንስ ላይ በመድብለባሕል፣ ንግድ፣ የአገልግሎት ተደራሽነት፣ አቅም መጣኝ የሆኑ የቤቶች ችግሮችን መቅረፍንና ለኑሮ ውድነት መላ ማበጀትን አስመልክተው ተናግረዋል።
አቶ ፐሱቶ በተለይም ፍልሰተኛ ማኅበረሰባትን በተመለከተ ሲናገሩ " የእኛ ተግባር አዲስ ወደ ሃገራችን የመጡ ፍልሰተኞች ችግሮችና ለረጅም ጊዜያት ቆይተውም የመንግሥት ድጋፍ ባጡቱ ላይ ብቻ የተወሰነ ሳይሆን ብርቱ ድጋፍ ማድረግንም ያካተተ ነው" ብለዋል።
አክለውም፤ ፓርቲያቸው የፍልሰተኛ ማኅበረሰብ አባላት ሁሉን አካታች የሆነ መንግሥት እንደምን እንደሚገነባ፣ ለትውልድ ተዛማጅ የሆነ ዕዳ ቅነሳ፣ የባቡር መሥመር የመሳሰሉ የመሠረተ ልማት አውታር ዝርጋታዎች፣ በአውስትራሊያና ከመጡባቸው ሀገራት ጋር ተዛማጅ በሆኑ የንግድ ግንኙነቶች ላይ ተሳታፊ እንዲሆኑ የሚያበረታታና የሚሠራ መሆኑን ገልጠዋል።
እስከ መጪው 2026 ክፍለ ሀገራዊ ምርጫ በአመራር ላይ የመቆየት ዕድላቸውን አስመልክቶ ለቀረበላቸው ጥያቄ ሲመልሱም "ለሚቀጥለው ምርጫ በሊብራል ፓርቲ መሪነት እንደምዘልቅ እተማመናለሁ፤ መልካም ዕድሎች ብቻ ሳይሆኑ፤ ኃላፊነቶችም አሉብን" ብለዋል።
የሊብራል ፓርቲ ምክትል መሪ ዲቪድ ሳውዝዊክ በበኩላቸው አቶ ፐሱቶን አስመልክተው ሲናገሩ "ጆን ተፋላሚ ነው። የሚፋለውም ግና ከቅን ልቦና ጋር
ነው" ብለዋል።
የመድብለ ባሕል ማኅበረሰባትንም በተመለከተ ሰዎች ከየትም ይምጡ ከየት፣ በማንነታቸውና ምንነታቸው ከበሬታ ሊቸራቸው እንደሚገባ አሳስበዋል።
David Southwick, Victoria Deputy Liberal Party Leader. Credit: SBS Amharic
ተለምዷዊው በተለያዩ የማኅበረሰባት ኩንቶች ላይ መገኘት፣ ድጎማ መስጠትና "እናመሰግናለን" ተባብሎ መሰነባበት ጠቃሚም ቢሆን ዘላቂ ሊሆን እንደማይችልም አመላክተዋል።
ይልቁን መታሰብ ያለበት እንደምን ዘላቂ እንደምናደርገው፣ የትምህርትና ሥራ ዕድሎች፣ ይወደፊት ዕጣ ፈንታን ቪክቶሪያ ውስጥ እንደምን መፍጠር እንደሚቻል በማሰብ በጋራ መሥራት እንደሚገባ ጠቁመዋል።
በፊናቸው ጤናን የመሳሰሉ አግለግሎች መዳከምን ያነሱ ሲሆን "እኛ የምርጫ፤ የመልካም ዕድል ፓርቲ ነን" ያሉት የተቃዋሚ ቡድኑ የላይኛው ምክር ቤት መሪ የሆኑት ጆርጂ ክሮዚየር የቀድሞ የነርስና አዋላጅ ሙያቸውን ሥነ ምግባር አጣቅሰው፤
"በሕክምና ዓለም አንድ ሰው ለሕክምና ሲመጣ ማንነው? ከየት ነው? ተብሎ አይጠየቅም፤ ከፍና ዝቅ ተደርጎ አይገመትም። የሚያሻው ክብካቤ ብቻ ነው፤ ያም ይደረጋል። የእዚያ ዓይነቱን አገልግሎት ነው ለመላው ቪክቶሪያውያን መስጠት የምንፈልገው" ብለዋል።
Georgie Crozier is a leader in the Legislative Council and shadow minister for health. Credit: SBS Amharic
